Cash Bomb Video Row: सुनील तटकरेंचा हात असल्याचा शिंदे गटाचा आरोप; दळवींच्या व्हिडिओवरून नवा राजकीय स्फोट

कॅश बॉम्ब व्हिडिओ प्रकरणात शिंदे गटाचे महेंद्र थोरवे यांचा दावा—व्हिडिओ अंबादास दानवेंना सुनील तटकरेंनीच पाठवला असावा; नव्या वादाची ठिणगी.

पुणे ९ डिसेंबर २०२५ : राज्यातील विधीमंडळाचे हिवाळी अधिवेशन सुरू असतानाच ‘कॅश बॉम्ब’ व्हिडिओमुळे राजकीय वातावरण तापलेले असताना आता या प्रकरणाने आणखी नवा कलाटणी घेतली आहे. शिवसेना शिंदे गटाचे आमदार महेंद्र थोरवे यांनी राष्ट्रवादी काँग्रेस (अजित पवार गट) चे खासदार सुनील तटकरे यांच्यावर थेट आरोप करत म्हटले आहे की, वायरल झालेला महेंद्र दळवी यांचा पैशांच्या बंडलांसोबतचा व्हिडिओ स्वतः सुनील तटकरेंनीच अंबादास दानवेंना पाठवला असावा. या दाव्यामुळे आधीच गाजत असलेले हे प्रकरण आता नव्या राजकीय स्फोटाकडे झुकताना दिसत आहे.

काही दिवसांपूर्वी सोशल मीडियावर शिवसेना शिंदे गटाचे आमदार महेंद्र दळवी यांचा पैशांच्या गड्ड्यांसोबतचा व्हिडिओ जोरदार व्हायरल झाला होता. हा व्हिडिओ सर्वप्रथम शिवसेना (उद्धव ठाकरे गट) चे नेते अंबादास दानवे यांनी त्यांच्या ‘एक्स’ अकाऊंटवरून पोस्ट केला. त्यांनी या व्हिडिओच्या आधारे राज्य सरकारला लक्ष्य करत “शेतकरी कर्जमाफीसाठी पैसा नाही, पण अशा व्हिडिओमध्ये पैसा दिसतो, हे नेमके काय चालले आहे?” असा सवाल उपस्थित केला होता. दानवे यांच्या पोस्टनंतर व्हिडिओचा मुद्दा राजकीय दृष्टीने अत्यंत संवेदनशील ठरला आणि राज्यभर चर्चा सुरू झाली.

याच पार्श्वभूमीवर महेंद्र थोरवे यांनी केलेला आरोप राजकीय वादाला नवीन दिशा देणारा ठरला आहे. “अंबादास दानवे यांनी हा व्हिडिओ अधिवेशनादरम्यान जाणीवपूर्वक व्हायरल केला. दळवी असे काही करणार नाहीत, याचा आम्हाला पूर्ण विश्वास आहे. हा व्हिडिओ रायगडमधील स्थानिक राजकारणाशी संबंधित काही लोकांनी मुद्दाम पसरवला असण्याची शक्यता जास्त आहे. विशेषतः सुनील तटकरे सातत्याने शिवसेना आमदारांना अडचणीत आणण्याचा प्रयत्न करतात. त्यामुळे त्यांनीच हा व्हिडिओ दानवेंना दिला असावा,” असा गंभीर आरोप त्यांनी केला.

इतकेच नव्हे तर थोरवे यांनी आणखी पुढे जात तटकरे यांच्या राजकीय रणनीतीवरही टीका केली. त्यांचे म्हणणे आहे की, पारंपरिक शिवसेना–भाजप–रिपाई युतीचे अस्तित्व असूनही भाजपने राष्ट्रवादी काँग्रेस (अजित पवार गट) ला सत्तेत सामावून घेतले आणि त्याचा सर्वाधिक फटका रायगडमधील शिवसेना आमदारांना बसला. “आम्ही घरातच शत्रू पाळला आहे. राज्यात राष्ट्रवादी आणि रायगडमध्ये सुनील तटकरेंच्या रूपाने आम्ही राजकीय शत्रू पाळला आहे,” असे थोरवे म्हणाले. त्यांच्या या विधानाने राजकीय वादळ निर्माण झाले आहे.

या आरोपांवर अजून सुनील तटकरेंकडून कोणतीही अधिकृत प्रतिक्रिया आलेली नाही. मात्र राष्ट्रवादीच्या वर्तुळात या विषयावर उच्चस्तरीय चर्चेची शक्यता वर्तवली जात आहे. या विधानामुळे तटकरेंच्या राजकीय भूमिकेबद्दल शिंदे गटात आणि ठाकरे गटात नवीन समीकरणे आणि आरोप-प्रत्यारोप सुरू होण्याची शक्यता निर्माण झाली आहे.

दळवींच्या व्हिडिओबाबत तपास सुरू असून तो नेमका कसा आणि कुठून व्हायरल झाला, याचे धागेदोरे आता राजकीय वर्तुळातून समोर येताना दिसत आहेत. अधिवेशन चालू असताना असा व्हिडिओ समोर येणे, त्यावरून सत्ताधारी आणि विरोधकांमध्ये आरोपांची मालिका सुरू होणे, हे सर्व निवडणूकपूर्व राजकीय वातावरण आणखी तापवणारे आहे.

कॅश बॉम्ब प्रकरणातून निर्माण झालेली ही नवीन राजकीय खळबळ राज्यातील सत्तेची समीकरणे, परस्पर संबंध आणि स्थानिक पातळीवरील अंतर्गत संघर्ष पुन्हा एकदा पुढे आणणारी ठरली आहे. आता सुनील तटकरे, राष्ट्रवादी काँग्रेस आणि भाजप-शिंदे गट यांची भूमिका काय असेल, हे पाहणे महत्त्वाचे ठरणार आहे.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare