अमरावतीत स्पर्धा परीक्षेचा अभ्यास करणाऱ्या तरुणावर अॅसिड हल्ला, प्रकृती चिंताजनक
अमरावतीत स्पर्धा परीक्षेचा अभ्यास करणाऱ्या तरुणावर अॅसिड हल्ला, प्रकृती चिंताजनक
अमरावतीत स्पर्धा परीक्षेची तयारी करणाऱ्या अमोल इसाळ या तरुणावर दोन अज्ञात व्यक्तींनी अॅसिड हल्ला केला. मारहाण करून रोकड व मोबाईल लुटल्यानंतर झालेल्या या हल्ल्यात त्याची प्रकृती गंभीर असून हॉस्पिटलमध्ये उपचार सुरू आहेत.
सायली मेमाणे
पुणे १६ ऑगस्ट २०२५ : अमरावती शहरातून एक धक्कादायक घटना समोर आली आहे. स्पर्धा परीक्षेची तयारी करणाऱ्या एका तरुणावर दोन अज्ञात व्यक्तींनी अॅसिड हल्ला केला. या घटनेमुळे संपूर्ण परिसरात खळबळ उडाली असून नागरिकांमध्ये भीतीचे वातावरण निर्माण झाले आहे. पोलिसांनी घटनेची नोंद घेत तपास सुरू केला आहे.
अॅसिड हल्ला झालेल्या तरुणाचे नाव अमोल इसाळ असून तो मूळचा यवतमाळ जिल्ह्यातील बाबुळगावचा रहिवासी आहे. अमोल स्पर्धा परीक्षेच्या अभ्यासासाठी अमरावतीत आला होता. मिळालेल्या माहितीनुसार, दोन अज्ञात व्यक्तींनी त्याला अडवून प्रथम मारहाण केली. त्यानंतर त्याच्याकडील रोकड रक्कम, मोबाईल आणि इतर वस्तू हिसकावून घेतल्या. मारहाणीनंतर आरोपींनी अमोलवर अॅसिड फेकले ज्यामुळे तो गंभीर जखमी झाला.
या घटनेनंतर स्थानिक नागरिकांनी तत्काळ त्याला जवळच्या रुग्णालयात दाखल केले. सध्या अमोलवर उपचार सुरू असून त्याची प्रकृती चिंताजनक असल्याचे डॉक्टरांनी सांगितले आहे. अॅसिडमुळे त्याच्या शरीराचा मोठा भाग भाजला असून वैद्यकीय उपचार तातडीने सुरू करण्यात आले आहेत.
दरम्यान, पोलिसांनी गुन्हा नोंदवून तपासाला सुरुवात केली आहे. आरोपी कोण आहेत आणि हल्ल्याचे नेमके कारण काय होते याबाबत अजून स्पष्ट माहिती समोर आलेली नाही. प्राथमिक तपासात हा प्रकार लूट आणि हल्ल्याचा आहे, मात्र इतर कोणतेही वैयक्तिक कारण असल्याची शक्यता नाकारता येत नाही असे पोलिसांनी सांगितले.
अमरावतीसारख्या शैक्षणिक वातावरणासाठी प्रसिद्ध असलेल्या शहरात घडलेली ही घटना चिंताजनक आहे. अनेक तरुण स्पर्धा परीक्षांसाठी या ठिकाणी वास्तव्य करतात. अशा वातावरणात अॅसिड हल्ल्यासारख्या घटना घडल्याने विद्यार्थ्यांमध्ये भीतीचे वातावरण निर्माण होणे स्वाभाविक आहे.
या हल्ल्यामुळे पुन्हा एकदा अॅसिड विक्री आणि त्यावरील नियंत्रणाबाबत प्रश्नचिन्ह निर्माण झाले आहे. अॅसिड हल्ले रोखण्यासाठी कडक उपाययोजना करण्याची मागणीही नागरिकांमधून केली जात आहे. अमोल इसाळ या तरुणावर हल्ला करणाऱ्यांना तातडीने अटक करून कठोर शिक्षा देण्याची मागणी स्थानिकांनी केली आहे.
