Gautam Adani Speech: “जे तुम्ही बनाल, तोच भारत बनेल” — धनबाद आयआयटी आयएसएमच्या शताब्दी समारंभात अदाणींची तरुणांना मोठी साद

धनबाद IIT ISM च्या शताब्दी समारंभात गौतम अदाणींचे प्रेरक भाषण; तरुणांना भारताच्या भविष्यासाठी पुढे येण्याचे आवाहन, ऊर्जा क्षेत्रातील प्रगतीची माहिती.

पुणे ९ डिसेंबर २०२५ : अदाणी ग्रुपचे चेअरमन गौतम अदाणी यांनी 9 डिसेंबर 2025 रोजी धनबाद येथील आयआयटी आयएसएमच्या शताब्दी समारंभात प्रभावी आणि प्रेरणादायी भाषण करत उपस्थित विद्यार्थी आणि शिक्षकांना नवी ऊर्जा दिली. सभागृहात मोठ्या उत्साहाचे वातावरण असताना त्यांनी भारताच्या भविष्याचा पाया मजबूत करण्यासाठी तरुण पिढीची भूमिका किती महत्त्वाची आहे, हे स्पष्ट केले. “जे तुम्ही बनाल, तोच आपला भारत बनेल,” या एका वाक्यात त्यांनी संपूर्ण भाषणाचा गाभा मांडला.

अदाणी यांनी धनबादच्या भूमीबद्दल आदर व्यक्त करत सांगितले की, आयआयटी आयएसएम हे केवळ एक अभियांत्रिकी संस्थान नाही, तर भारताच्या मातीतील ज्ञानपरंपरेचे एक आधुनिक मूर्तिमंत रूप आहे. शंभर वर्षांपूर्वी, देश गुलामगिरीत असताना भारतीय राष्ट्रीय काँग्रेसने ही संस्था स्थापन करण्याची शिफारस केली होती, याची आठवण करून देत त्यांनी भारतीय ज्ञानसंस्कृतीची समृद्ध परंपरा नालंदा विद्यापीठापासून आजच्या तंत्रज्ञानयुगापर्यंत कशी विकसित झाली, यावर प्रकाश टाकला. “जो देश आपल्या मातीची भाषा आणि परंपरा समजतो, तोच महान बनतो,” असे ते म्हणाले.

त्यांनी विद्यार्थ्यांना इतिहास विसरू नका असा सल्ला देत सांगितले की, आजची तरुण पिढी भारताला जागतिक स्तरावर एका नव्या उंचीवर नेऊ शकते. अदाणी यांनी खास करून ‘नैरेटिव्ह कॉलनायझेशन’ या संकल्पनेवर भर दिला. ते म्हणाले, “आपल्या कथेचं जगातलं रूप आपणच ठरवलं पाहिजे. नाहीतर ती कथा आपल्या विरोधात लिहिली जाण्याची शक्यता असते.” भारतीय तरुणांनी देशाच्या ऊर्जा, नवप्रवर्तन, खाणकाम, पायाभूत सुविधा आणि तंत्रज्ञान क्षेत्रात नवीन मॉडेल्स तयार करण्याची क्षमता आहे, असा विश्वास त्यांनी व्यक्त केला.

अदाणी यांनी ऊर्जा क्षेत्रातील भारताच्या उल्लेखनीय प्रवासाविषयी माहिती देताना सांगितले की, भारत पर्यावरणपूरक मार्गांनी जगापेक्षा कमी प्रदूषण करत विकासाच्या दिशेने वाटचाल करत आहे. त्यांनी स्पष्ट केले की, आज भारतातील 50% पेक्षा जास्त वीज अपारंपरिक स्रोतांमधून मिळत आहे, आणि हे लक्ष्य निर्धारित वेळेपूर्वी साध्य करण्यात देश यशस्वी झाला आहे. त्यांनी गुजरातमधील खावडा अक्षय ऊर्जा पार्क, तसेच ऑस्ट्रेलियातील कारमायकल खाण प्रकल्प यांची माहिती देत ऊर्जा क्षेत्रात भारत जगाला मागे टाकण्याच्या तयारीत असल्याचे सांगितले.

खाणकाम हा जुना उद्योग वाटला तरी त्याशिवाय आधुनिक अर्थव्यवस्थेची पायाभरणी शक्य नाही, असेही त्यांनी स्पष्ट केले. “ऊर्जा सुरक्षा आणि आर्थिक विकास या दोन्ही गोष्टींचा केंद्रबिंदू आजही खाणकामच आहे,” असे ते म्हणाले. उद्योगक्षेत्रातील त्यांच्या प्रत्यक्ष अनुभवातून त्यांनी विद्यार्थ्यांना मोठ्या स्वप्नांकडे वाटचाल करण्यासाठी प्रेरित केले.

भाषणाच्या शेवटी अदाणी यांनी विद्यार्थ्यांना प्रोत्साहन देत सांगितले, “स्वप्नं पाहा, जोखीम घेण्यास घाबरू नका आणि भारताच्या भविष्यात आपला वाटा उचला. सातत्याने मेहनत केली तर असंभवही शक्य होऊ शकते.” “जय हिंद, जय भारत” असा नारा देत त्यांनी भाषणाचा समारोप केला. त्यांच्या या भाषणाने सभागृहात उपस्थित सर्वांमध्ये विश्वास, प्रेरणा आणि देशाच्या विकासाबद्दलची नवउमेद निर्माण झाली.