वसईत गणपतीत तृतीयपंथीयांचा अश्लील नृत्य व्हायरल; आयोजकांवर गुन्हा दाखल
वसईत गणपतीत तृतीयपंथीयांचा अश्लील नृत्य व्हायरल; आयोजकांवर गुन्हा दाखल
वसईतील गणपती मंडळासमोर तृतीयपंथीयांनी केलेल्या अश्लील नृत्याचा व्हिडिओ व्हायरल. धार्मिक भावना दुखावल्याप्रकरणी आयोजक व सहा तृतीयपंथीयांवर गुन्हा दाखल.
सायली मेमाणे
पुणे ४ सप्टेंबर २०२५ : वसई परिसरात गणेशोत्सवाच्या उत्साहात एक धक्कादायक प्रकार समोर आला आहे. वसई पूर्व चिंचोटी करमाळपाडा येथे बजरंग मित्र मंडळाच्या गणपतीसमोर तृतीयपंथीयांकडून करण्यात आलेल्या अश्लील नृत्याचा व्हिडिओ सोशल मीडियावर प्रचंड व्हायरल झाला आहे. या नृत्यात “चहल जवानी” या गाण्यावर आक्षेपार्ह हावभाव करून नृत्य केल्याचे स्पष्ट दिसत असून, हा प्रकार स्थानिकांमध्ये आणि सामाजिक माध्यमांवर मोठ्या प्रमाणात चर्चेचा विषय ठरत आहे. धार्मिक वातावरणात आणि सार्वजनिक गणपती मंडळाच्या ठिकाणी अशा प्रकारचा डान्स केल्याने अनेक नागरिकांनी तीव्र नाराजी व्यक्त केली आहे.
या घटनेनंतर नायगाव पोलीस ठाण्यात तक्रार नोंदवण्यात आली असून धार्मिक भावना दुखावल्या प्रकरणी आयोजकांसह तृतीयपंथीयांविरोधात गुन्हा दाखल करण्यात आला आहे. पोलिसांनी दिलेल्या माहितीनुसार आयोजकांपैकी संजयकुमार शाहू आणि मुरारी मिश्रा यांच्यासह एकूण सहा तृतीयपंथीयांविरुद्ध कलमांनुसार गुन्हा दाखल झाला आहे. पोलीस या संपूर्ण प्रकरणाची चौकशी करत असून संबंधित व्हिडिओ पुरावा म्हणून जप्त करण्यात आला आहे.
वसईतील हा प्रकार समोर आल्यानंतर परिसरात चर्चा रंगली आहे. गणेशोत्सव हा सांस्कृतिक आणि धार्मिक दृष्ट्या महत्त्वाचा सोहळा असताना, अशा प्रकारचे आक्षेपार्ह कार्यक्रम केल्यामुळे समाजातील विविध घटकांमध्ये नाराजी व्यक्त होत आहे. गणेशोत्सवाच्या काळात मनोरंजनासाठी पारंपरिक सांस्कृतिक कार्यक्रम केले जात असले तरी या वर्षीच्या घटनेने आयोजकांवर मोठा प्रश्नचिन्ह निर्माण केले आहे. पोलिसांच्या कारवाईनंतर नागरिकांनी कायदेशीर पावले उचलल्याबद्दल समाधान व्यक्त केले असून, पुढील काळात अशा प्रकारच्या घटना घडू नयेत अशी अपेक्षा केली जात आहे.
दरम्यान, सोशल मीडियावरही या व्हिडिओला प्रचंड प्रतिसाद मिळत आहे. काही जणांनी याला आयोजकांची बेपर्वाई म्हटले आहे तर काहींनी धार्मिक भावना दुखावल्या जात असल्याचे सांगितले आहे. प्रशासनाने कठोर पावले उचलावीत अशी मागणी होत असून यामुळे गणेशोत्सवाच्या वातावरणात निर्माण झालेली वादाची छाया अधिकच गडद झाली आहे.
या घटनेने पुन्हा एकदा सार्वजनिक सोहळ्यांच्या आयोजनात जबाबदारी आणि सामाजिक संवेदनशीलतेची गरज अधोरेखित केली आहे. उत्सव हा आनंद, एकता आणि श्रद्धेचा प्रतीक असला तरी अशा घटनांमुळे उत्सवाची पवित्रता धोक्यात येत असल्याचे स्पष्ट झाले आहे. पोलिसांचा पुढील तपास या प्रकरणाला कोणता वळण देतो हे पाहणे महत्त्वाचे ठरेल.
