ATM मधून पैसे काढणं महाग! SBI ने एटीएम शुल्क वाढवले; 1 डिसेंबर 2025 पासून नवे नियम लागू
ATM मधून पैसे काढणं महाग! SBI ने एटीएम शुल्क वाढवले; 1 डिसेंबर 2025 पासून नवे नियम लागू
SBI ATM Charges Update स्टेट बँक ऑफ इंडियाने एटीएम व्यवहार शुल्कात वाढ केली आहे. नॉन-SBI एटीएम वापरणाऱ्यांना फटका; सॅलरी अकाऊंट, सेव्हिंग खातेधारकांसाठी नवे नियम जाणून घ्या.
पुणे ११ जानेवारी २०२६ : ATM मधून पैसे काढणाऱ्यांसाठी महत्त्वाची बातमी समोर आली आहे. स्टेट बँक ऑफ इंडिया म्हणजेच SBI ने एटीएम व्यवहार शुल्कात वाढ केली असून, हा बदल 1 डिसेंबर 2025 पासून लागू करण्यात आला आहे. SBI मध्ये खाते असलेल्या आणि नियमितपणे एटीएमचा वापर करणाऱ्या ग्राहकांवर या निर्णयाचा थेट परिणाम होणार आहे. विशेषतः दुसऱ्या बँकेच्या एटीएम कार्डद्वारे SBI चे एटीएम वापरणाऱ्या ग्राहकांना अधिक पैसे मोजावे लागणार आहेत.
बँकेकडून देण्यात आलेल्या माहितीनुसार, एटीएम आणि ऑटोमेटेड डिपॉजिट कम विड्रॉ मशीन (ADWM) वर आकारण्यात येणाऱ्या इंटरचेंज शुल्कात वाढ झाल्यामुळे हा निर्णय घेण्यात आला आहे. वाढलेल्या ऑपरेशनल आणि नेटवर्क खर्चाचा परिणाम बँकांच्या सेवा शुल्कांवर होत असल्याचे SBI ने स्पष्ट केले आहे. याआधी 1 फेब्रुवारी 2025 रोजी एटीएम शुल्कात बदल करण्यात आला होता, मात्र आता पुन्हा एकदा शुल्क वाढवण्यात आले आहे.
SBI सेव्हिंग खातं असलेल्या ग्राहकांसाठी मोफत व्यवहारांच्या संख्येत कोणताही बदल करण्यात आलेला नाही. ग्राहकांना आताही महिन्याला पाच मोफत फायनॅन्शियल आणि नॉन-फायनॅन्शियल व्यवहारांची सुविधा मिळणार आहे. मात्र ही मोफत मर्यादा ओलांडल्यानंतर कॅश विड्रॉसाठी आता 23 रुपये अधिक GST आकारले जातील. याआधी हा शुल्क 21 रुपये अधिक GST इतका होता. त्याचप्रमाणे नॉन-फायनॅन्शियल व्यवहारांवर, जसे की बॅलन्स चौकशी किंवा मिनी स्टेटमेंट, आता 11 रुपये अधिक GST द्यावे लागतील, जे आधी 10 रुपये अधिक GST होते.
SBI च्या सॅलरी पॅकेज सेव्हिंग अकाऊंट धारकांसाठी हा बदल अधिक महत्त्वाचा ठरणार आहे. यापूर्वी नॉन-SBI एटीएमवर अमर्यादित मोफत व्यवहारांची सुविधा मिळत होती. मात्र आता या खातेदारांना महिन्याला केवळ 10 मोफत व्यवहारांचीच मर्यादा देण्यात आली आहे. या 10 व्यवहारांमध्ये फायनॅन्शियल आणि नॉन-फायनॅन्शियल दोन्ही प्रकारच्या व्यवहारांचा समावेश असेल. ही मर्यादा संपल्यानंतर कॅश विड्रॉसाठी 23 रुपये अधिक GST आणि नॉन-फायनॅन्शियल व्यवहारांसाठी 11 रुपये अधिक GST आकारले जाणार आहेत.
दरम्यान, बेसिक सेव्हिंग बँक डिपॉजिट (BSBD) खातेधारकांसाठी मात्र दिलासादायक बातमी आहे. या खात्यांवर कोणतेही नवे शुल्क लागू करण्यात आलेले नाही. BSBD खातेधारकांसाठी सध्याचे सेवा शुल्क पूर्वीप्रमाणेच कायम राहणार असल्याचे SBI कडून स्पष्ट करण्यात आले आहे.
एटीएम व्यवहार शुल्क वाढल्यामुळे अनेक ग्राहक आता डिजिटल पेमेंट, UPI आणि नेट बँकिंगकडे अधिक वळतील, अशी शक्यता व्यक्त केली जात आहे. वाढत्या खर्चाच्या पार्श्वभूमीवर ग्राहकांनी एटीएम वापर मर्यादित ठेवणे आणि मोफत व्यवहारांचा योग्य वापर करणे गरजेचे ठरणार आहे. विशेषतः नॉन-SBI एटीएमचा वारंवार वापर करणाऱ्यांनी नव्या नियमांची माहिती घेऊनच व्यवहार करावेत, असे आवाहन बँकिंग तज्ज्ञांकडून करण्यात येत आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
