अमरावतीत आश्रम शाळेतील 16 वर्षीय अल्पवयीन मुलीवर अत्याचार, आरोपीला अटक
अमरावतीत आश्रम शाळेतील 16 वर्षीय अल्पवयीन मुलीवर अत्याचार, आरोपीला अटक
अमरावती जिल्ह्यातील वरुड तालुक्यात आश्रम शाळेतील 16 वर्षीय मुलीवर अत्याचाराची धक्कादायक घटना. पॉस्को कायद्यांतर्गत गुन्हा दाखल, आरोपी राहुल इवनाते अटकेत.
सायली मेमाणे
पुणे १३ सप्टेंबर २०२५ : अमरावती : राज्यातील समाजमन हादरवणारी घटना अमरावती जिल्ह्यात उघड झाली आहे. आश्रम शाळेत शिकणाऱ्या केवळ 16 वर्षीय अल्पवयीन मुलीवर लैंगिक अत्याचार झाल्याचे प्रकरण समोर आले असून या घटनेने पालक, विद्यार्थी आणि संपूर्ण शैक्षणिक क्षेत्रात संतापाची लाट उसळली आहे. अत्याचारामुळे पीडित मुलगी गर्भवती झाल्याने ही बाब उघडकीस आली आणि घटनेचे गांभीर्य अधिक अधोरेखित झाले आहे.
ही घटना अमरावती जिल्ह्यातील वरुड तालुक्यात घडली आहे. पोलिसांच्या माहितीनुसार, सुट्टीच्या काळात म्हणजेच 1 मे ते 25 जून दरम्यान मुलीवर वारंवार अत्याचार करण्यात आले. या काळात शाळा बंद असताना झालेल्या या प्रकाराबाबत आता गंभीरपणे चौकशी सुरू आहे. मुलीची अवस्था लक्षात आल्यानंतर प्रकरण उघडकीस आले आणि तत्काळ पोलिसांत तक्रार दाखल करण्यात आली.
या संदर्भात वरुड पोलीस ठाण्यात गुन्हा दाखल करण्यात आला आहे. मुलीच्या अल्पवयीन असल्यामुळे गुन्हा पॉक्सो (POCSO) कायद्यान्वये नोंदवण्यात आला आहे. तसेच अत्याचारविरोधी कायद्यांतर्गतही आरोपीवर कारवाई करण्यात आली आहे. पोलिसांनी तत्काळ कारवाई करत आरोपी राहुल इवनाते (वय 27) याला अटक केली असून त्याच्याकडून पुढील चौकशी सुरू आहे.
या घटनेनंतर परिसरात मोठी खळबळ उडाली आहे. अल्पवयीन मुलींवर होणारे अत्याचार हा समाजासाठी मोठा धोक्याचा इशारा असल्याचे तज्ज्ञांचे म्हणणे आहे. आश्रम शाळांमध्ये सुरक्षिततेच्या दृष्टीने अधिक खबरदारी घेण्याची गरज आहे, असे सामाजिक संघटनांकडून सांगितले जात आहे. शिक्षणसंस्थांमध्ये विद्यार्थ्यांचे संरक्षण हा अत्यंत संवेदनशील आणि जबाबदारीचा विषय आहे. त्यामुळे अशा घटना रोखण्यासाठी कठोर उपाययोजना तातडीने राबवण्याची मागणी होत आहे.
सामाजिक संस्थांच्या मते, अशा प्रकारांमध्ये पीडित मुलींना मानसिक आधार आणि समुपदेशन मिळणे तितकेच महत्त्वाचे आहे. कारण अल्पवयीन वयात अशा घटना सहन करणे मानसिक आणि शारीरिक दोन्ही दृष्ट्या गंभीर ठरते. यासाठी शासनाने आणि स्थानिक प्रशासनाने तातडीने पुढाकार घेऊन पीडितेला आवश्यक ते सर्व सहाय्य उपलब्ध करून द्यावे, अशी मागणी होत आहे.
या घटनेमुळे अमरावती जिल्हा प्रशासन आणि शालेय शिक्षण विभागावरही प्रश्नचिन्ह उपस्थित झाले आहे. आश्रम शाळांमध्ये मुलींच्या सुरक्षिततेसाठी अधिक काटेकोर नियमावली लागू करण्याची गरज आहे. तसेच शिक्षक, कर्मचारी आणि स्थानिक प्रशासनाची जबाबदारी अधिक ठळकपणे अधोरेखित झाली आहे.
आरोपी अटकेत असला तरी या प्रकरणातील चौकशी जलदगतीने पूर्ण करून कठोर शिक्षा सुनावली जावी, अशी मागणी स्थानिक नागरिक आणि संघटनांनी केली आहे. यामुळे अशा घटनांना आळा बसू शकतो, असा विश्वास व्यक्त होत आहे.
राज्यातील वाढत्या लैंगिक अत्याचारांच्या घटनांच्या पार्श्वभूमीवर ही घटना गंभीर असून शासन आणि न्यायव्यवस्थेने कठोर पावले उचलण्याची गरज आहे. अल्पवयीन मुलींच्या सुरक्षेसाठी शाळा व आश्रमात कडक नियम व देखरेख ठेवणे आवश्यक आहे. अन्यथा मुलांच्या भवितव्यावर गदा येऊ शकते.
