अभिनेत्री करिश्मा शर्मा गंभीर जखमी; धावत्या ट्रेनमधून उडी मारल्याने एमआरआय सल्ला
अभिनेत्री करिश्मा शर्मा गंभीर जखमी; धावत्या ट्रेनमधून उडी मारल्याने एमआरआय सल्ला
अभिनेत्री करिश्मा शर्मा धावत्या ट्रेनमधून उडी मारल्याने गंभीर जखमी झाली आहे. डोक्याला गंभीर दुखापत झाल्यामुळे तिला एमआरआय करण्याचा सल्ला देण्यात आला आहे. तिने चाहत्यांना धोका पत्करण्याचा प्रयत्न करू नये असे आवाहन केले आहे.
सायली मेमाणे
पुणे १२ सप्टेंबर २०२५ : बॉलीवूड अभिनेत्री करिश्मा शर्मा धावत्या लोकल ट्रेनमधून उडी मारल्याने गंभीर जखमी झाली आहे. ‘रागिनी एमएमएस रिटर्न्स’ आणि ‘प्यार का पंचनामा’ सारख्या चित्रपटांतून ओळख मिळवलेली करिश्मा शर्मा मुंबईत एका शूटसाठी जात असताना या अपघाताची शिकार झाली. तिच्या डोक्यावर आणि शरीरावर गंभीर जखमा झाल्या आहेत. डॉक्टरांनी तिच्या डोक्याला झालेल्या दुखापतीचे स्वरूप तपासण्यासाठी एमआरआय (MRI) करण्याचा सल्ला दिला आहे. सध्या ती डॉक्टरांच्या देखरेखीखाली रुग्णालयात उपचार घेत आहे.
घटना घडल्यानंतर करिश्मा शर्मा स्वतः तिच्या इंस्टाग्राम अकाउंटवर चाहत्यांना परिस्थितीबाबत माहिती दिली. तिने सांगितले की, ती चर्चगेटला शूटसाठी जात होती आणि वेळेच्या ताणामुळे लोकल ट्रेनने प्रवास करण्याचा निर्णय घेतला. तिला सोबत काही मित्र होते, पण ट्रेनमध्ये चढताना ट्रेनचा वेग अचानक वाढल्यामुळे तिचे मित्र ट्रेनमध्ये चढू शकले नाहीत. ही परिस्थिती पाहून करिश्मा घाबरून धावत्या ट्रेनमधून उडी मारली.
उडी मारल्यामुळे ती पाठीच्या बाजूने खाली पडली आणि तिच्या डोक्याला जोरदार मार लागला. या अपघातानंतर तिला तातडीने रुग्णालयात दाखल करण्यात आले. डॉक्टरांच्या प्राथमिक तपासणीत तिच्या डोक्यावर गंभीर दुखापत आणि शरीरावर अनेक जखमा असल्याचे निदर्शनास आले. एमआरआय करून तिच्या जखमांचे स्वरूप आणि गंभीरता तपासली जाणार आहे.
करिश्माने आपल्या इंस्टाग्राम स्टोरीमध्ये नमूद केले की, “काल मी चर्चगेटला एका शूटसाठी जात होते. मी साडी नेसली होती. ट्रेनमध्ये चढताच ट्रेनचा वेग वाढला आणि माझे मित्र मागे राहिले. त्यानंतर घाबरून मी देखील उडी मारली आणि पाठीवर पडले. त्यामुळे माझ्या डोक्याला दुखापत झाली आहे. माझ्या पाठीला आणि शरीरावरही खूप जखमा आहेत. डॉक्टर म्हणतात की त्यांनी एमआरआय करायला सांगितले आहे. मला वेदना होत आहेत, पण मी स्वतःला सावरत आहे.”
करिश्मा शर्माने चाहत्यांना आणि सर्व नागरिकांना आवाहन केले की, लोकल ट्रेनमध्ये उडी मारण्याचा किंवा अशा धोकादायक परिस्थितीत स्वतःला धोका पत्करण्याचा प्रयत्न करू नये. मुंबईतील लोकल प्रवासातील धोके पुन्हा एकदा समोर आले आहेत. तिच्या चाहत्यांनी देखील सुरक्षा नियम पाळण्याचे महत्त्व पटवून दिले आहे.
या घटनेमुळे मुंबईतील धावत्या लोकल ट्रेनमध्ये होणाऱ्या अपघातांबाबत पुन्हा एकदा चर्चा सुरू झाली आहे. प्रवाशांना काळजीपूर्वक वागण्याची आणि धोकादायक परिस्थितीत तातडीने निर्णय घेण्याचे महत्त्व अधोरेखित झाले आहे. करिश्मा शर्मा यांचे जलद बरे होणे आणि त्यांच्या जखमांवर योग्य उपचार सुरू असल्याने चाहत्यांना दिलासा मिळाला आहे.
