Delhi Court : चालता चालता जीव गेला! ASI राजेश कुमार यांचा कोर्टात हार्ट अटॅकने मृत्यू
चालता चालता जीव गेला! ASI राजेश कुमार यांचा कोर्टात हार्ट अटॅकने मृत्यू
Delhi Tis Hazari Court Viral Video: ड्युटीवर असताना दिल्ली पोलिसांचे एएसआय राजेश कुमार यांचा कोर्ट परिसरात अचानक हार्ट अटॅकने मृत्यू झाला. ही संपूर्ण घटना सीसीटीव्हीत कैद झाली असून, फुटेज सोशल मीडियावर व्हायरल झाले आहे.
सायली मेमाणे
पुणे १० ऑक्टोबर २०२५ : दिल्लीतील तिस हजारी कोर्ट परिसरात घडलेली एक हृदयद्रावक घटना सध्या सोशल मीडियावर चर्चेचा विषय ठरली आहे. ड्युटीवर असलेले दिल्ली पोलिसांचे सहायक उपनिरीक्षक (ASI) राजेश कुमार यांचा चालता चालता हार्ट अटॅकने मृत्यू झाला. विशेष म्हणजे ही संपूर्ण घटना कोर्ट परिसरातील सीसीटीव्ही कॅमेऱ्यात कैद झाली असून, त्या व्हिडिओने इंटरनेटवर धुमाकूळ घातला आहे. ही घटना ६ ऑक्टोबर रोजी सकाळी ९ वाजून २२ मिनिटांनी घडली असल्याचे समोर आले आहे.
मिळालेल्या माहितीनुसार, एएसआय राजेश कुमार हे त्या दिवशी आपल्या नियमित ड्युटीसाठी तिस हजारी कोर्टात हजर झाले होते. फुटेजमध्ये दिसते की ते पूर्णपणे व्यवस्थित अवस्थेत कोर्ट परिसरात प्रवेश करतात आणि एका सहकाऱ्याशी हस्तांदोलन करतात. काही सेकंदांतच, जेव्हा ते एस्केलेटरकडे जाण्यासाठी पुढे सरकतात, तेव्हा अचानक जमिनीवर कोसळतात. आजूबाजूचे सहकारी आणि कोर्ट कर्मचारी त्यांना मदतीसाठी धावत येतात. त्यांना तातडीने रुग्णालयात दाखल करण्यात आले, मात्र डॉक्टरांनी तपासल्यानंतर त्यांना मृत घोषित केले.
या घटनेमुळे संपूर्ण कोर्ट परिसरात एकच खळबळ उडाली. आपल्या ड्युटीवर असताना एएसआय राजेश कुमार यांचा असा अचानक मृत्यू झाल्याने सर्वत्र शोककळा पसरली आहे. पोलिसांनी त्यांच्या मृतदेहाचे पोस्टमॉर्टमसाठी पाठवले असून, प्राथमिक तपासात ही घटना हृदयविकाराच्या झटक्यामुळे झाल्याचे निष्पन्न झाले आहे.
सीसीटीव्ही फुटेजमधील दृश्ये अत्यंत धक्कादायक असून, ती सोशल मीडियावर झपाट्याने व्हायरल झाली आहेत. अनेक नेटिझन्सनी या घटनेवर दुःख व्यक्त केले आहे. काहींनी राजेश कुमार यांच्या सेवाभावाचे कौतुक करत श्रद्धांजली वाहिली, तर काहींनी वाढत्या हृदयविकारांच्या घटनांवर चिंता व्यक्त केली आहे.
गेल्या काही वर्षांत अचानक हार्ट अटॅकने मृत्यू होण्याचे प्रमाण देशभरात झपाट्याने वाढले आहे. ताणतणाव, अनियमित जीवनशैली, अति श्रम आणि अयोग्य आहार या गोष्टींमुळे हृदयविकाराचा धोका वाढत असल्याचे तज्ज्ञांचे म्हणणे आहे. अनेक वेळा हे झटके इतके तीव्र असतात की, व्यक्तीला उपचाराची संधीही मिळत नाही. त्यामुळे नियमित आरोग्य तपासणी आणि वेळेवर वैद्यकीय सल्ला घेणे अत्यावश्यक असल्याचे डॉक्टर सुचवतात.
राजेश कुमार यांचा मृत्यू हा केवळ पोलिस विभागासाठीच नव्हे, तर संपूर्ण समाजासाठी एक जागृतीचा संदेश आहे. ड्युटीवरील ताण, अनियमित कामाचे तास आणि शारीरिक थकवा यामुळे पोलिस कर्मचाऱ्यांचे आरोग्य धोक्यात येते, हे पुन्हा एकदा या घटनेतून स्पष्ट झाले आहे. त्यामुळे पोलिस आणि सुरक्षा दलांसाठी नियमित आरोग्य तपासणीची व्यवस्था करणे गरजेचे असल्याचे वरिष्ठ अधिकाऱ्यांकडून सांगितले जात आहे.
या घटनेनंतर दिल्ली पोलिस दलात दुःखाचे वातावरण निर्माण झाले आहे. सहकारी अधिकाऱ्यांनी राजेश कुमार यांना श्रद्धांजली अर्पण करत त्यांच्या कुटुंबाला सांत्वन दिले आहे. सोशल मीडियावर “सलाम टू द ड्युटी हीरो” असे हॅशटॅग ट्रेंड होत आहेत.
