BMC Elections 2026: मतदार यादीत तुमचे नाव आहे का? ‘मताधिकार’ ॲपवर एका क्लिकमध्ये तपासा
BMC Elections 2026: मतदार यादीत तुमचे नाव आहे का? ‘मताधिकार’ ॲपवर एका क्लिकमध्ये तपासा
BMC Elections 2026 साठी मतदान करण्यापूर्वी मतदार यादीत नाव तपासणे सोपे झाले आहे. ‘मताधिकार’ ॲप आणि mahasecvoterlist.in वर EPIC नंबर किंवा नावाने शोधा.
पुणे २० डिसेंबर २०२५ : राज्यातील 29 महानगरपालिकांसाठी होणाऱ्या आगामी निवडणुकांची तयारी अंतिम टप्प्यात असून, या निवडणुकांमध्ये तब्बल 3 कोटी 48 लाख 78 हजार 17 मतदार मतदानाचा हक्क बजावणार आहेत. नगरपरिषदा आणि नगरपंचायतींच्या निवडणुकांची मतमोजणी 21 डिसेंबर रोजी पार पडणार असून, त्यानंतर संपूर्ण राज्याचे लक्ष महानगरपालिका निवडणुकांकडे लागणार आहे. महानगरपालिकांसाठी मतदान 15 जानेवारी 2026 रोजी होणार असून, 16 जानेवारी 2026 रोजी मतमोजणी पार पडणार आहे. या दिवशी राज्यातील 29 महानगरपालिकांवर कोणाची सत्ता येणार हे स्पष्ट होईल.
निवडणूक आयोगासह सर्वच राजकीय पक्षांकडून मतदारांनी मोठ्या संख्येने मतदान करावे, असे आवाहन करण्यात येत आहे. मात्र अनेक मतदारांना मतदानाच्या दिवशी आपले नाव मतदार यादीत आहे की नाही, मतदान केंद्र कुठले आहे, याबाबत संभ्रम असतो. ही अडचण दूर करण्यासाठी राज्य निवडणूक आयोगाने डिजिटल सुविधा उपलब्ध करून दिल्या आहेत, ज्यामुळे मतदार यादीत नाव शोधणे अत्यंत सोपे झाले आहे.
महानगरपालिका निवडणुकांसाठी मतदार यादीतील नाव, मतदान केंद्राचे ठिकाण तसेच प्रभागातील उमेदवारांविषयी माहिती मिळवण्यासाठी ‘मताधिकार’ हे मोबाईल ॲप उपलब्ध करून देण्यात आले आहे. हे ॲप सध्या केवळ गुगल प्ले स्टोअरवरून डाउनलोड करता येते. या ॲपच्या माध्यमातून मतदार दोन पद्धतींनी आपले नाव शोधू शकतात. मतदार आपले संपूर्ण नाव टाकून किंवा मतदार ओळखपत्रावरील EPIC क्रमांक वापरून मतदार यादीतील नाव शोधू शकतो. आवश्यक माहिती भरल्यानंतर जिल्हा आणि संबंधित महानगरपालिकेची निवड केल्यावर मतदाराचे नाव, मतदान केंद्र आणि प्रभागाची माहिती स्क्रीनवर दिसते.
या ॲपमुळे केवळ नाव शोधणेच नव्हे, तर मतदान केंद्राचे अचूक ठिकाण, मतदार क्रमांक आणि प्रभागातील उमेदवारांची सविस्तर माहितीही मिळते. त्यामुळे मतदानाच्या दिवशी कोणतीही अडचण येऊ नये, यासाठी ही सुविधा अत्यंत उपयुक्त ठरत आहे. स्मार्टफोन उपलब्ध नसलेल्या मतदारांसाठी ऑनलाइन पर्यायही देण्यात आला आहे.
मतदार यादीतील नाव तपासण्यासाठी mahasecvoterlist.in हे अधिकृत संकेतस्थळ राज्य निवडणूक आयोगाकडून उपलब्ध करून देण्यात आले आहे. या संकेतस्थळावर ‘Search Name in Voter List’ या पर्यायावर क्लिक करून मतदार आपले नाव किंवा EPIC क्रमांक टाकून माहिती मिळवू शकतो. प्रक्रिया सोपी असून काही सेकंदांत संपूर्ण तपशील उपलब्ध होतो.
या निवडणुकांसाठी राज्यभरात सुमारे 39 हजार 147 मतदान केंद्रांची व्यवस्था करण्यात आली आहे. मतदान प्रक्रिया सुरळीत पार पडण्यासाठी पुरेशा प्रमाणात इलेक्ट्रॉनिक मतदान यंत्रांची व्यवस्था करण्यात आली आहे. राज्यभरासाठी 43 हजार 958 कंट्रोल युनिट आणि 87 हजार 916 बॅलेट युनिट उपलब्ध करून देण्यात आली आहेत. बृहन्मुंबई महानगरपालिकेसाठीच सुमारे 10 हजार 111 मतदान केंद्र असून, त्यासाठी 11 हजार 349 कंट्रोल युनिट आणि 22 हजार 698 बॅलेट युनिटची व्यवस्था करण्यात आली आहे.
मतदान हा लोकशाहीचा कणा असून, प्रत्येक मतदाराने आपला हक्क बजावणे अत्यंत महत्त्वाचे आहे. त्यामुळे मतदानाच्या आधी मतदार यादीत नाव तपासून, मतदान केंद्राची माहिती घेऊन वेळेत मतदान करण्याचे आवाहन करण्यात येत आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
