Pune Rain Alert: सिंहगड, लोणावळा आणि घाटमाथ्यावर हाय-अलर्ट ट्रेकर्ससाठी वन विभागाच्या महत्त्वाच्या सूचना

पुणे वन विभागाने सिंहगड, लोणावळा आणि घाटमाथा परिसरात ट्रेकिंग करणाऱ्या पर्यटकांसाठी महत्त्वाचा इशारा दिला आहे. मुसळधार पावसाच्या पार्श्वभूमीवर 1926 हेल्पलाइनवर संपर्क साधण्याचे आवाहन करण्यात आले आहे.

पुणे ०७ जुलै २०२६ :पावसाळा सुरू होताच पुणे आणि परिसरातील किल्ले, घाटमाथे, धबधबे आणि निसर्गरम्य पर्यटनस्थळांवर पर्यटकांची मोठी गर्दी होत असते. सिंहगड, राजगड, लोणावळा, ताम्हिणी आणि इतर डोंगराळ भागांमध्ये विकेंडला हजारो पर्यटक ट्रेकिंग आणि पर्यटनासाठी पोहोचतात. मात्र यंदाच्या मुसळधार पावसामुळे या पर्यटनस्थळांवरील धोका वाढला असून पुणे वन विभागाने पर्यटकांसाठी महत्त्वाच्या सुरक्षा सूचना जारी केल्या आहेत.

वन विभागाने दिलेल्या माहितीनुसार, सततच्या पावसामुळे दरड कोसळणे, दगड घसरणे, झाडांच्या फांद्या तुटणे तसेच धबधबे, ओढे आणि नाल्यांमधील पाण्याचा प्रवाह अचानक वाढण्याची शक्यता आहे. डोंगराळ भागातील हवामान काही मिनिटांत बदलू शकते. त्यामुळे ट्रेकिंग किंवा पर्यटन करताना विशेष खबरदारी घेणे आवश्यक असल्याचे विभागाने स्पष्ट केले आहे.

वन विभागाने पर्यटकांना धबधबे, ओढे, नाले आणि वेगाने वाहणाऱ्या पाण्यात उतरणे टाळण्याचा सल्ला दिला आहे. तसेच दरडप्रवण, घसरडे आणि कड्यालगतचे धोकादायक भाग टाळावेत, असेही सांगितले आहे. धबधब्यांच्या माथ्यावर जाणे किंवा प्रतिबंधित क्षेत्रात प्रवेश करणे धोकादायक ठरू शकते. पावसाळ्यात केवळ एक सेल्फी किंवा व्हिडिओसाठी जीव धोक्यात घालू नये, असेही आवाहन करण्यात आले आहे.

अतिवृष्टी, दाट धुके किंवा विजांचा कडकडाट सुरू असल्यास ट्रेकिंग किंवा पर्यटन पुढे ढकलावे. वन विभागाने लावलेल्या इशारा फलकांचे पालन करावे आणि कर्मचाऱ्यांच्या सूचनांकडे दुर्लक्ष करू नये. मद्यपान करून पर्यटनस्थळी वावरणे टाळावे, लहान मुलांवर सतत लक्ष ठेवावे आणि वनक्षेत्रात कचरा टाकून पर्यावरणाची हानी होणार नाही याची काळजी घ्यावी. वन्यजीवांना त्रास होईल असे कोणतेही कृत्य टाळण्याचे आवाहनही करण्यात आले आहे.

कोणतीही आपत्कालीन परिस्थिती, अपघात, मार्ग चुकणे, वनाग्नी किंवा वन्यप्राण्यांशी संबंधित घटना घडल्यास वन विभागाच्या 1926 या टोल-फ्री हेल्पलाईनवर तात्काळ संपर्क साधावा, असे आवाहन करण्यात आले आहे. आपत्कालीन मदतीसाठी ही हेल्पलाईन चोवीस तास उपलब्ध असल्याचेही सांगण्यात आले आहे.

उपवनसंरक्षक अभिजित वायकोस यांनी नागरिकांना जबाबदार पर्यटनाचा संदेश दिला आहे. पावसाळा हा निसर्गाचा उत्सव असला तरी सुरक्षिततेला सर्वोच्च प्राधान्य देणे आवश्यक आहे. पर्यटकांनी स्वतःची सुरक्षा, वनक्षेत्रातील नियम आणि पर्यावरण संवर्धनाची जबाबदारी लक्षात घेऊनच पर्यटन करावे, असे त्यांनी म्हटले आहे.

दरम्यान, पुण्यातील खडकवासला धरणातील पाणीसाठा 32 टक्क्यांवर पोहोचला आहे. आगामी काळात पावसाचा जोर कायम राहिल्यास धरणातील पाणीसाठा झपाट्याने वाढण्याची शक्यता आहे. आवश्यकता भासल्यास धरणातून पाण्याचा विसर्ग करण्यात येऊ शकतो. त्यामुळे नदीकाठच्या नागरिकांनी सतर्क राहावे आणि नदीपात्रात उतरणे टाळावे, असे आवाहन प्रशासनाने केले आहे.

Also Read: Pune’s Latest Information
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/

Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare

About The Author

Sayali Memane

Sayali Memane is a Pune-based journalist at NewsDotz, covering Maharashtra news, current affairs, and trending updates. She focuses on clear, factual, and fast digital reporting, delivering reliable news content tailored for modern audiences across platforms.

See author's posts