Pune Accident News: नवले पुलावर भीषण अपघात सिमेंट मिक्सर पलटून दुचाकीस्वाराचा जागीच मृत्यू
नवले पुलावर भीषण अपघात सिमेंट मिक्सर पलटून दुचाकीस्वाराचा जागीच मृत्यू
पुण्यातील नवले पूल परिसरात सिमेंट मिक्सर ट्रक पलटल्याने 31 वर्षीय दुचाकीस्वाराचा जागीच मृत्यू झाला. अपघातामुळे महामार्गावर वाहतूक कोंडी झाली असून पोलिसांनी पुढील तपास सुरू केला आहे.
पुणे १० जून २०२६ : पुण्यातील अपघातप्रवण नवले पूल परिसरात बुधवारी पहाटे एक भीषण अपघात घडला. भरधाव वेगातील सिमेंट मिक्सर ट्रक वळण घेत असताना अचानक पलटला आणि त्याच्या शेजारून जाणाऱ्या दुचाकीवर कोसळला. या दुर्घटनेत 31 वर्षीय दुचाकीस्वाराचा जागीच मृत्यू झाला, तर ट्रक चालक जखमी झाला आहे. या घटनेमुळे परिसरात काही काळ वाहतूक कोंडी निर्माण झाली होती.
पोलिसांनी दिलेल्या माहितीनुसार, हा अपघात मुंबई-बंगळुरू महामार्गावरील कात्रज-देहूरोड बायपास मार्गावर नवले चौकाजवळ घडला. सिमेंट मिक्सर ट्रक कात्रजकडून बावधनच्या दिशेने जात होता. नवले चौकाजवळील वळण घेताना चालकाचा ताबा सुटल्याने ट्रक पलटला. याचवेळी ट्रकच्या बाजूने जाणाऱ्या दुचाकीवर तो कोसळल्याने दुचाकीस्वार ट्रकखाली दबला गेला.
या अपघातात मृत्यू झालेल्या तरुणाची ओळख रामेश्वर मच्छिंद्र भोगले (वय 31) अशी झाली आहे. अपघात इतका भीषण होता की त्यांचा घटनास्थळीच मृत्यू झाला. तर ट्रक चालक गोरख लक्ष्मण रानसुरे याला डोक्याला दुखापत झाली असून उपचारासाठी रुग्णालयात दाखल करण्यात आले आहे.
घटनेची माहिती मिळताच नार्हे पोलीस घटनास्थळी दाखल झाले. अपघातग्रस्त वाहने रस्त्याच्या कडेला हटवून वाहतूक सुरळीत करण्याचे काम करण्यात आले. अपघातामुळे काही काळ महामार्गावरील वाहतुकीचा वेग मंदावला होता. मृतदेह शवविच्छेदनासाठी ससून रुग्णालयात पाठवण्यात आला असून या प्रकरणी पुढील कायदेशीर प्रक्रिया सुरू आहे.
नवले पूल परिसर हा पुण्यातील सर्वाधिक अपघातप्रवण भागांपैकी एक म्हणून ओळखला जातो. या ठिकाणाला ‘ब्लॅक स्पॉट’ म्हणूनही घोषित करण्यात आले आहे. रस्ते वाहतूक आणि महामार्ग मंत्रालयाच्या निकषांनुसार एखाद्या 500 मीटरच्या पट्ट्यात तीन वर्षांत पाच किंवा त्याहून अधिक गंभीर अपघात झाल्यास त्या ठिकाणाला ब्लॅक स्पॉट म्हणून घोषित केले जाते.
2022 ते 2024 या कालावधीत नवले पूल परिसरात झालेल्या विविध अपघातांमध्ये 12 जणांचा मृत्यू झाला असून सात जण गंभीर जखमी झाले आहेत. त्यामुळे हा परिसर सातत्याने चर्चेत राहिला आहे. गेल्या काही वर्षांत येथे अनेक मोठे अपघात घडले आहेत.
नोव्हेंबर 2025 मध्ये याच परिसरात एका भरधाव ट्रकने अनेक वाहनांना धडक दिल्याने सात जणांचा मृत्यू झाला होता, तर सुमारे 20 जण जखमी झाले होते. त्याआधी नोव्हेंबर 2022 मध्ये तांदळाच्या पोत्यांनी भरलेल्या ट्रकने तब्बल 48 वाहनांना धडक दिली होती. त्या अपघातात 25 जण जखमी झाले होते.
नवले पूल परिसरातील वारंवार होणारे अपघात पाहता या मार्गावरील सुरक्षाव्यवस्था, वाहतूक नियोजन आणि वेग नियंत्रणासाठी अधिक प्रभावी उपाययोजना करण्याची मागणी पुन्हा एकदा जोर धरू लागली आहे. स्थानिक नागरिक आणि वाहनचालकांकडून प्रशासनाने तातडीने कायमस्वरूपी उपाययोजना कराव्यात, अशी मागणी केली जात आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
