राहुरी आणि बारामती पोटनिवडणुकीचा ‘रुद्र रिसर्च अँड एनालिटीक्स’ने घेतलेला सद्यस्थितीचा आढावा…
राहुरी आणि बारामती पोटनिवडणुकीचा ‘रुद्र रिसर्च अँड एनालिटीक्स’ने घेतलेला सद्यस्थितीचा आढावा…
बारामती आणि राहुरी पोटनिवडणुकीत Ajit Pawar यांच्या निधनानंतर बदललेली समीकरणे. ‘रुद्र रिसर्च’च्या सर्वेक्षणात सहानुभूती, ओबीसी आणि स्थानिक मुद्द्यांचा प्रभाव स्पष्ट.
पुणे १८ मार्च २०२६ : पुणे: राज्यातील राजकीय समीकरणे बदलून टाकणाऱ्या राहुरी आणि बारामती विधानसभा मतदारसंघांच्या पोटनिवडणुकीचे बिगुल वाजले असून, ‘रुद्र रिसर्च अँड अॅनालिटिक्स’ने केलेल्या ताज्या पाहणीत दोन्ही मतदारसंघांतील धक्कादायक कल समोर आले आहेत. उपमुख्यमंत्री अजित पवार आणि आमदार शिवाजी कर्डिले यांच्या निधनामुळे रिक्त झालेल्या या जागांवर अनुक्रमे सुनेत्रा पवार आणि अक्षय कर्डिले यांची दावेदारी प्रबळ असली, तरी स्थानिक समीकरणे आणि जातीचे फॅक्टर विजयाचे गणित फिरवू शकतात, असा निष्कर्ष या अहवालातून काढण्यात आला आहे.
बारामती: ‘सहानुभूती’ विरुद्ध ‘ओबीसी’ फॅक्टर
अजित पवारांच्या आकस्मिक निधनानंतर बारामतीत त्यांच्याबद्दल प्रचंड सहानुभूतीची लाट असल्याचे चित्र आहे. राष्ट्रवादी काँग्रेसकडून सुनेत्रा पवार रिंगणात उतरण्याची शक्यता असून, खासदार सुप्रिया सुळे यांनी घेतलेल्या सकारात्मक भूमिकेमुळे ही निवडणूक ‘बिनविरोध’ होण्याचे संकेत मिळत होते. मात्र, त्यामध्ये आता दोन मोठे अडथळे दिसून येत आहेत:
१. लक्ष्मण हाके यांची भूमिका: ओबीसी नेते लक्ष्मण हाके यांनी निवडणूक लढवण्याबाबत संकेत दिल्याने बारामतीचा मार्ग निष्कंटक राहण्याची शक्यता धूसर झाली आहे.
२. धनगर समाजाची नाराजी: शासकीय रुग्णालयाला स्व. अजित पवारांचे नाव देण्याच्या प्रक्रियेवरून मतदारसंघातील २८% असलेला धनगर समाज काहीसा नाराज असल्याचे सर्वेक्षणात आढळले आहे.
असे असले तरी, अजित पवारांचा दांडगा जनसंपर्क आणि कामाचा धडाका यामुळे सुनेत्रा पवार यांचे पारडे आजच्या घडीला जड दिसत आहे
राहुरी: वारसाहक्क की राजकीय अनुभव?
राहुरी मतदारसंघात राजकीय बुद्धिबळाचे डावपेच अधिक क्लिष्ट होताना दिसत आहेत. भाजपकडून अक्षय कर्डिले यांचे नाव चर्चेत असले, तरी त्यांच्यासमोर माजी राज्यमंत्री प्राजक्त तनपुरे यांच्या अनुभवाचे मोठे आव्हान असेल.
अक्षय कर्डिले (भाजप): दिवंगत शिवाजी कर्डिले यांच्याबद्दलची सहानुभूती हा अक्षय यांच्यासाठी सर्वात मोठा ‘प्लस पॉईंट’ आहे. मात्र, ३० वर्षीय अक्षय यांचा मर्यादित राजकीय अनुभव आणि जनसंपर्क ही त्यांच्यासाठी जमेची बाजू ठरत नसल्याचे ‘रुद्र’च्या अहवालात म्हटले आहे.
प्राजक्त तनपुरे (मविआ): तनपुरे यांचा राजकीय अनुभव दांडगा आहे. मात्र, त्यांनी अलीकडेच घेतलेली मवाळ हिंदुत्ववादी भूमिका आणि देवेंद्र फडणवीस यांची केलेली स्तुती यामुळे ते भाजपमध्ये प्रवेश करणार का? अशी मोठी चर्चा मतदारसंघात सुरू आहे. जर त्यांनी भाजपमध्ये प्रवेश केला, तर ही निवडणूक एकतर्फी होण्याची चिन्हे आहेत.
विखे-पाटील फॅक्टर: माजी खासदार सुजय विखे पाटील यांची ताकद अक्षय कर्डिले यांच्या पाठीशी उभी राहिल्यास भाजपचा विजय सुकर होऊ शकतो, असे विश्लेषकांचे मत आहे.
निवडणुकीवर प्रभाव टाकणारे कळीचे मुद्दे:
सर्वेक्षणानुसार, केवळ सहानुभूतीवर या निवडणुका जिंकणे सोपे नसेल. मतदारांच्या मनात खालील मुद्द्यांवरून रोष आणि अपेक्षा आहेत:
शेतकरी प्रश्न: ऊस आणि दुधाला मिळणारा कमी दर आणि साखर कारखान्यांकडून थकीत असलेली बिले यावरून शेतकरी वर्ग नाराज आहे.
रखडलेले रस्ते: अहिल्यानगर-मनमाड महामार्गाचे संथ गतीने सुरू असलेले काम, खड्डे आणि धुळीमुळे स्थानिक नागरिक त्रस्त आहेत.
लाडकी बहीण योजना: २०२४ च्या निवडणुकीत या योजनेचा जो प्रभाव होता, तो या पोटनिवडणुकीत काहीसा ओसरल्याचे निरीक्षण नोंदवण्यात आले आहे.
थोडक्यात सांगायचे तर: बारामतीत सुनेत्रा पवार यांना कौटुंबिक आणि राजकीय सहमती मिळताना दिसत असली, तरी राहुरीत मात्र भाजपला ‘विखे-कर्डिले’ युती आणि ‘सहानुभूती’ या दोन चाकांवरच विजयाची मदार ठेवावी लागणार आहे
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
