Ajit Pawar Death: राज्याचा अर्थसंकल्प कोण सादर करणार? ‘या’ तीन नेत्यांची नावं चर्चेत
Ajit Pawar Death: राज्याचा अर्थसंकल्प कोण सादर करणार? ‘या’ तीन नेत्यांची नावं चर्चेत
Ajit Pawar यांच्या निधनानंतर महाराष्ट्राचा आगामी अर्थसंकल्प कोण मांडणार, याबाबत मोठी चर्चा. देवेंद्र फडणवीस, जयंत पाटील आणि सुधीर मुनगंटीवार यांच्या नावांची चर्चा.
पुणे २८ जानेवारी २०२६ : महाराष्ट्राचे उपमुख्यमंत्री आणि अर्थमंत्री अजित पवार यांच्या अपघाती निधनाने राज्यासह देशभरात शोककळा पसरली आहे. बारामतीत त्यांच्या अंत्यसंस्कारासाठी उसळलेला जनसागर हे त्यांच्या राजकीय आणि प्रशासकीय प्रभावाचे प्रतीक मानले जात आहे. मात्र या दुःखद घटनेनंतर राज्याच्या प्रशासनासमोर एक महत्त्वाचे आव्हान उभे राहिले आहे, ते म्हणजे महाराष्ट्राचा आगामी अर्थसंकल्प कोण सादर करणार, हा प्रश्न.
येत्या 23 फेब्रुवारीपासून महाराष्ट्र विधिमंडळाचे अर्थसंकल्पीय अधिवेशन सुरू होणार आहे. महाराष्ट्र हे देशातील आर्थिकदृष्ट्या सर्वात महत्त्वाचे राज्य मानले जाते. त्यामुळे राज्याचा अर्थसंकल्प सादर करणे ही केवळ औपचारिक बाब नसून, राज्याच्या आर्थिक धोरणांची दिशा ठरवणारी महत्त्वाची प्रक्रिया आहे. अजित पवार यांनी गेल्या अनेक वर्षांत अर्थमंत्री म्हणून बजेटची जबाबदारी अत्यंत प्रभावीपणे सांभाळली होती. त्यांच्या अचानक जाण्यामुळे ही जबाबदारी आता कोण पार पाडणार, यावर चर्चा सुरू झाली आहे.
सध्याच्या राजकीय परिस्थितीत तीन अनुभवी नेत्यांची नावं चर्चेत आहेत. मुख्यमंत्री देवेंद्र फडणवीस, राष्ट्रवादी काँग्रेस (शरद पवार गट) चे माजी प्रदेशाध्यक्ष आणि माजी अर्थमंत्री जयंत पाटील तसेच भाजपचे ज्येष्ठ नेते आणि माजी अर्थमंत्री सुधीर मुनगंटीवार यांची नावं पुढे येत आहेत. या तिघांनाही अर्थसंकल्प मांडण्याचा अनुभव असून, प्रशासन आणि आर्थिक धोरणांची सखोल जाण असल्याचे मानले जाते.
मात्र सध्याची सत्ता रचना पाहता सुधीर मुनगंटीवार यांना पुन्हा मंत्रिमंडळात सहभागी केले जाईल का, याबाबत साशंकता व्यक्त केली जात आहे. अशा परिस्थितीत मुख्यमंत्री देवेंद्र फडणवीस हे स्वतः विधानसभेत अर्थसंकल्प सादर करतील, अशी शक्यता वर्तवली जात आहे. तर विधान परिषदेत ही जबाबदारी मागील वर्षीप्रमाणे वित्त राज्यमंत्री ॲडव्होकेट आशिष जयस्वाल पार पाडतील, असे संकेत मिळत आहेत.
महाराष्ट्राच्या नव्या अर्थसंकल्पासाठी आता अवघा एक महिन्याचा कालावधी उरलेला आहे. अजित पवार यांच्या अकाली निधनामुळे ही प्रक्रिया अधिक आव्हानात्मक ठरणार आहे. मात्र शासनातील वरिष्ठ अधिकाऱ्यांकडून प्राथमिक तयारी सुरू असल्याचे सांगण्यात येत आहे. अर्थतज्ज्ञांच्या मते, देवेंद्र फडणवीस हे या क्षेत्रात अनुभवी असल्यामुळे शासन या परिस्थितीवर सहज मात करेल.
दरम्यान, वित्त राज्यमंत्री ॲडव्होकेट आशिष जयस्वाल यांनी माध्यमांशी बोलताना सांगितले की, सध्या राज्यात काही ठिकाणी सुरू असलेल्या जिल्हा परिषद निवडणुकांमुळे आचारसंहिता लागू आहे. ही प्रक्रिया पूर्ण झाल्यानंतर आणि तीन दिवसांचा राजकीय दुःखवटा संपल्यानंतर आवश्यक त्या अधिसूचना काढल्या जातील. जिल्हा नियोजन समितीच्या बैठका सुरू असून, जिल्हा आराखड्यानुसार निधी वाटपाबाबत चर्चा केली जात आहे.
विशेष म्हणजे, राज्यासमोरील आर्थिक आव्हाने मोठी आहेत. 2025-26 या आर्थिक वर्षात महाराष्ट्राचे एकूण कर्ज सुमारे 9.32 लाख कोटी रुपयांपर्यंत पोहोचण्याची शक्यता वर्तवली जात आहे. त्यातच ‘लाडकी बहीण’ योजनेसारख्या योजनांचा आर्थिक भारही आहे. गेल्या वर्षी अजित पवार यांनी त्यांच्या राजकीय कारकिर्दीतील अकरावा अर्थसंकल्प सादर केला होता. आता पुढील अर्थसंकल्प कोण सादर करणार, हे राजकीय समीकरणांवर आणि वरिष्ठ नेत्यांच्या निर्णयावर अवलंबून असणार आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
