देऊळ बंद 2 : कठीण प्रसंगी शाहरुख खान धावून आले! ‘देऊळ बंद 2’साठी 42 लाखांचे बिल माफ करत केली मोठी मदत
देऊळ बंद 2 : कठीण प्रसंगी शाहरुख खान धावून आले! 'देऊळ बंद 2'साठी 42 लाखांचे बिल माफ करत केली मोठी मदत
प्रवीण तरडे दिग्दर्शित ‘देऊळ बंद 2’ रिलीजपूर्वी आर्थिक संकटात सापडला होता. अशावेळी शाहरुख खान यांनी रेड चिलीज एंटरटेनमेंटमार्फत 42 लाख रुपयांचे DCP बिल माफ करून चित्रपटाला मोठा दिलासा दिला.
पुणे १९ जून २०२६ : मराठी चित्रपटसृष्टीतील सर्वाधिक चर्चेत असलेल्या ‘देऊळ बंद 2’ या चित्रपटाने बॉक्स ऑफिसवर दमदार यश मिळवत 80 कोटी रुपयांहून अधिक कमाई केली आहे. मात्र, हा चित्रपट थिएटरपर्यंत पोहोचण्यापूर्वी मोठ्या आर्थिक अडचणीत सापडला होता. अशा कठीण काळात बॉलिवूड सुपरस्टार शाहरुख खान यांनी दिलेल्या मदतीमुळेच चित्रपटाचे प्रदर्शन शक्य झाल्याचा खुलासा दिग्दर्शक प्रवीण तरडे यांनी केला आहे.
‘अभिजात मराठी फिल्मी’ला दिलेल्या मुलाखतीत प्रवीण तरडे यांनी सांगितले की, चित्रपट थिएटरमध्ये प्रदर्शित करण्यासाठी आवश्यक असलेल्या डिजिटल सिनेमा पॅकेज (DCP) तयार करण्यासाठी रेड चिलीज एंटरटेनमेंटशी संपर्क साधण्यात आला होता. निर्मात्यांनी या प्रक्रियेसाठी सुमारे 12 लाख रुपयांचे बजेट गृहित धरले होते. मात्र, त्यांना तब्बल 42 लाख रुपयांचे अंदाजपत्रक मिळाल्याने चित्रपटाचे प्रदर्शन धोक्यात आले.
या परिस्थितीत चित्रपटाच्या टीमने रेड चिलीज एंटरटेनमेंटकडे आपल्या आर्थिक अडचणीची माहिती दिली. हा मराठी चित्रपट असून बजेट अत्यंत मर्यादित असल्याने मदतीची विनंती करण्यात आली. ही बाब अखेर शाहरुख खान यांच्यापर्यंत पोहोचली. प्रवीण तरडे यांच्या म्हणण्यानुसार, शाहरुख खान यांनी त्यांच्या तांत्रिक टीमकडून चित्रपटाची माहिती घेतली. ‘मुळशी पॅटर्न’ या चित्रपटामुळे त्यांना प्रवीण तरडे यांच्या कामाची माहिती होती. टीमने ‘देऊळ बंद 2’ हा दर्जेदार आणि भावनिक चित्रपट असल्याचे सांगितल्यानंतर शाहरुख खान यांनी तात्काळ निर्णय घेतला.
प्रवीण तरडे यांनी सांगितले की, शाहरुख खान यांनी आपल्या टीमला एकच सूचना दिली होती – “त्यांचे बिल माफ करा. हा मराठी चित्रपट आहे. त्यांना DCP देऊन टाका. पैशांचा विषय नंतर पाहू. चित्रपट चांगला असेल तर त्याला प्राधान्य दिले पाहिजे.” या निर्णयामुळे सुमारे 42 ते 45 लाख रुपयांचा खर्च निर्मात्यांवरून कमी झाला आणि चित्रपट नियोजित वेळेत थिएटरमध्ये प्रदर्शित होऊ शकला.
प्रवीण तरडे यांनी सांगितले की, शाहरुख खान यांनी ही मदत तेव्हा केली, जेव्हा चित्रपट यशस्वी होईल की नाही याची कोणतीही खात्री नव्हती. आज ‘देऊळ बंद 2’ 80 कोटी रुपयांपेक्षा अधिक कमाई करत मराठी चित्रपटसृष्टीतील सर्वाधिक यशस्वी चित्रपटांपैकी एक ठरला आहे. मात्र, त्या वेळी कोणत्याही अपेक्षेशिवाय दिलेली मदत आयुष्यभर विसरणार नसल्याचे तरडे यांनी नमूद केले.
‘देऊळ बंद 2’ हा 2015 मध्ये प्रदर्शित झालेल्या ‘देऊळ बंद’ चित्रपटाचा सीक्वेल आहे. या चित्रपटाचे लेखन आणि दिग्दर्शन प्रवीण तरडे यांनी केले असून स्नेहल तरडे आणि ज्येष्ठ अभिनेते मोहन जोशी यांनी प्रमुख भूमिका साकारल्या आहेत. शेतकरी आत्महत्या, श्रद्धा, अंधश्रद्धा आणि सामाजिक वास्तव यांसारख्या संवेदनशील विषयांवर भाष्य करणाऱ्या या चित्रपटाला प्रेक्षकांचा मोठा प्रतिसाद मिळाला आहे.
चित्रपटाच्या यशामागे अनेकांचे योगदान असल्याचे सांगताना प्रवीण तरडे यांनी शाहरुख खान यांचे विशेष आभार मानले असून, त्यांच्यासाठी ‘देऊळ बंद 2’चा विशेष स्क्रीनिंग आयोजित करण्याची इच्छा देखील व्यक्त केली आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
