मुंबई विक्रोळीतील दरड कोसळली: वडील-मुलीचा मृत्यू, आई व मुलगा गंभीर जखमी
मुंबई विक्रोळीतील दरड कोसळली: वडील-मुलीचा मृत्यू, आई व मुलगा गंभीर जखमी
मुंबईच्या विक्रोळी (पश्चिम) जनकल्याण सोसायटी परिसरात शनिवारी पहाटे दरड कोसळून वडील आणि मुलीचा मृत्यू झाला, तर आई व मुलगा गंभीर जखमी आहेत. अपघातातील जखमींवर राजावाडी रुग्णालयात उपचार सुरू आहेत.
सायली मेमाणे
पुणे १६ ऑगस्ट २०२५ : मुंबईतून एक हृदयद्रावक घटना समोर आली आहे. विक्रोळी (पश्चिम) येथील जनकल्याण सोसायटी, वर्षा नगर परिसरात शनिवारी पहाटे दरड कोसळली. डोंगराळ भागात झालेल्या या दुर्घटनेत एका कुटुंबावर मोठे संकट कोसळले. माती आणि दगड घसरून थेट झोपडीवर कोसळले आणि त्यात वडील व मुलीचा जागीच मृत्यू झाला. या दुर्घटनेनंतर परिसरात एकच खळबळ उडाली आहे.
या अपघातात आई आणि मुलगा गंभीर जखमी झाले असून त्यांना तातडीने राजावाडी रुग्णालयात दाखल करण्यात आले आहे. पोलिसांनी घटनास्थळी धाव घेतली आणि स्थानिकांच्या मदतीने बचावकार्य केले. मृतदेह शवविच्छेदनासाठी पाठवण्यात आले असून अपघातस्थळावरील ढिगारा हटवण्याचे काम सुरू आहे.
मुंबईत मान्सूनच्या काळात दरवर्षी डोंगराळ भागांमध्ये दरड कोसळण्याच्या घटना घडतात. विक्रोळी, भांडुप, चेंबूर, कुर्ला या भागांत डोंगरकाठावरील वस्त्यांमध्ये अशा घटना विशेषतः घडतात. महानगरपालिकेने धोका असलेल्या भागातील नागरिकांना वेळोवेळी स्थलांतर करण्याचे आवाहन केलेले असले तरी अनेक कुटुंबे घर सोडायला तयार नसतात. त्यामुळे अशा दुर्घटना टाळता येत नाहीत.
या दुर्घटनेनंतर स्थानिक नागरिकांमध्ये भीतीचे वातावरण निर्माण झाले आहे. दरड कोसळण्याचा धोका अद्याप कायम असल्याने परिसरातील झोपडपट्ट्यांमध्ये राहणाऱ्या लोकांना सुरक्षित ठिकाणी हलविण्याबाबत प्रशासन प्रयत्न करत आहे. पोलिस, अग्निशमन दल आणि महानगरपालिकेचे कर्मचारी घटनास्थळी उपस्थित राहून परिस्थिती नियंत्रणात ठेवण्याचा प्रयत्न करत आहेत.
मुंबईसारख्या महानगरात डोंगरकाठावरील वस्त्या ही मोठी समस्या असून, पावसाळ्यात या वस्त्यांतील लोकांच्या सुरक्षेचा प्रश्न गंभीरपणे उपस्थित होतो. विक्रोळीतील या घटनेनंतर पुन्हा एकदा स्थलांतर, सुरक्षाव्यवस्था आणि पायाभूत सुविधांबाबत चर्चा सुरू झाली आहे. अपघातातील मृतांना श्रद्धांजली वाहून जखमींना लवकर बरे होण्यासाठी प्रार्थना व्यक्त केली जात आहे.
