मस्जिद बंदर रेल्वे स्थानकाजवळ अवैध कबुतरखाना; प्रवाशांचा त्रास वाढला
मस्जिद बंदर रेल्वे स्थानकाजवळ अवैध कबुतरखाना; प्रवाशांचा त्रास वाढला
मुंबईतील मस्जिद बंदर रेल्वे स्थानकाजवळ नवा अवैध कबुतरखाना सुरू झाला आहे. प्रवासी आणि व्यापाऱ्यांकडून खाद्य टाकल्याने कबुतरांची संख्या वाढली असून स्वच्छतेचा प्रश्न गंभीर बनला आहे. महापालिका कोणती कारवाई करणार याकडे लक्ष.
सायली मेमाणे
पुणे १८ सप्टेंबर २०२५ : मुंबई शहरातील कबुतरखान्यांचा प्रश्न दिवसेंदिवस गंभीर होत चालला आहे. ताज्या माहितीनुसार, मस्जिद बंदर रेल्वे स्थानकाजवळ नवा अवैध कबुतरखाना उभारण्यात आल्याचे समोर आले आहे. स्थानकातून प्रवास करणारे प्रवासी तसेच आसपासचे व्यापारी मोठ्या प्रमाणावर कबुतरांना खाद्य आणि दाणे टाकत आहेत. त्यामुळे कबुतरांची संख्या झपाट्याने वाढू लागली आहे. या वाढत्या संख्येमुळे परिसरात अस्वच्छता वाढत असून प्रवाशांच्या आरोग्यावरही गंभीर परिणाम होण्याची शक्यता निर्माण झाली आहे.
आज सकाळी स्थानकालगत असलेल्या दुकानांच्या छतावर कबुतरांना खाद्य टाकण्याचे प्रकार उघडपणे दिसून आले. अनेक व्यापारी आपल्याकडील अन्नधान्याचे अवशेष तसेच दाणे कबुतरांना टाकत आहेत. प्रवाशांपैकी काही जण सुद्धा दयाभावाने कबुतरांना खाद्य घालतात. मात्र या कृतीमुळे संपूर्ण परिसरात कबुतरांचे थवे जमले असून रेल्वे स्थानकातील प्रवाशांना प्रवास करताना सतत त्रास सहन करावा लागत आहे.
कबुतरांची विष्ठा, पिसे आणि दुर्गंधी यामुळे परिसर अस्वच्छ होतो. यामुळे श्वसनाचे आजार, अॅलर्जी तसेच डोळ्यांचे आजार होण्याची शक्यता वाढते. तज्ज्ञांच्या मते, कबुतरांची वाढलेली संख्या ही आरोग्यदायी वातावरणासाठी धोकादायक ठरू शकते. विशेषतः रेल्वे स्थानकातून रोज प्रवास करणाऱ्या हजारो प्रवाशांच्या आरोग्यासाठी ही परिस्थिती धोक्याची घंटा ठरत आहे.
महापालिकेने यापूर्वी शहरातील कबुतरखाने हटवण्यासाठी काही मोहिमा हाती घेतल्या होत्या. तथापि, नागरिकांच्या सहकार्याअभावी या मोहिमा फारशा यशस्वी ठरल्या नाहीत. मस्जिद बंदर परिसरातील नवा अवैध कबुतरखाना हा पुन्हा एकदा महापालिकेच्या कारवाईवर प्रश्नचिन्ह निर्माण करणारा प्रकार ठरत आहे. याबाबत महापालिका प्रशासनाकडे तक्रारी दाखल झाल्या आहेत, मात्र अद्याप ठोस कारवाई झालेली नाही.
रेल्वे स्थानकाजवळील प्रवासी संघटना आणि स्थानिक नागरिक संघटनांनी या प्रकाराला तीव्र विरोध दर्शवला आहे. प्रवाशांच्या सुरक्षिततेसाठी आणि आरोग्यासाठी तातडीने उपाययोजना करण्यात याव्यात अशी मागणी करण्यात येत आहे. कबुतरांना खाद्य टाकणाऱ्या प्रवासी आणि व्यापाऱ्यांवर दंडात्मक कारवाई करण्यात यावी तसेच कबुतरखाना त्वरित हटवावा, अशी मागणी जोर धरू लागली आहे.
दरम्यान, कबुतरांना खाद्य टाकणे हा धार्मिक भावनांशी संबंधित असल्याचे काहींचे मत आहे. मात्र सार्वजनिक ठिकाणी अशा प्रकारे कबुतरांना खाद्य देणे ही इतरांच्या आरोग्याशी खेळ करणारी कृती असल्याचेही अनेकांचा आग्रह आहे. महापालिकेने याबाबत जनजागृती मोहीम राबवून नागरिकांना जबाबदार वर्तन करण्याचे आवाहन करणे आवश्यक असल्याचे तज्ज्ञ सांगतात.
आता महापालिका प्रशासन या अवैध कबुतरखान्याबाबत कोणती पावले उचलते याकडे सर्वांचे लक्ष लागले आहे. प्रवासी आणि स्थानिक नागरिक यांचा त्रास कमी करण्यासाठी ठोस कारवाई होणे गरजेचे आहे. अन्यथा या प्रकारामुळे सार्वजनिक आरोग्य आणि स्वच्छतेवर गंभीर परिणाम होण्याची शक्यता आहे.
