पुण्यात भिडे पूल आजपासून बंद; नागरिकांसाठी पर्यायी मार्गांची माहिती
पुण्यात भिडे पूल आजपासून बंद; नागरिकांसाठी पर्यायी मार्गांची माहिती
डेक्कनजवळील भिडे पूल पादचारी पुलाच्या कामासाठी बंद. वाहतुकीसाठी संभाजी, महर्षी शिंदे आणि काकासाहेब गाडगीळ पूल वापरावा, असे महामेट्रोकडून आवाहन.
सायली मेमाणे
पुणे १० सप्टेंबर २०२५ : पुणेकरांसाठी महत्त्वाची वाहतुकीची माहिती समोर आली आहे. डेक्कन जिमखाना मेट्रो स्टेशनजवळ नदीवर उभारल्या जाणाऱ्या नव्या पादचारी पुलाच्या कामासाठी भिडे पूल आजपासून म्हणजेच १० सप्टेंबरपासून वाहतुकीसाठी बंद करण्यात आला आहे. महामेट्रो प्रशासनाने याबाबत सूचना जारी करत पुणेकरांना पर्यायी मार्गांचा वापर करण्याचे आवाहन केले आहे.
गणेशोत्सव काळात गर्दीचा विचार करून हे काम तात्पुरते थांबवण्यात आले होते आणि पुलावरील वाहतूक पुन्हा सुरू करण्यात आली होती. परंतु आता पादचारी पुलाच्या कामाला गती देण्यासाठी भिडे पूल पूर्णतः बंद ठेवण्याचा निर्णय घेण्यात आला आहे. त्यामुळे रोजच्या प्रवासात भिडे पूल वापरणाऱ्या वाहनचालकांना काही दिवस पर्यायी मार्गांचा आधार घ्यावा लागणार आहे.
महामेट्रोकडून सांगण्यात आले आहे की, वाहतुकीसाठी नदीपात्रातील रस्ता खुला राहणार आहे. याशिवाय नागरिकांनी संभाजी पूल, महर्षी विठ्ठल रामजी शिंदे पूल आणि काकासाहेब गाडगीळ पूल या पर्यायी मार्गांचा वापर करावा. पुणेकरांनी या बदलांना सहकार्य करून काम सुरळीत होण्यासाठी मदत करावी, असे आवाहन करण्यात आले आहे.
पादचारी पुलाचे हे काम मेट्रो प्रकल्पाशी थेट संबंधित असल्याने ते लवकरात लवकर पूर्ण करणे आवश्यक आहे. डेक्कन परिसरातील वाहतूक आधीच गजबजलेली असते. भिडे पूल बंद झाल्यामुळे काही दिवस वाहनचालकांना अडचणींचा सामना करावा लागणार आहे. मात्र प्रकल्पाच्या दृष्टीने हे काम अनिवार्य असल्याने प्रशासनाने संयम ठेवण्याचे आवाहन केले आहे.
पुण्यातील मेट्रो प्रकल्पामुळे नागरिकांच्या प्रवासाचा वेळ वाचणार असून सोयीसुविधाही वाढणार आहेत. पादचारी पूल उभारल्याने डेक्कन परिसरातील पायी चालणाऱ्यांना मोठी सोय होईल. त्यामुळे काही काळाचा त्रास सहन केल्यावर नागरिकांना दीर्घकालीन फायदा मिळणार आहे.
महामेट्रोने स्पष्ट केले आहे की, कामाच्या कालावधीत नागरिकांना पर्यायी मार्गांवर कोणतीही अडचण होऊ नये यासाठी सर्व आवश्यक व्यवस्था केली जाणार आहे. विशेषतः सकाळी व संध्याकाळी गर्दीच्या वेळेत वाहतुकीवर अधिक लक्ष दिले जाईल. पुणेकरांनी या काळात आपल्या प्रवासाची आखणी करताना अतिरिक्त वेळ गृहीत धरावा आणि गर्दी टाळण्यासाठी शक्य असल्यास सार्वजनिक वाहतुकीचा अधिक वापर करावा.
भिडे पूल पुण्यातील एक महत्त्वाचा दुवा असून, दररोज हजारो वाहनचालक या पुलाचा वापर करतात. त्यामुळे पुल बंद ठेवण्याचा निर्णय प्रशासनासाठी सोपा नव्हता. परंतु प्रकल्पाच्या यशस्वी पूर्णतेसाठी हा उपाय आवश्यक असल्याचे स्पष्ट करण्यात आले आहे.
काही दिवसांच्या गैरसोयींनंतर पुणेकरांना एक आधुनिक सुविधा उपलब्ध होणार आहे. त्यामुळे या काळात नागरिकांनी संयम बाळगून पर्यायी पूलांचा वापर करावा, असा संदेश प्रशासनाकडून पुन्हा एकदा देण्यात आला आहे.
