KDMC राजकारणात भाजपाचा ‘मेगा प्लॅन’; ठाकरे-मनसेला धक्का, शिंदे गटालाही इशारा
KDMC राजकारणात भाजपाचा ‘मेगा प्लॅन’; ठाकरे-मनसेला धक्का, शिंदे गटालाही इशारा
डोंबिवलीतील KDMC निवडणुकीआधी भाजपने ठाकरे गट आणि मनसेच्या प्रमुख पदाधिकाऱ्यांना आपल्या पक्षात घेत मोठा राजकीय डाव टाकला आहे. यामुळे ठाकरे-मनसेसोबत शिंदे गटालाही आव्हान निर्माण झाले आहे.
सायली मेमाणे
१३ नोव्हेंबर २०२५ : डोंबिवली आणि कल्याणच्या राजकारणात भारतीय जनता पक्षाने पुन्हा एकदा जोरदार प्रवेश करत वातावरण तापवले आहे. केडीएमसी निवडणुकीच्या तोंडावर भाजपने गुरुवारी (13 नोव्हेंबर) शिवसेना (उद्धव बाळासाहेब ठाकरे गट) आणि महाराष्ट्र नवनिर्माण सेना यांच्यातील अनेक महत्त्वाच्या पदाधिकाऱ्यांना आपल्या पक्षात घेतले. या अचानक झालेल्या ‘मेगा इन्कमींग’मुळे ठाकरे गटाला मोठा धक्का बसला असून, मनसेलाही याचा थेट परिणाम बसणार आहे. इतकेच नव्हे, तर भाजपच्या या आक्रमक रणनीतीमुळे शिवसेना शिंदे गटालाही धोक्याची घंटा वाजली आहे.
या पक्षप्रवेश सोहळ्याला भाजप प्रदेशाध्यक्ष रवींद्र चव्हाण यांची उपस्थिती होती. यामध्ये नुकतेच भाजपमध्ये दाखल झालेले दीपेश म्हात्रे यांनी मध्यवर्ती भूमिका बजावली. ठाकरे गटातील शहरप्रमुख ओमनाथ नाटेकर, पदाधिकारी सचिन कुर्लेकर, हरिश्चंद्र परडकर तसेच मनसेचे मिलिंद म्हात्रे, गणेश यादव आणि समीर पाटील यांनी अधिकृतरित्या भाजपमध्ये प्रवेश केला. भाजपचे माजी नगरसेवक मंदार हळबे आणि मंदार टावरे देखील उपस्थित होते. या प्रवेशामुळे भाजपचे स्थान स्थानिक राजकारणात अधिक बळकट झाले आहे.
भाजपच्या या ‘मेगा प्लॅन’चा परिणाम सर्वप्रथम ठाकरे गटावर दिसून येणार आहे. गेल्या काही महिन्यांपासून ठाकरे गटाला पक्ष अंतर्गत मतभेद, कार्यकर्त्यांचा ओघ कमी होणे आणि उमेदवारांची कमतरता अशा अनेक अडचणींचा सामना करावा लागत आहे. डोंबिवली हा ठाकरे गटाचा मजबूत गड मानला जात असताना आता प्रमुख पदाधिकाऱ्यांचा केलेला त्याग भाजपाासाठी मोठा विजय ठरतो आहे.
मनसेलाही हा धक्का कमी नाही. मनसेचे काही महत्वाचे कार्यकर्ते भाजपमध्ये गेले असले तरी मनसेच्या शहरातील जनाधारावरही त्याचा परिणाम होईल. मनसेचा डोंबिवली-पट्ट्यातील राजकीय प्रभाव आधीच अपरिमित झाला असून आता या बदलामुळे मनसेची संघटनात्मक ताकद आणखीनच कमी होईल.
याशिवाय, भाजपचा हा पक्षप्रवेश शिंदे गटालाही अस्वस्थ करणारा आहे. महायुतीमध्ये भाजप आणि शिंदे गट एकत्र असले तरी स्थानिक पातळीवर दोन्ही पक्षांमध्ये तीव्र स्पर्धा आहे. जर महायुती भविष्यात टिकली नाही, तर भाजपचा वेगाने वाढणारा संघटन विस्तार शिंदे गटासाठी मोठे आव्हान बनू शकतो. विशेषतः या भागात उपमुख्यमंत्री एकनाथ शिंदे आणि खासदार श्रीकांत शिंदे यांचे मोठे वर्चस्व असले तरी भाजपने ज्या पद्धतीने माजी नगरसेवक आणि पदाधिकाऱ्यांना आकर्षित केले आहे, त्याने सत्ता समीकरणे बदलू शकतात.
केडीएमसी निवडणुकीच्या पार्श्वभूमीवर भाजपने हा मोठा डाव टाकला असून, आगामी निवडणुका तुफान चुरशीच्या होणार हे आता स्पष्ट दिसत आहे. दोन प्रमुख पक्ष शिवसेनेचे दोन्ही गट, मनसे आणि भाजप—या सर्वांमध्ये संघटन, पडझड आणि पक्षबांधणीचा संघर्ष सुरू झाला आहे. कोणता पक्ष परिस्थितीला आपल्या फायद्यात बदलतो, हे पाहणे उत्सुकतेचे ठरणार आहे.
सध्याच्या घडीला भाजपची प्रत्येक हालचाल केडीएमसी निवडणुकीकडे लक्ष केंद्रित करणारी आहे. त्यांच्या आक्रमक धोरणामुळे आगामी काळात राजकीय समीकरणे मोठ्या वेगाने बदलण्याची शक्यता नाकारता येत नाही.
