Ambernath Accident : भरधाव स्कूल व्हॅनमधून दोन विद्यार्थी पडले, चालकाला कळलेही नाही
अंबरनाथमध्ये भरधाव स्कूल व्हॅनमधून दोन चिमुकले रस्त्यावर पडले
अंबरनाथमध्ये खासगी स्कूल व्हॅनमधून दोन नर्सरी विद्यार्थी रस्त्यावर पडल्याची धक्कादायक घटना. वाहन चालक व केअरटेकरांवर गुन्हा दाखल. काय आहे संपूर्ण प्रकरण?
सायली मेमाणे
अंबरनाथ ८ जुलै २०२५ : अंबरनाथमध्ये भरधाव स्कूल व्हॅनमधून दोन चिमुकले रस्त्यावर पडले, चालकाला कल्पनाही नाही, संतप्त पालकांचा संताप
अंबरनाथ : ठाणे जिल्ह्यातील अंबरनाथ येथे एक धक्कादायक अपघात घडला आहे. खासगी इंग्रजी शाळेच्या भरधाव स्कूल व्हॅनमधून नर्सरीचे दोन विद्यार्थी अचानक रस्त्यावर पडल्याची घटना कल्याण-बदलापूर महामार्गावर सोमवारी दुपारी घडली. या अपघातात चार वर्षांचा ओजस शिनाळकर गंभीर जखमी झाला असून त्याच्या डोक्याला पाच टाके पडले आहेत, तर दुसरा विद्यार्थी किरकोळ जखमी झाला आहे. या घटनेने पालकांमध्ये प्रचंड संताप व्यक्त केला जात आहे.
या व्हॅनमध्ये क्षमतेपेक्षा अधिक म्हणजे सात आसनी व्हॅनमध्ये तब्बल बारा विद्यार्थी व दोन महिला केअरटेकर असल्याने गर्दीचा परिणाम मागच्या दरवाजावर झाला आणि तो अचानक उघडला. दरवाजा उघडताच दोन चिमुरडी रस्त्यावर पडले. धक्कादायक बाब म्हणजे व्हॅन चालवणारा चालक सोलमन सकप्पा याला अपघाताची कल्पनाही नव्हती. एका रिक्षा चालकाने स्थानिक नागरिकांच्या मदतीने तातडीने हस्तक्षेप केला आणि व्हॅनचा पाठलाग करत तिला थांबवले.
घटनेनंतर दोन्ही मुले तातडीने रुग्णालयात दाखल करण्यात आली. या अपघातामुळे वाहन सुरक्षेच्या नियमांकडे शाळा प्रशासन व चालक किती गंभीरतेने बघतात, यावर प्रश्नचिन्ह निर्माण झाले आहे.
अंबरनाथ पोलिसांनी व्हॅन चालक सोलमन सकप्पा आणि दोन महिला केअरटेकर यांच्यावर गुन्हा दाखल केला आहे. पोलिस निरीक्षक किशोर शिंदे यांनी सांगितले की, “या प्रकरणात शाळा प्रशासनाची चूक आढळल्यास त्यांच्यावरही कारवाई केली जाईल.”
अंबरनाथ व कल्याण परिसरात दररोज शेकडो स्कूल व्हॅन विद्यार्थ्यांची वाहतूक करतात. मात्र, अनेक वेळा या वाहतुकीत नियम धाब्यावर बसवले जातात. क्षमतेपेक्षा जास्त विद्यार्थ्यांना व्हॅनमध्ये बसवणे, सुरक्षा उपायांची वानवा आणि अनागोंदी व्यवस्थापनामुळे अशा घटनांना निमंत्रण मिळते.
हा अपघात केवळ एका चालकाच्या बेपर्वाईचा परिणाम नसून संपूर्ण यंत्रणेत सुरक्षेच्या अभावामुळे झाला आहे. पालकांनी आता शासनाकडे अधिक कडक नियमन, सीसीटीव्ही व जीपीएस ट्रॅकिंग, नियमित वाहन तपासणी व स्कूल व्हॅन कर्मचाऱ्यांचे प्रशिक्षण याबाबत ठोस कारवाईची मागणी केली आहे.
या घटनेनंतर संपूर्ण अंबरनाथ परिसरात संतापाचे वातावरण आहे. एक लहानशी चूक दोन चिमुकल्यांच्या जिवावर बेतू शकते हे लक्षात घेता, शासनाने शाळा बस सुरक्षा धोरण कठोरपणे लागू करण्याची गरज निर्माण झाली आहे.
