Ahmedabad Plane Crash: विमान दुर्घटनेतील खरे कारण लपवले? सुप्रीम कोर्टात याचिका दाखल
Ahmedabad Plane Crash: विमान दुर्घटनेतील खरे कारण लपवले? सुप्रीम कोर्टात याचिका दाखल
अहमदाबाद एअर इंडिया विमान अपघातात २६० जणांचा मृत्यू; चौकशीत खरे कारण लपवले जात असल्याचा आरोप, सुप्रीम कोर्टात जनहित याचिका दाखल.
सायली मेमाणे
पुणे २१ सप्टेंबर २०२५ : अहमदाबाद विमान दुर्घटनेतून अजूनही देश हादरलेला असताना या प्रकरणात एक नवा वळण समोर आला आहे. १२ जून रोजी लंडनला जाणारे एअर इंडियाचे विमान सरदार वल्लभभाई पटेल आंतरराष्ट्रीय विमानतळावरून उड्डाण घेतल्यानंतर काही मिनिटांतच कोसळले होते. या भीषण अपघातात २४१ प्रवासी आणि जमिनीवरचे काही नागरिक मिळून एकूण २६० जणांचा दुर्दैवी मृत्यू झाला. देशभरातून या दुर्घटनेबाबत तीव्र शोक व्यक्त करण्यात आला होता.
मात्र आता या प्रकरणातील चौकशीवर प्रश्नचिन्ह उपस्थित केले जात आहे. या दुर्घटनेची चौकशी योग्य प्रकारे होत नसल्याचा आणि काही महत्त्वाची माहिती दडपली जात असल्याचा आरोप करण्यात आला आहे. यासंदर्भात थेट सर्वोच्च न्यायालयात जनहित याचिका दाखल करण्यात आली असून यामुळे या प्रकरणाला नवे वळण मिळाले आहे. याचिकाकर्त्याने आपल्या निवेदनात म्हटले आहे की, विमान दुर्घटनेमागचे खरे कारण स्पष्टपणे सांगितले गेलेले नाही. चौकशीत अनेक महत्त्वाचे मुद्दे दुर्लक्षिले गेले आहेत, ज्यामुळे प्रवासी आणि मृतांच्या कुटुंबियांना खरी माहिती मिळत नाही.
विमान दुर्घटनेनंतर सरकारकडून आणि विमान वाहतूक मंत्रालयाकडून तत्काळ चौकशी समिती नेमण्यात आली होती. प्राथमिक चौकशीत तांत्रिक बिघाड हा अपघाताचा संभाव्य कारण म्हणून नमूद करण्यात आला होता. मात्र आता अनेक विमानतज्ज्ञ आणि कायदेशीर तज्ज्ञ या निष्कर्षावर समाधानी नाहीत. त्यांचा आरोप आहे की चौकशीत ढिलाई केली जात आहे आणि प्रवाशांच्या सुरक्षिततेशी खेळ केला जात आहे.
सर्वोच्च न्यायालयात दाखल झालेल्या या याचिकेत दुर्घटनेची चौकशी सर्वोच्च स्तरावर स्वतंत्र तज्ज्ञ समितीकडून करण्याची मागणी करण्यात आली आहे. तसेच विमान कंपन्या आणि विमानतळ प्रशासन यांच्या जबाबदाऱ्यांचा पुनर्विचार करून भविष्यात अशा घटना टाळण्यासाठी कडक नियमावली तयार करण्याचीही मागणी करण्यात आली आहे.
दरम्यान, या प्रकरणात मृतांच्या कुटुंबीयांनी देखील मोठ्या प्रमाणावर असंतोष व्यक्त केला आहे. त्यांच्या मते, अपघातानंतर भरपाईच्या घोषणा झाल्या तरी त्या प्रत्यक्षात पोहोचलेल्या नाहीत. याशिवाय, अपघाताच्या मूळ कारणांबाबत अजूनही पारदर्शक माहिती उपलब्ध नसल्याने त्यांचा संताप अधिक वाढला आहे.
विमान अपघातासारख्या घटनांमुळे प्रवाशांच्या सुरक्षिततेचा मुद्दा पुन्हा एकदा चर्चेत आला आहे. भारतातील नागरी विमान वाहतूक क्षेत्र झपाट्याने विकसित होत असले तरी सुरक्षा व्यवस्थेतील त्रुटींवर गंभीर प्रश्न उपस्थित होत आहेत. या घटनेच्या पार्श्वभूमीवर देशातील विमान सुरक्षा मानके अधिक काटेकोर करण्याची गरज असल्याचे तज्ज्ञांनी मत व्यक्त केले आहे.
या याचिकेवर सर्वोच्च न्यायालयात पुढील काही दिवसांत सुनावणी होणार असून देशभरातील नागरिकांचे लक्ष आता या खटल्याकडे लागले आहे. या सुनावणीदरम्यान विमान अपघातामागचे खरे कारण आणि प्रशासनाची जबाबदारी याबाबत अधिक स्पष्टता येईल अशी अपेक्षा व्यक्त केली जात आहे.
