Thane Water Cut: ठाण्यात 48 तास पाणीपुरवठा बंद ‘या’ भागातील नागरिकांना पाणी जपून वापरण्याचे आवाहन
Thane Water Cut: ठाण्यात 48 तास पाणीपुरवठा बंद 'या' भागातील नागरिकांना पाणी जपून वापरण्याचे आवाहन
ठाणे महानगरपालिका क्षेत्रातील मुंब्रा, दिवा, कळवा, माजिवडा-मानपाडा आणि वागळे परिसरात 23 ते 25 जून 2026 दरम्यान 48 तास पाणीपुरवठा बंद राहणार आहे. नागरिकांनी पाण्याचा साठा करून काटकसरीने वापर करण्याचे आवाहन करण्यात आले आहे.
पुणे २२ जून २०२६ : ठाणे महानगरपालिका क्षेत्रातील नागरिकांसाठी महत्त्वाची सूचना जारी करण्यात आली आहे. शहरातील अनेक भागांमध्ये तब्बल 48 तास पाणीपुरवठा पूर्णपणे बंद राहणार असल्याची माहिती महानगरपालिकेच्या माहिती व जनसंपर्क विभागाने दिली आहे. मंगळवार, 23 जून 2026 रोजी रात्री 12 वाजल्यापासून गुरुवार, 25 जून 2026 रोजी रात्री 12 वाजेपर्यंत हा शटडाऊन लागू राहणार असून नागरिकांनी पाण्याचा साठा करून त्याचा काटकसरीने वापर करावा, असे आवाहन करण्यात आले आहे.
महापालिकेने दिलेल्या माहितीनुसार, यंदा अल निनो आणि इंडियन ओशन डायपोल (IOD) या जागतिक हवामान घटकांमुळे पावसाळा उशिरा सुरू होण्याची शक्यता व्यक्त करण्यात आली आहे. भविष्यात शहरात पाणीटंचाई निर्माण होऊ नये आणि उपलब्ध जलसाठ्याचे योग्य नियोजन करता यावे यासाठी जलसंपदा विभागासोबत झालेल्या आढावा बैठकीनंतर हा निर्णय घेण्यात आला आहे.
या कालावधीत MIDC बारवी, जांभूळ आणि शहाड जलशुद्धीकरण केंद्रांमधून होणारा पाणीपुरवठा पूर्णपणे बंद ठेवण्यात येणार आहे. त्यामुळे ठाणे शहरातील अनेक भागांमध्ये दोन दिवस नळाला पाणी येणार नाही.
पाणी कपातीचा सर्वाधिक परिणाम दिवा, कळवा आणि मुंब्रा परिसरातील नागरिकांवर होणार आहे. दिवा प्रभाग समितीतील सर्व भाग, कळवा प्रभाग समितीतील सर्व भाग तसेच मुंब्रा प्रभाग समितीतील बहुतांश परिसरात पाणीपुरवठा बंद राहील. मात्र मुंब्र्यातील प्रभाग क्रमांक 26 आणि 31 मधील काही भागांना या बंदचा अपवाद असणार आहे. याशिवाय वागळे प्रभाग समिती अंतर्गत रुपादेवी पाडा, किसननगर क्रमांक 2 आणि नेहरूनगर या भागांमध्येही पाणीपुरवठा बंद राहणार आहे. माजिवडा-मानपाडा प्रभाग समितीतील कोलशेत खालचा गाव परिसरालाही या शटडाऊनचा फटका बसणार आहे.
महापालिकेने नागरिकांना आणखी एक महत्त्वाची सूचना दिली आहे. गुरुवार, 25 जून रोजी रात्री शटडाऊन संपल्यानंतरही लगेच नियमित पाणीपुरवठा सुरू होणार नाही. पुढील एक ते दोन दिवस पाणी कमी दाबाने येण्याची शक्यता असल्याने नागरिकांनी त्यानुसार नियोजन करावे, असे प्रशासनाने स्पष्ट केले आहे.
पाणीपुरवठा बंद राहणार असल्यामुळे नागरिकांनी आवश्यक तेवढा पाण्याचा साठा करून ठेवावा, पिण्याचे पाणी सुरक्षित साठवावे आणि उपलब्ध पाण्याचा अपव्यय टाळावा, असे आवाहन ठाणे महानगरपालिकेने केले आहे. विशेषतः घरगुती वापर, रुग्णालये, व्यावसायिक आस्थापना आणि सोसायट्यांनी पाण्याचे नियोजन करून गैरसोय टाळावी, असेही सांगण्यात आले आहे.
उन्हाळ्यानंतरचा बदलता हवामानाचा अंदाज आणि पावसाळा उशिरा सुरू होण्याची शक्यता लक्षात घेता जलस्रोतांचे नियोजन करण्यासाठी ही उपाययोजना करण्यात आल्याचे प्रशासनाने स्पष्ट केले आहे. त्यामुळे नागरिकांनी प्रशासनाला सहकार्य करत पाण्याचा जबाबदारीने वापर करावा, असे आवाहन करण्यात आले आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
