Lalbaugcha Raja 2025: लालबागचा राजा मंडळाला BMC ची नोटीस, अन्नछत्रासाठी परवानगी नाकारली
Lalbaugcha Raja 2025: लालबागचा राजा मंडळाला BMC ची नोटीस, अन्नछत्रासाठी परवानगी नाकारली
मुंबईतील लालबागचा राजा मंडळाने यंदा महाप्रसाद अन्नछत्र सुरू करण्याची योजना आखली होती. मात्र BMC ने सुरक्षेच्या कारणास्तव या उपक्रमाला परवानगी नाकारली असून मंडपालाही नोटीस बजावली आहे.
सायली मेमाणे
पुणे २९ ऑगस्ट २०२५ : मुंबईत गणेशोत्सवाची धामधूम सुरू झाली असून भाविकांची प्रचंड गर्दी पाहायला मिळत आहे. त्यातच मुंबईतील सर्वात प्रसिद्ध असलेल्या लालबागच्या राजाच्या मंडळाने यंदा भाविकांसाठी विशेष अन्नछत्र सुरू करण्याची योजना आखली होती. मात्र या अन्नछत्राला मुंबई महापालिकेने (BMC) परवानगी नाकारली असून मंडप उभारलेल्या ठिकाणी नोटीसही बजावली आहे. त्यामुळे या उपक्रमाला गणेशोत्सवाच्या पहिल्याच दिवशी बंद करावे लागले आहे.
समोर आलेल्या माहितीनुसार, लालबागचा राजा मंडळाने यंदा पहिल्यांदाच दर्शनासाठी येणाऱ्या भाविकांना महाप्रसादाच्या स्वरूपात जेवण देण्याचा निर्णय घेतला होता. भाविकांना तासन्तास रांगेत उभे राहावे लागते, त्यामुळे या सेवेमुळे त्यांचा त्रास काही प्रमाणात कमी होईल अशी अपेक्षा होती. यासाठी मंडळाने पेरू कंपाऊंड परिसरात खास मंडप उभारला होता. मात्र या मंडपाला BMC ने सुरक्षा आणि गर्दीच्या कारणास्तव विरोध दर्शवला.
मुंबई पोलिस आणि अग्निशमन दलाच्या अहवालानंतर BMC ने हा उपक्रम धोकादायक असल्याचे नमूद केले. भाविकांची वाढती संख्या, गर्दीवर नियंत्रण आणि सुरक्षेच्या दृष्टीने अन्नछत्रासाठी परवानगी नाकारल्याचे स्पष्ट करण्यात आले. त्यामुळे लाखो भाविकांसाठी आखण्यात आलेला हा उपक्रम थांबवावा लागला आहे.
दरवर्षीप्रमाणे यंदाही लालबागच्या राजाच्या दर्शनासाठी देशभरातून लाखो भाविक मुंबईत दाखल होत आहेत. पहिल्याच दिवशी भाविकांनी तासन्तास रांगेत उभे राहून राजाचे दर्शन घेतले. काही भाविक नवसासाठी विशेष रांगेत उभे राहतात. अशा वेळी अन्नछत्राची सुविधा सुरू झाल्यास दर्शनासाठी आलेल्या भक्तांना मोठा दिलासा मिळाला असता. मात्र परवानगी नाकारल्यामुळे भाविकांना हा उपक्रम मिळणार नाही.
या निर्णयावर काही भाविकांनी नाराजी व्यक्त केली असली तरी सुरक्षेच्या कारणास्तव BMC आणि प्रशासनाने घेतलेला निर्णय योग्य असल्याचेही अनेकांचे म्हणणे आहे. कारण प्रचंड गर्दीत सुरक्षेची जबाबदारी पार पाडणे हे मोठे आव्हान असते. विशेषतः लालबागच्या राजाच्या मंडळाकडे दरवर्षी कोट्यवधी भाविक दर्शनासाठी गर्दी करतात. त्यामुळे कोणतीही दुर्घटना घडू नये यासाठी प्रशासनाने खबरदारी घेतली आहे.
लालबागचा राजा हे मुंबईतील गणेशोत्सवाचे सर्वात मोठे आकर्षण मानले जाते. या मंडळाच्या गणपतीला “नवसाचा राजा” असेही संबोधले जाते. प्रत्येक वर्षी भाविक आपले नवस फेडण्यासाठी येथे येतात. यावर्षी भाविकांची सोय करण्यासाठी मंडळाने महाप्रसाद वाटप सुरू करण्याचा निर्णय घेतला होता. परंतु सुरक्षेच्या दृष्टीने हा उपक्रम थांबवण्यात आल्याने यंदाचा उत्सव भाविकांना वेगळ्या पद्धतीने अनुभवावा लागणार आहे.
