Thane Viviana Mall चे नाव बदलले; आता ओळखले जाईल ‘Lake Shore’ म्हणून
Thane Viviana Mall चे नाव बदलले; आता ओळखले जाईल ‘Lake Shore’ म्हणून
Thane News: ठाण्यातील प्रसिद्ध Viviana Mall चे नाव बदलून ‘Lake Shore’ करण्यात आले. 1,900 कोटींच्या ऐतिहासिक करारानंतर हा मॉल ठाण्याच्या वाढत्या व्यावसायिक आणि रिटेल ओळखीचे प्रतीक ठरत आहे.
सायली मेमाणे
पुणे २२ सप्टेंबर २०२५ : Thane News: ठाणे शहराच्या मध्यभागी असलेल्या नामांकित विव्हियाना मॉलचे (Viviana Mall) नाव अधिकृतपणे बदलण्यात आले असून, आता हा मॉल ‘लेक शोर’ या नावाने ओळखला जाणार आहे. ‘लेक शोर इंडिया ॲडव्हायझरी’ने विव्हियाना मॉल विकत घेतल्याने हा बदल घडला आहे. अबू धाबी इन्व्हेस्टमेंट अथॉरिटीच्या (ADIA) पाठिंब्याने झालेला हा करार जवळपास 1,900 कोटी रुपयांचा आहे. भारतातील कोणत्याही रिटेल मालमत्तेसाठी झालेला हा आतापर्यंतचा सर्वात मोठा करार मानला जात असून, ठाण्याच्या महत्त्वात आणखी भर टाकणारा ठरला आहे.
यापूर्वी विव्हियाना मॉलची मालकी सिंगापूरच्या ‘जीआयसी’ आणि ‘अश्विन शेठ ग्रुप’कडे होती. मात्र आता मालकी हस्तांतरित झाल्यामुळे या लोकप्रिय शॉपिंग सेंटरच्या प्रवासात एक नवे पर्व सुरू झाले आहे. ठाणे वेगाने व्यावसायिक, निवासी आणि रिटेल हब म्हणून विकसित होत असून, उत्तम कनेक्टिव्हिटी, प्रीमियम हाऊसिंग प्रोजेक्ट्स आणि वाढती शहरी लोकसंख्या यामुळे या परिसरात मोठ्या प्रमाणात गुंतवणुकीस पोषक वातावरण तयार झाले आहे. त्यामुळेच लेक शोरसारख्या मोठ्या रिटेल डेस्टिनेशनसाठी ठाणे एक आदर्श ठिकाण ठरत आहे.
1,900 कोटी रुपयांचा हा ऐतिहासिक करार भारतीय रिअल इस्टेट आणि रिटेल क्षेत्रासाठी मैलाचा दगड मानला जात आहे. या करारामुळे ठाण्याला भविष्यातील व्यावसायिक गुंतवणूक, रोजगार निर्मिती आणि ग्राहकांसाठी अत्याधुनिक सुविधा मिळण्याचा मार्ग मोकळा होईल. ठाणे शहर मुंबई महानगर प्रदेशातील एक महत्त्वाचे केंद्र म्हणून आधीच ओळखले जाते आणि आता लेक शोर मॉलमुळे त्याची रिटेल डेस्टिनेशन म्हणून ओळख आणखी बळकट होणार आहे.
ग्राहकांच्या दृष्टीने मॉलचे नाव आणि मालकी बदलली असली तरी शॉपिंग आणि मनोरंजन अनुभवामध्ये कोणताही तडजोड होणार नाही. आधीपासूनच येथे असलेले जागतिक व भारतीय ब्रँड्स कायम राहतील. तसेच ग्राहकांना अत्याधुनिक अनुभव, आंतरराष्ट्रीय दर्जाच्या सेवा आणि कुटुंबांसाठी आकर्षक सुविधा उपलब्ध करून देण्याचे वचन कायम राहील. त्यामुळे ग्राहकांसाठी हा बदल फक्त नावापुरता असेल, मात्र मॉलच्या गुणवत्तेमध्ये कोणतीही घसरण होणार नाही.
ठाण्यातील विव्हियाना मॉलचा ‘लेक शोर’मध्ये झालेला हा बदल स्थानिक नागरिकांसाठी आणि व्यवसाय क्षेत्रासाठी मोठे महत्त्व राखतो. एकीकडे ठाण्याचे आधुनिक शहरीकरण अधोरेखित होते तर दुसरीकडे भारतीय रिटेल क्षेत्रातील गुंतवणुकीसाठी हे शहर किती आकर्षक बनले आहे हे स्पष्ट होते.
