छत्रपती संभाजीनगरात गोट्या महाराजच्या घरी गांजाची शेती; पोलिसांचा मोठा छापा
छत्रपती संभाजीनगरात गोट्या महाराजच्या घरी गांजाची शेती; पोलिसांचा मोठा छापा
छत्रपती संभाजीनगरात ‘गोट्या महाराज’च्या घरी गांजाची शेती उघड झाली आहे. पोलिसांनी छापा टाकून मोठ्या प्रमाणात गांजा जप्त केला असून एकाला अटक करण्यात आली आहे. मुख्य आरोपी गोट्या महाराज मात्र फरार आहे.
सायली मेमाणे
पुणे १ सप्टेंबर २०२५ : छत्रपती संभाजीनगर जिल्ह्यातील नागरिकांना हादरवून टाकणारी एक धक्कादायक घटना समोर आली आहे. स्वतःला महाराज म्हणून सादर करणाऱ्या व्यक्तीने चक्क आपल्या घरात गांजाची शेती केल्याचे उघड झाले आहे. या प्रकारामुळे जिल्ह्यात प्रचंड खळबळ उडाली असून स्थानिकांमध्ये संताप व्यक्त होत आहे.
मिळालेल्या माहितीनुसार, पोलिसांना ‘गोट्या महाराज’ उर्फ परमेश्वरानंद याच्या घरात गांजाची शेती होत असल्याची गुप्त माहिती मिळाली होती. त्यानंतर विशेष पथकाने तत्काळ छापा टाकून मोठ्या प्रमाणात गांजाचे रोपे तसेच तयार माल जप्त केला. या कारवाईत पोलिसांनी एका आरोपीला अटक केली असून मुख्य संशयित गोट्या महाराज मात्र घटनास्थळावरून पसार झाला आहे.
गोट्या महाराज हे स्थानिकांमध्ये धार्मिक स्वरूप दाखवत स्वतःचे वेगळे व्यक्तिमत्त्व निर्माण करत होते. तथाकथित अध्यात्मिक वेश परिधान करून त्यांनी भक्तांच्या रूपाने काही लोकांना आपल्या जवळ ओढून घेतले होते. मात्र, या मागे अवैध धंद्याचे जाळे सुरू असल्याचे आता स्पष्ट झाले आहे. पोलिसांच्या या कारवाईमुळे अनेक धक्कादायक बाबी उघड होण्याची शक्यता आहे.
गांजाची शेती करणे हा गंभीर गुन्हा असून यासाठी कठोर शिक्षेची तरतूद आहे. छत्रपती संभाजीनगर पोलिसांनी जप्त केलेल्या गांजाचे प्रमाणही मोठे असल्याचे सांगितले जात आहे. सध्या आरोपीकडून चौकशी सुरू असून फरार झालेल्या गोट्या महाराजांचा शोध घेण्यासाठी विशेष पथके रवाना करण्यात आली आहेत.
या घटनेनंतर जिल्ह्यात चर्चांना उधाण आले आहे. धार्मिकतेच्या आडून असे गुन्हे घडत असल्याने लोकांमध्ये अविश्वासाची भावना निर्माण झाली आहे. पोलिस प्रशासनानेही नागरिकांना सतर्क राहण्याचे आवाहन केले आहे. खोट्या अध्यात्मिक व्यक्तींच्या जाळ्यात अडकू नये, तसेच कोणतीही संशयास्पद हालचाल दिसल्यास पोलिसांना माहिती द्यावी, असे आवाहन करण्यात आले आहे.
एकीकडे राज्यात अंमली पदार्थांविरोधात मोठ्या प्रमाणावर मोहिम राबवली जात असताना दुसरीकडे छत्रपती संभाजीनगरात महाराज असल्याचे सोंग घेऊन गांजाची शेती सुरू असल्याचे उघड होणे ही अतिशय चिंताजनक बाब आहे. या घटनेमुळे पोलिसांचा गोट्या महाराज आणि त्याच्या टोळीवर अधिक बारीक लक्ष केंद्रीत होण्याची शक्यता आहे.
सध्या पोलिसांनी या प्रकरणाचा तपास जलद गतीने सुरू केला आहे. मुख्य आरोपी गोट्या महाराज उर्फ परमेश्वरानंद लवकरच कायद्याच्या कचाट्यात सापडेल, असा विश्वास पोलिसांनी व्यक्त केला आहे. या कारवाईमुळे जिल्ह्यातील अवैध धंद्यांवर आळा घालण्यासाठी प्रशासनाची ठोस भूमिका अधोरेखित झाली आहे.
