पिंपरी-चिंचवडमध्ये मिरवणुकांमध्ये लेझर व बीम लाईट वापरण्यास बंदी | पोलिसांचा आदेश
पिंपरी-चिंचवडमध्ये मिरवणुकांमध्ये लेझर व बीम लाईट वापरण्यास बंदी | पोलिसांचा आदेश
पिंपरी-चिंचवडमध्ये गणेशोत्सव, ईद-ए-मिलादसह सर्व मिरवणुकांमध्ये लेझर व बीम लाईट वापरण्यावर बंदी घालण्यात आली आहे. पोलिस आयुक्त विनय कुमार चौबे यांनी २५ ऑगस्ट ते २५ सप्टेंबरपर्यंत आदेश लागू केले आहेत.
सायली मेमाणे
पुणे २६ ऑगस्ट २०२५ : पिंपरी-चिंचवडमध्ये सण-उत्सवांच्या पार्श्वभूमीवर महत्त्वाचा निर्णय घेण्यात आला आहे. पोलीस आयुक्त विनय कुमार चौबे यांनी मिरवणुकांमध्ये लेझर लाइट आणि बीम लाईट वापरण्यास तातडीने बंदी घातली आहे. गणेशोत्सव, ईद-ए-मिलाद आणि इतर धार्मिक तसेच सामाजिक मिरवणुका लक्षात घेता हा निर्णय घेण्यात आला असून तो २५ ऑगस्टपासून २५ सप्टेंबरपर्यंत लागू राहणार आहे.
पिंपरी-चिंचवड शहरामध्ये दरवर्षी गणेशोत्सव आणि ईद-ए-मिलादसारख्या मिरवणुकांना मोठी गर्दी होते. मिरवणुकांमध्ये विविध ध्वनीप्रक्षेपक, डीजे, लाईट्स यांचा मोठ्या प्रमाणात वापर होतो. त्यामध्ये गेल्या काही वर्षांपासून लेझर बीम लाईट आणि प्रखर बीम लाइटचा वापर वाढलेला आहे. या लाइटमुळे डोळ्यांना हानी पोहोचण्याचा धोका असतो, तसेच अपघाताची शक्यता देखील निर्माण होते. आरोग्य तसेच सुरक्षेच्या दृष्टीने यावर नियंत्रण आणणे गरजेचे असल्याचे प्रशासनाचे मत आहे.
पोलीस आयुक्तालयाकडून जारी केलेल्या आदेशात स्पष्ट करण्यात आले आहे की, कोणत्याही धार्मिक, सांस्कृतिक किंवा सामाजिक मिरवणुकीत लेझर व बीम लाइटचा वापर आढळल्यास संबंधितांवर कठोर कारवाई केली जाईल. हा निर्णय नागरिकांच्या सुरक्षिततेसाठी तसेच मिरवणुकांची शिस्त राखण्यासाठी महत्त्वाचा ठरणार आहे.
गणेशोत्सव हा महाराष्ट्राचा प्रमुख उत्सव असून पिंपरी-चिंचवडसारख्या औद्योगिक शहरात मोठ्या प्रमाणावर साजरा केला जातो. मंडळांकडून मिरवणुकीत आकर्षक सजावट, डीजे, लाईट शो यांचा वापर केला जातो. मात्र लेझर बीम लाइटमुळे नागरिकांना डोळ्यांचे आजार, डोकेदुखी यांसारखे त्रास होऊ शकतात. याशिवाय प्रखर लाइटमुळे वाहनचालकांनाही अडथळा निर्माण होतो. त्यामुळे नागरिकांच्या आरोग्याचे संरक्षण करण्यासाठी ही बंदी अनिवार्य ठरली आहे.
दरम्यान, पोलीस प्रशासनाने मिरवणुकीत सहभागी होणाऱ्या मंडळांना तसेच आयोजकांना आवाहन केले आहे की त्यांनी आदेशांचे पालन करावे आणि सुरक्षिततेस प्राधान्य द्यावे. शहरात शांती व सुव्यवस्था अबाधित ठेवण्यासाठी नागरिकांनी प्रशासनाला सहकार्य करण्याचे आवाहन करण्यात आले आहे.
ही बंदी केवळ लेझर व बीम लाइटपुरती मर्यादित नसून, ध्वनीप्रदूषण टाळण्यासाठीही विशेष उपाययोजना करण्यात येत आहेत. गेल्या काही वर्षांपासून पर्यावरणपूरक पद्धतीने उत्सव साजरे करण्यावर भर दिला जात आहे. त्यामुळे या निर्णयाला समाजातील विविध घटकांचा पाठिंबा मिळेल, अशी अपेक्षा व्यक्त केली जात आहे.
