पुण्यात भीषण आग: टीव्हीएस सर्व्हिस सेंटरमध्ये 60 दुचाकी गाड्या जळून खाक
पुण्यात भीषण आग: टीव्हीएस सर्व्हिस सेंटरमध्ये 60 दुचाकी गाड्या जळून खाक
पुण्यात बंडगार्डन रोडवरील टीव्हीएस सर्व्हिस सेंटरमध्ये भीषण आग लागली. रात्री उशिरा लागलेल्या या आगीत तब्बल 60 दुचाकी गाड्या जळून खाक झाल्या. सुदैवाने कोणतीही जीवितहानी नाही.
सायली मेमाणे
पुणे २६ ऑगस्ट २०२५ : पुणे शहरात रविवारी रात्री उशिरा एक भीषण आग लागल्याची घटना घडली असून यात तब्बल ६० दुचाकी गाड्या जळून खाक झाल्या आहेत. बंडगार्डन रोडवरील ताराबाग येथील तीन मजली इमारतीच्या खालील मजल्यावर असलेल्या टिव्हीएस सर्व्हिस सेंटरमध्ये रात्री नऊ वाजण्याच्या सुमारास ही आग लागली. परिसरात काही क्षणांतच धुराचे प्रचंड लोट पसरले. अचानक लागलेल्या आगीमुळे स्थानिक नागरिकांमध्ये घबराट निर्माण झाली होती.
आगीची माहिती मिळताच अग्निशमन दलाची तीन गाड्या घटनास्थळी दाखल झाल्या आणि तातडीने आग विझवण्याचे प्रयत्न सुरू केले. अखेर जवानांनी शर्थीचे प्रयत्न करून आग पूर्णपणे नियंत्रणात आणली. सुदैवाने या आगीत कोणतीही जीवितहानी झालेली नाही. मात्र, मोठ्या संख्येने दुचाकी पूर्णपणे जळून खाक झाल्या असून प्राथमिक अंदाजानुसार ६० पेक्षा जास्त दुचाकींचे नुकसान झाले आहे.
स्थानिकांच्या मते, आग इतकी भीषण होती की काही मिनिटांत संपूर्ण सर्व्हिस सेंटर ज्वाळांनी वेढले गेले. या घटनेत इमारतीच्या वरच्या मजल्यांवरही धोका निर्माण होण्याची शक्यता होती. मात्र अग्निशमन दलाच्या तातडीच्या कारवाईमुळे आग पसरू दिली नाही. घटनेनंतर परिसरात मोठ्या प्रमाणावर नागरिकांची गर्दी झाली होती. पोलिसांनी घटनास्थळी धाव घेऊन परिस्थिती नियंत्रणात आणली आणि वाहतूक सुरळीत ठेवण्याचे काम केले.
आगीचे नेमके कारण अद्याप समजू शकलेले नाही. मात्र शॉर्टसर्किटमुळे ही आग लागली असावी, असा प्राथमिक अंदाज व्यक्त केला जात आहे. पोलिस आणि अग्निशमन विभागाने संयुक्त तपास सुरू केला आहे. सर्व्हिस सेंटरमधील मालकानेही नुकसानीबाबत तक्रार नोंदवली असून लाखो रुपयांचे आर्थिक नुकसान झाल्याचे सांगितले जात आहे.
दरम्यान, पुणे शहरात गेल्या काही महिन्यांत अशा प्रकारच्या आग लागण्याच्या घटना वारंवार घडताना दिसत आहेत. औद्योगिक व व्यापारी भागातील सुरक्षिततेच्या दृष्टीने अग्निशमन यंत्रणांची नियमित तपासणी व देखभाल होणे आवश्यक असल्याचे या घटनेतून पुन्हा एकदा अधोरेखित झाले आहे.
या घटनेमुळे परिसरातील रहिवासी व वाहनमालकांमध्ये मोठी चिंता पसरली आहे. आपली वाहने सर्व्हिससाठी ठेवणाऱ्या ग्राहकांचे लाखो रुपयांचे नुकसान झाले आहे. प्रशासनाने तातडीने तपास पूर्ण करून जबाबदारांवर कारवाई करावी आणि अशा घटना टाळण्यासाठी योग्य ती खबरदारी घ्यावी, अशी मागणी नागरिकांनी केली आहे.
