मुंबई लोकल मेगाब्लॉक १५ नोव्हेंबरला; मध्य आणि हार्बर मार्गावरील गाड्या रद्द
मुंबई लोकल मेगाब्लॉक १५ नोव्हेंबरला; मध्य आणि हार्बर मार्गावरील गाड्या रद्द
मुंबईत १५ नोव्हेंबर रोजी मध्य रेल्वेच्या ठाणे-कल्याण आणि हार्बर मार्गावरील पनवेल-वाशी विभागात मेगाब्लॉक घेण्यात येणार आहे. अनेक लोकल रद्द होणार असून काही गाड्यांचे मार्ग बदलण्यात येतील. संपूर्ण वेळापत्रक जाणून घ्या.
पुणे, १४ नोव्हेंबर २०२६ : मुंबई आणि उपनगरांमध्ये लोकलने प्रवास करणाऱ्या प्रवाशांसाठी महत्त्वाची बातमी आहे. रविवार, १५ नोव्हेंबर रोजी मध्य रेल्वेकडून ठाणे-कल्याण आणि पनवेल-वाशी विभागात मेगाब्लॉक घेण्यात येणार आहे. रेल्वे मार्गांची देखभाल, अभियांत्रिकी कामे आणि सिग्नल यंत्रणेच्या दुरुस्तीसाठी हा ब्लॉक घेण्यात येणार असल्याने मध्य आणि हार्बर मार्गावरील लोकल सेवांच्या वेळापत्रकात बदल होणार आहेत. काही लोकल फेऱ्या रद्द करण्यात येणार असून काही गाड्या पर्यायी मार्गावरून चालवण्यात येतील.
मध्य रेल्वेच्या मुख्य मार्गावर ठाणे ते कल्याण स्थानकांदरम्यान अप आणि डाउन स्लो मार्गावर सकाळी ११ ते दुपारी ४ वाजेपर्यंत मेगाब्लॉक असेल. या कालावधीत मुलुंडहून सकाळी १०.४३ ते दुपारी ३.५३ दरम्यान सुटणाऱ्या डाउन स्लो आणि सेमी फास्ट लोकल फेऱ्या मुलुंड ते कल्याणदरम्यान डाउन फास्ट मार्गावर वळवण्यात येतील. या गाड्यांना ठाणे, कळवा, मुंब्रा, दिवा आणि डोंबिवली या स्थानकांवर थांबा देण्यात येणार आहे.
त्याचप्रमाणे कल्याणहून सकाळी १०.३६ ते दुपारी ३.५१ दरम्यान सुटणाऱ्या अप स्लो आणि सेमी फास्ट लोकल फेऱ्या अप फास्ट मार्गावरून चालवण्यात येतील. या गाड्या डोंबिवली, दिवा, मुंब्रा, कळवा आणि ठाणे येथे थांबतील. ठाणे स्थानकातून सुटणाऱ्या लोकल नियोजित वेळापत्रकानुसार डाउन स्लो मार्गावर धावतील. याशिवाय सकाळी ११ ते सायंकाळी ५ या वेळेत छत्रपती शिवाजी महाराज टर्मिनस येथून सुटणाऱ्या आणि तेथे पोहोचणाऱ्या अप-डाउन स्लो लोकल सुमारे १० मिनिटे उशिराने धावण्याची शक्यता आहे.
हार्बर मार्गावर पनवेल आणि वाशी स्थानकांदरम्यान सकाळी ११.०५ ते दुपारी ४.०५ वाजेपर्यंत अप आणि डाउन मार्गावर मेगाब्लॉक असेल. त्यामुळे पनवेल ते छत्रपती शिवाजी महाराज टर्मिनसदरम्यान सकाळी १०.३३ ते दुपारी ३.४९ या वेळेत धावणाऱ्या लोकल फेऱ्या रद्द करण्यात येणार आहेत. तसेच सीएसएमटी ते बेलापूर आणि पनवेलदरम्यान सकाळी ९.४५ ते दुपारी ३.१२ या कालावधीतील काही लोकल सेवाही बंद राहतील.
ट्रान्स-हार्बर मार्गावरही लोकल सेवांमध्ये बदल करण्यात आले आहेत. पनवेल ते ठाणे या मार्गावरील सकाळी ११.०२ ते दुपारी ३.५३ दरम्यानच्या, तर ठाणे ते पनवेल मार्गावरील सकाळी १०.०१ ते दुपारी ३.२० दरम्यानच्या लोकल फेऱ्या रद्द राहतील. प्रवाशांची गैरसोय कमी करण्यासाठी सीएसएमटी-वाशीदरम्यान विशेष लोकल चालवण्यात येतील. तसेच ठाणे-वाशी आणि ठाणे-नेरुळदरम्यान ट्रान्स-हार्बर सेवा उपलब्ध राहतील. पोर्ट मार्गावरील रेल्वे सेवा नेहमीप्रमाणे सुरू राहणार आहेत.
दरम्यान, पश्चिम रेल्वेकडून १४ आणि १५ नोव्हेंबरच्या मध्यरात्री वसई रोड ते वैतरणा स्थानकांदरम्यान जंबो ब्लॉक घेण्यात येणार आहे. अप फास्ट मार्गावर रात्री ११.५५ ते पहाटे २.५५, तर डाउन फास्ट मार्गावर पहाटे १.३० ते ४.३० या वेळेत हा ब्लॉक असेल. ट्रॅक, सिग्नलिंग आणि ओव्हरहेड उपकरणांच्या देखभालीसाठी ही कामे केली जाणार आहेत. मात्र, रविवारी दिवसा पश्चिम रेल्वेच्या उपनगरीय मार्गावर कोणताही ब्लॉक नियोजित नाही.
त्यामुळे रविवारी प्रवासाचे नियोजन करणाऱ्या प्रवाशांनी घरातून निघण्यापूर्वी संबंधित रेल्वे मार्गाचे वेळापत्रक तपासावे. विशेषतः ठाणे, कल्याण, डोंबिवली, दिवा, वाशी आणि पनवेल मार्गावरील प्रवाशांनी पर्यायी प्रवासाचे नियोजन करावे. रेल्वे प्रशासनाच्या अधिकृत सूचनांनुसार प्रवास केल्यास संभाव्य गैरसोय कमी करता येईल.
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
