BMC Election 2025: काँग्रेस-वंचित आघाडी निश्चित, मुंबई महापालिकेत 62 जागा वंचितच्या वाट्याला

मुंबई महापालिका निवडणुकीसाठी काँग्रेस आणि वंचित बहुजन आघाडीमध्ये जागावाटप निश्चित झाले आहे. वंचित 62 जागा लढवणार असून 25 वर्षांनंतर दोन्ही पक्ष पुन्हा एकत्र आले आहेत.

पुणे २८ डिसेंबर २०२५ : मुंबई महानगरपालिका निवडणुकीच्या पार्श्वभूमीवर काँग्रेस आणि वंचित बहुजन आघाडी यांच्यात आघाडीचा अधिकृत निर्णय जाहीर करण्यात आला आहे. या आघाडीनुसार मुंबई महापालिकेत वंचित बहुजन आघाडी 62 जागांवर निवडणूक लढवणार असून उर्वरित सर्व जागांवर काँग्रेसचे उमेदवार असतील. काँग्रेस पक्षाच्या स्थापना दिनी हा निर्णय जाहीर झाल्याने या आघाडीला विशेष राजकीय महत्त्व प्राप्त झाले आहे. काँग्रेसचे प्रदेशाध्यक्ष हर्षवर्धन सपकाळ आणि वंचित बहुजन आघाडीचे प्रदेशउपाध्यक्ष डॉ. धैर्यवर्धन पुंडकर यांनी टिळक भवन येथे पत्रकार परिषदेत ही घोषणा केली.

मुंबई महापालिकेसाठी काँग्रेस आणि वंचित एकत्र लढणार असल्याची घोषणा होताच राजकीय वर्तुळात मोठी चर्चा सुरू झाली आहे. दोन्ही पक्षांनी स्पष्ट केलं आहे की ही आघाडी भाजपविरोधात लढण्यासाठी करण्यात आली असून, मुंबई महापालिकेवर काँग्रेस-वंचितची सत्ता येईल, असा विश्वास नेत्यांनी व्यक्त केला आहे. यासोबतच राज्यातील इतर 28 महानगरपालिकांबाबत स्थानिक पातळीवर निर्णय घेण्याचे अधिकार दोन्ही पक्षांनी आपापल्या स्थानिक नेतृत्वाला दिले आहेत.

पत्रकार परिषदेत काँग्रेस प्रदेशाध्यक्ष हर्षवर्धन सपकाळ यांनी सांगितले की काँग्रेस आणि वंचित बहुजन आघाडी यांची युती ही नैसर्गिक असून दोन्ही पक्षांची वैचारिक भूमिका समान आहे. संविधान, समता, बंधुत्व आणि सामाजिक न्याय या मूल्यांवर दोन्ही पक्ष ठाम असून, कोणत्याही परिस्थितीत संवैधानिक मूल्यांशी तडजोड केली जाणार नाही, असे त्यांनी स्पष्ट केले. ही आघाडी आकड्यांचा खेळ नसून विचारांची सांगड असल्याचेही त्यांनी नमूद केले.

सपकाळ यांनी आठवण करून दिली की 1998 आणि 1999 च्या निवडणुकांमध्ये काँग्रेस आणि वंचितमध्ये आघाडी झाली होती. तब्बल 25 वर्षांनंतर दोन्ही पक्ष पुन्हा एकत्र आले असून, या नव्या आघाडीमुळे मुंबईच्या राजकारणात नवे पर्व सुरू झाल्याचे त्यांनी सांगितले. या प्रक्रियेला वेळ लागला असला तरी आजपासून एकत्रित लढ्याची सुरुवात होत असल्याचेही त्यांनी नमूद केले.

वंचित बहुजन आघाडीचे प्रदेशउपाध्यक्ष डॉ. धैर्यवर्धन पुंडकर यांनी सांगितले की देशासाठी घातक असलेल्या भाजपला रोखण्यासाठी काँग्रेस आणि वंचित एकत्र आले आहेत. आघाडीसाठी काँग्रेस प्रदेशाध्यक्षांनी पहिले पाऊल टाकले आणि सुरुवातीपासूनच सकारात्मक भूमिका घेतली, असे पुंडकर म्हणाले. मुंबई महापालिकेत वंचित बहुजन आघाडी 62 जागांवर निवडणूक लढवेल, यावर शिक्कामोर्तब करण्यात आले आहे.

वंचितचे प्रदेश उपाध्यक्ष सिद्धार्थ मोकळे यांनी सांगितले की आघाडीमध्ये जागावाटपाच्या चर्चा कधीच पूर्ण समाधानकारक नसतात, मात्र कुठेतरी निर्णय घ्यावा लागतो. दोन्ही पक्षांमध्ये सकारात्मक चर्चा झाली असून मुंबई महापालिकेसाठी आज आघाडी जाहीर करण्यात आली आहे. इतर महानगरपालिकांमध्ये स्थानिक नेतृत्व सकारात्मक निर्णय घेईल, असेही त्यांनी स्पष्ट केले.

या आघाडीमुळे मुंबई महापालिका निवडणुकीत राजकीय समीकरणे बदलण्याची शक्यता आहे. काँग्रेस-वंचित आघाडीचा थेट मुकाबला भाजपशी होणार असून, आगामी काळात या आघाडीची रणनीती आणि उमेदवारांची निवड याकडे सर्वांचे लक्ष लागले आहे.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare