३० सप्टेंबरपर्यंत वाढली ITR भरण्याची तारीख? आयकर विभागाने व्हायरल सोशल मीडिया दाव्यावर दिलं स्पष्टीकरण
३० सप्टेंबरपर्यंत वाढली ITR भरण्याची तारीख? आयकर विभागाने व्हायरल सोशल मीडिया दाव्यावर दिलं स्पष्टीकरण
सोशल मीडियावर १५ सप्टेंबरवरून ३० सप्टेंबरपर्यंत आयकर परतावा (ITR) भरण्याची अंतिम तारीख वाढवल्याचे दावे व्हायरल झाले आहेत. त्यामुळे करदात्यांमध्ये संभ्रम पसरला असून, आयकर विभागाने यावर अधिकृत स्पष्टीकरण दिलं आहे.
सायली मेमाणे
पुणे १५ सप्टेंबर २०२५ : देशभरातील कोट्यवधी करदाते आयकर परतावा (ITR) भरण्याची अंतिम तारीख लक्षात ठेवून सज्ज झाले आहेत. १५ सप्टेंबर ही ITR भरण्याची शेवटची तारीख घोषित करण्यात आली होती. मात्र, सोशल मीडियावर एक व्हायरल दावा मोठ्या प्रमाणावर पसरत आहे, ज्यामध्ये आयकर विभागाने ही अंतिम मुदत ३० सप्टेंबरपर्यंत वाढवल्याचे सांगण्यात येत आहे. हा दावा पाहून अनेक करदात्यांमध्ये संभ्रमाचे वातावरण निर्माण झाले आहे. अनेकांनी आपल्या आयकर परताव्याची प्रक्रिया थांबवून ठेवली आहे, कारण ते या बातमीची पुष्टी शोधत आहेत.
या दाव्याला व्यापक प्रतिसाद मिळाला असून ट्विटर, फेसबुक आणि व्हॉट्सअॅप ग्रुप्सवर हा संदेश वेगाने पसरत आहे. काही ठिकाणी तर कर सल्लागार आणि अकाउंटंट्सनाही त्यांच्या ग्राहकांकडून चौकशा येऊ लागल्या आहेत. “३० सप्टेंबरपर्यंत वेळ आहे का?” या प्रश्नाने लाखो लोकांच्या मनात संभ्रम निर्माण केला आहे.
आयकर विभागाने मात्र स्पष्ट केले आहे की, सोशल मीडियावर फिरणारा हा दावा दिशाभूल करणारा आहे. विभागाने कोणतीही अधिकृत अधिसूचना जारी केलेली नाही. १५ सप्टेंबर ही अंतिम तारीख कायम आहे आणि ती वाढवलेली नाही, असे विभागाने कळवले आहे. त्यामुळे करदात्यांनी तात्काळ आपले परतावे भरावेत, अन्यथा विलंब झाल्यास दंड आणि व्याज आकारले जाण्याची शक्यता आहे.
करतज्ज्ञांचे म्हणणे आहे की, दरवर्षी आयकर भरण्याच्या अंतिम तारखेच्या सुमारास अशा अफवा पसरवल्या जातात. यामुळे अनेक लोक शेवटच्या क्षणापर्यंत वाट पाहतात आणि मग सर्व्हरवर ताण वाढतो. अशा चुकीच्या माहितीमुळे करदात्यांचे मोठे नुकसान होऊ शकते. त्यामुळे नागरिकांनी फक्त आयकर विभागाच्या अधिकृत संकेतस्थळावर किंवा अधिकृत सोशल मीडिया अकाउंटवरूनच माहिती घ्यावी, असा सल्ला दिला जात आहे.
सध्या देशात लाखो लोकांनी अद्याप आपले ITR भरलेले नाही. काही तांत्रिक कारणांमुळे आणि कागदपत्रे उपलब्ध नसल्याने अनेकांनी शेवटच्या दिवसापर्यंत वाट पाहिली होती. मात्र, आता चुकीच्या माहितीमुळे आणखी गोंधळ निर्माण झाला आहे. कर सल्लागारांचे म्हणणे आहे की, जर वेळेत ITR दाखल केले नाही तर दंड आणि व्याजाशिवाय कर्ज मिळविण्यातही अडचणी येऊ शकतात.
आयकर विभागाने सर्व करदात्यांना सतर्क राहण्याचे आवाहन केले आहे. त्यांनी सांगितले आहे की, सोशल मीडियावरील अफवा किंवा बनावट नोटीसांवर विश्वास ठेवू नये. फक्त अधिकृत अधिसूचना किंवा वेबसाइटवरची माहिती ग्राह्य धरावी.
येत्या काही दिवसांत अंतिम तारखेपूर्वी मोठ्या प्रमाणावर आयकर भरण्याची शक्यता आहे. विभागाकडून अतिरिक्त तांत्रिक सुविधा पुरवण्यात आल्या असून, सर्व्हर कार्यक्षम ठेवण्यासाठीही उपाययोजना केल्या आहेत. करदात्यांनी मात्र विलंब न करता शक्य तितक्या लवकर ITR दाखल करावा, हा तज्ज्ञांचा सल्ला आहे.
