FDA ची राज्यभर धडक मोहीम 195 धाडी, 192 जणांना अटक, 1.99 कोटींचा प्रतिबंधित गुटखा-पानमसाला जप्त
FDA ची राज्यभर धडक मोहीम 195 धाडी, 192 जणांना अटक, 1.99 कोटींचा प्रतिबंधित गुटखा-पानमसाला जप्त
अन्न व औषध प्रशासन विभागाने 1 ते 5 जून 2026 दरम्यान राज्यभर 195 धाडी टाकून 1.99 कोटी रुपयांचा प्रतिबंधित गुटखा आणि पानमसाला साठा जप्त केला. या कारवाईत 192 जणांना अटक करण्यात आली असून अनेक ठिकाणी मोठ्या प्रमाणात साठा आणि वाहने जप्त करण्यात आली आहेत.
पुणे ८ जून २०२६ : राज्यात प्रतिबंधित गुटखा, पानमसाला आणि तत्सम अन्नपदार्थांच्या अवैध उत्पादन, साठवणूक, वाहतूक आणि विक्रीविरोधात अन्न व औषध प्रशासन (FDA) विभागाने व्यापक मोहीम हाती घेतली असून या कारवाईत मोठे यश मिळाले आहे. 1 ते 5 जून 2026 या अवघ्या पाच दिवसांच्या कालावधीत राज्यभर 195 धाडी टाकण्यात आल्या असून 192 जणांना अटक करण्यात आली आहे. तसेच 1 कोटी 99 लाख 18 हजार 475 रुपयांचा प्रतिबंधित साठा जप्त करण्यात आला आहे.
अन्न व औषध प्रशासन विभागाने राज्यभर सुरू केलेल्या या विशेष मोहिमेमुळे गुटखा आणि पानमसाल्याच्या अवैध व्यापारावर मोठा आळा बसण्याची अपेक्षा व्यक्त केली जात आहे. भारतीय न्याय संहितेतील विविध कलमे तसेच अन्न सुरक्षा व मानके कायद्यानुसार गुन्हे दाखल करून ही कारवाई करण्यात येत आहे. आयुक्त तुकाराम मुंढे यांच्या निर्देशानुसार राज्यभर समन्वयाने ही मोहीम राबविण्यात येत असल्याचे प्रशासनाने स्पष्ट केले आहे.
या मोहिमेदरम्यान 3 जून रोजी धुळे जिल्ह्यातील सोनगीर येथे टाकण्यात आलेल्या धाडीत 23 लाख 50 हजार रुपये किंमतीचा प्रतिबंधित साठा जप्त करण्यात आला. त्यानंतर 4 जून रोजी समृद्धी महामार्गावरील सावंगी टोल नाका येथे मोठी कारवाई करण्यात आली. या ठिकाणी 60 लाख 50 हजार रुपये किंमतीचा प्रतिबंधित साठा आणि संबंधित वाहन जप्त करण्यात आले.
त्याच दिवशी नांदेड येथेही धडक कारवाई करत 17 लाख 52 हजार 450 रुपये किंमतीचा प्रतिबंधित साठा आणि वाहन जप्त करण्यात आले. तर पिंपरी-चिंचवडमधील मोशी परिसरात करण्यात आलेल्या तपासणीत 6 लाख 19 हजार 982 रुपये किंमतीचा प्रतिबंधित माल जप्त करण्यात आला. या प्रकरणात सहा जणांविरोधात चिखली पोलीस ठाण्यात गुन्हा दाखल करण्यात आला आहे.
5 जून रोजी धाराशिव जिल्ह्यातील परांडा येथे करण्यात आलेल्या कारवाईत सर्वात मोठा साठा जप्त करण्यात आला. संशयाच्या आधारे करण्यात आलेल्या तपासणीत तब्बल 1 कोटी 2 लाख 67 हजार 263 रुपये किंमतीचा प्रतिबंधित अन्नपदार्थांचा साठा हस्तगत करण्यात आला. या प्रकरणात दोन जणांना अटक करण्यात आली आहे.
विभागीय आकडेवारीनुसार, बृहन्मुंबई क्षेत्रात 30 धाडी टाकून 3 लाख 12 हजार रुपयांचा मुद्देमाल जप्त करण्यात आला असून 30 जणांना अटक करण्यात आली आहे. तर पुणे विभागात सर्वाधिक 79 धाडी टाकण्यात आल्या. या कारवाईत 8 लाख 19 हजार रुपयांचा मुद्देमाल जप्त करण्यात आला असून 78 जणांना अटक करण्यात आली आहे.
सहआयुक्त (अन्न) महेश चौधरी यांनी दिलेल्या माहितीनुसार, प्रतिबंधित अन्नपदार्थांविरोधातील ही मोहीम पुढेही अधिक तीव्र करण्यात येणार आहे. सार्वजनिक आरोग्याला धोका निर्माण करणाऱ्या गुटखा आणि पानमसाल्याच्या अवैध व्यापाराला आळा घालण्यासाठी प्रशासन कठोर भूमिका घेत असून दोषींविरुद्ध कठोर कायदेशीर कारवाई सुरूच राहणार आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
