IND vs USA: भारताचे फलंदाज मावळले तरी ‘सूर्या’ तळपला; वानखेडेत अमेरिकेवर भारताचा दमदार विजय
IND vs USA: भारताचे फलंदाज मावळले तरी ‘सूर्या’ तळपला; वानखेडेत अमेरिकेवर भारताचा दमदार विजय
IND vs USA Match Update: सूर्यकुमार यादवच्या झंझावाती अर्धशतकाच्या जोरावर भारताचा वानखेडेत अमेरिकेवर 29 धावांनी विजय. टी-20 वर्ल्डकप 2026 ची विजयी सुरुवात.
पुणे ०८ जानेवारी २०२६ : भारत आणि श्रीलंका संयुक्तपणे आयोजित करत असलेल्या टी-20 वर्ल्डकप 2026 ची भारताने विजयी सुरुवात केली आहे. मुंबईतील ऐतिहासिक वानखेडे मैदानावर भारत आणि अमेरिका यांच्यात झालेल्या स्पर्धेतील पहिल्याच सामन्यात भारतीय संघाने दमदार खेळी करत अमेरिकेला पराभवाची धूळ चारली. भारताच्या विजयाचा खरा शिल्पकार ठरला कर्णधार सूर्यकुमार यादव, ज्याने दबावाखाली झंझावाती अर्धशतकी खेळी साकारली.
नाणेफेक जिंकून प्रथम फलंदाजी करत भारताने 20 षटकांत 9 विकेट्स गमावत 161 धावा केल्या. मात्र भारताची सुरुवात अत्यंत निराशाजनक झाली. पॉवर प्लेमध्येच भारताचे आघाडीचे फलंदाज तंबूत परतले. सलामीवीर इशान किशन 16 चेंडूत 20 धावा करून बाद झाला, तर अभिषेक शर्माला खातेही उघडता आले नाही. त्यामुळे भारतीय डावाला मोठा ब्रेक लागला आणि एकावेळी संघ अडचणीत सापडलेला दिसत होता.
या कठीण परिस्थितीत तिलक वर्माने संयमी खेळी करत 16 चेंडूत 25 धावा करत डाव सावरण्याचा प्रयत्न केला. मात्र त्यानंतर मैदानात आलेल्या फलंदाजांना अपेक्षित योगदान देता आले नाही. एकामागून एक विकेट्स पडत गेल्याने भारताची धावसंख्या मर्यादित राहील असे चित्र निर्माण झाले होते.
मात्र कर्णधार सूर्यकुमार यादवने जबाबदारी आपल्या खांद्यावर घेत शेवटपर्यंत किल्ला लढवला. सूर्यकुमारने 49 चेंडूत 84 धावांची वादळी खेळी केली. या खेळीत त्याने 10 चौकार आणि 4 षटकार ठोकत वानखेडेतील प्रेक्षकांना अक्षरशः मंत्रमुग्ध केले. त्याच्या खेळीमुळेच भारताला समाधानकारक 161 धावांचा टप्पा गाठता आला.
अमेरिकेकडून गोलंदाजीत शॅडलेनं प्रभावी कामगिरी करत 4 विकेट्स घेतल्या. हरमित सिंगने 2 विकेट्स मिळवल्या, तर अली खान आणि मोहम्मद मोहसिनला प्रत्येकी एक विकेट मिळाली. तरीही सूर्यकुमारचा कहर थोपवण्यात अमेरिकी गोलंदाज अपयशी ठरले.
161 धावांच्या लक्ष्याचा पाठलाग करताना अमेरिकेच्या संघाची सुरुवातही फारशी आशादायक ठरली नाही. भारतीय गोलंदाजांनी सुरुवातीपासूनच अचूक मारा करत अमेरिकेच्या फलंदाजांवर दबाव निर्माण केला. अमेरिकेचा संघ 20 षटकांत 8 विकेट्स गमावून केवळ 132 धावांपर्यंतच मजल मारू शकला.
भारताकडून मोहम्मद सिराजने शानदार गोलंदाजी करत 3 विकेट्स घेतल्या. अर्शदीप सिंग आणि अक्षर पटेल यांनी प्रत्येकी 2 विकेट्स घेत अमेरिकेचा डाव मोडून काढला. तर वरुण चक्रवर्तीने एक महत्त्वाची विकेट घेतली. भारतीय गोलंदाजांच्या शिस्तबद्ध कामगिरीमुळे अमेरिका लक्ष्याच्या जवळपासही पोहोचू शकली नाही.
अखेर भारताने 29 धावांनी विजय मिळवत टी-20 वर्ल्डकप 2026 मधील पहिल्याच सामन्यात विजयी सलामी दिली. सूर्यकुमार यादवची कर्णधार म्हणून आणि फलंदाज म्हणून केलेली कामगिरी भारतासाठी आत्मविश्वास वाढवणारी ठरली आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
