E30 Petrol Rules: पेट्रोलमध्ये 30% एथेनॉल मिश्रणासाठी केंद्र सरकारची मोठी घोषणा नवीन नियम जारी

केंद्र सरकारने पेट्रोलमध्ये 30 टक्क्यांपर्यंत एथेनॉल मिश्रणासाठी E22, E25, E27 आणि E30 मानके जारी केली आहेत. ऊर्जा सुरक्षा आणि कच्च्या तेलावरील अवलंबित्व कमी करण्यासाठी मोठे पाऊल.

पुणे २१ मे २०२६ : पेट्रोल-डिझेलच्या वाढत्या किमती आणि पश्चिम आशियातील वाढत्या तणावाच्या पार्श्वभूमीवर केंद्र सरकारने ऊर्जा सुरक्षेसाठी मोठा निर्णय घेतला आहे. पेट्रोलमध्ये 30 टक्क्यांपर्यंत एथेनॉल मिश्रण (E30 Fuel) करण्यासाठी सरकारने नवीन अधिसूचना जारी केली असून, ‘ब्युरो ऑफ इंडियन स्टँडर्ड्स’ने (BIS) E22, E25, E27 आणि E30 या इंधन मिश्रणांसाठी तांत्रिक मानके अधिसूचित केली आहेत. या निर्णयामुळे भारत हरित आणि पर्यायी इंधनाकडे वेगाने वाटचाल करत असल्याचे स्पष्ट झाले आहे.

सध्या देशात E20 इंधनाचा वापर टप्प्याटप्प्याने वाढवला जात आहे. यापूर्वी सरकारने 2030 पर्यंत पेट्रोलमध्ये 20 टक्के एथेनॉल मिश्रणाचे उद्दिष्ट ठेवले होते. मात्र, हे लक्ष्य आता 2025-26 पर्यंत पूर्ण करण्याचा निर्णय घेण्यात आला आहे. त्यानंतर आता थेट E30 पर्यंतचे तांत्रिक निकष जाहीर झाल्याने भविष्यात अधिक प्रमाणात एथेनॉल मिश्रित इंधन बाजारात आणण्याची तयारी सुरू झाल्याचे संकेत मिळत आहेत.

सरकारने स्पष्ट केले आहे की, या अधिसूचनेचा अर्थ असा नाही की उद्यापासूनच देशभरात E30 पेट्रोलची विक्री सुरू होणार आहे. सध्या केवळ तांत्रिक तयारी आणि मानके निश्चित करण्यात आली आहेत, जेणेकरून भविष्यात हे इंधन बाजारात आणताना कोणतीही अडचण निर्माण होऊ नये. यामुळे वाहन उत्पादक, इंधन कंपन्या आणि संबंधित उद्योगांना आवश्यक बदल करण्यासाठी वेळ मिळणार आहे.

पश्चिम आशियात इस्रायल, अमेरिका आणि इराण यांच्यात निर्माण झालेल्या तणावामुळे जागतिक कच्च्या तेलाच्या पुरवठ्यावर मोठे संकट निर्माण होण्याची भीती व्यक्त केली जात आहे. जगातील जवळपास 20 टक्के तेलपुरवठा ‘स्ट्रेट ऑफ होर्मुज’ या महत्त्वाच्या सागरी मार्गावरून होतो. या मार्गावर कोणतेही संकट निर्माण झाल्यास भारतासारख्या तेल आयातीवर मोठ्या प्रमाणात अवलंबून असलेल्या देशाला मोठा फटका बसू शकतो. त्यामुळेच भारत सरकार पर्यायी आणि स्वदेशी इंधन स्रोतांकडे अधिक वेगाने वळत आहे.

एथेनॉल ब्लेंडिंगमुळे भारताचा परकीय चलन खर्च कमी होण्यास मदत होणार आहे. याशिवाय ऊस आणि धान्य आधारित एथेनॉल उत्पादनाला चालना मिळाल्याने शेतकऱ्यांनाही फायदा होणार आहे. पेट्रोलमध्ये एथेनॉल मिश्रण वाढवल्यामुळे प्रदूषणातही घट होण्याची शक्यता तज्ज्ञांनी व्यक्त केली आहे.

मात्र, E20 इंधनामुळे जुन्या वाहनांच्या इंजिनवर परिणाम होऊ शकतो, अशी चिंता वाहनधारकांकडून व्यक्त केली जात आहे. मायलेज कमी होणे, इंजिनची कार्यक्षमता घटणे आणि देखभाल खर्च वाढणे याबाबतही चर्चा सुरू आहे. या पार्श्वभूमीवर केंद्रीय पेट्रोलियम मंत्री हरदीप सिंह पुरी यांनी यापूर्वीच स्पष्टीकरण दिले होते की, E20 इंधनामुळे इंजिन निकामी झाल्याची किंवा मोठे तांत्रिक नुकसान झाल्याची कोणतीही अधिकृत घटना समोर आलेली नाही.

केंद्र सरकारचे हे नवे धोरण देशाच्या ऊर्जा सुरक्षेसाठी महत्त्वाचे पाऊल मानले जात आहे. भविष्यात एथेनॉल मिश्रित इंधनामुळे भारताची तेल आयातीवरील अवलंबित्व कमी होऊन स्वदेशी ऊर्जा क्षेत्राला मोठी चालना मिळण्याची शक्यता आहे.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/

Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare

About The Author

Sayali Memane

Sayali Memane is a Pune-based journalist at NewsDotz, covering Maharashtra news, current affairs, and trending updates. She focuses on clear, factual, and fast digital reporting, delivering reliable news content tailored for modern audiences across platforms.

See author's posts