खारघरमध्ये खानदेश स्नेहमेळावा 2026 उत्साहत संपन्न; गिरीश महाजन यांच्या हस्ते उद्घाटन

खारघर सेक्टर 5 येथील लेवा पाटीदार एसी हॉलमध्ये खानदेश स्नेहमेळावा 2026 दिमाखात पार पडला. गिरीश महाजन यांच्या हस्ते उद्घाटन, गुणवंतांचा सत्कार आणि पारंपरिक खानदेशी जेवण हे आकर्षण.

पुणे १४ एप्रिल २०२६ : खारघरमध्ये खानदेशी बांधवांच्या एकतेचा आणि संस्कृतीचा भव्य उत्सव पाहायला मिळाला, जेव्हा सेक्टर ५ येथील लेवा पाटीदार एसी हॉल येथे खानदेश स्नेहमेळावा २०२६ मोठ्या उत्साहात पार पडला. दिनांक १२ एप्रिल २०२६ रोजी आयोजित या कार्यक्रमाला खानदेशी समाजबांधवांचा उत्स्फूर्त प्रतिसाद लाभला. भेटीगाठी, नेटवर्किंग, गुणवंतांचा गौरव आणि पारंपरिक खानदेशी मेजवानी अशा विविध उपक्रमांमुळे हा स्नेहमेळावा संस्मरणीय ठरला.

कार्यक्रमाचे उद्घाटन राज्याचे जलसंपदा व आपत्ती व्यवस्थापन मंत्री गिरीश भाऊ महाजन यांच्या हस्ते झाले, तर अध्यक्षस्थानी आमदार प्रशांत ठाकूर उपस्थित होते. विविध क्षेत्रातील मान्यवर, डॉक्टर, अभियंते, सीए, उद्योजक आणि कुटुंबीय मोठ्या संख्येने सहभागी झाले. प्रमुख पाहुण्यांमध्ये डॉ. सुनील भिरुड, श्री. शामसुंदर पाटील, डॉ. भगवान जोगी, श्री. प्रकाश बाविस्कर, श्री. मधु पाटील, श्री. विकास राणे, डॉ. आर. आर. देशमुख, डॉ. दिलीप सरोदे आणि श्री. सतीश भंगाळे यांचा समावेश होता.

या स्नेहमेळाव्याचा उद्देश केवळ सामाजिक मेळावा नसून खानदेशी समाज बांधवांना एकत्र आणून मजबूत नेटवर्क तयार करणे हा होता. विविध क्षेत्रांत प्रगती केलेल्या व्यक्तींना एकत्र आणून भविष्यातील सामाजिक, शैक्षणिक आणि आरोग्यविषयक उपक्रमांना चालना देण्याचा संकल्प व्यक्त करण्यात आला. कार्यक्रमादरम्यान विविध क्षेत्रात उल्लेखनीय कामगिरी करणाऱ्या ४५ डॉक्टरांचा तसेच एमपीएससी, यूपीएससी, आयआयटी-जेईई आणि क्रीडा क्षेत्रातील ६ यशस्वी विद्यार्थ्यांचा सत्कार करण्यात आला. हा गौरव सोहळा उपस्थितांसाठी प्रेरणादायी ठरला.

स्नेहमेळाव्यात विविध स्टॉल्सही आकर्षणाचे केंद्र ठरले. साड्या, खानदेशी उत्पादने, लेडीज पर्स, दागिने आणि गुंतवणूक मार्गदर्शन अशा स्टॉल्सना उपस्थितांनी उत्स्फूर्त प्रतिसाद दिला. कुटुंबासह आलेल्या पाहुण्यांनी खरेदीसोबत माहितीपर उपक्रमांमध्येही रस दाखवला.

कार्यक्रमाचे सर्वात मोठे आकर्षण म्हणजे पारंपरिक खानदेशी जेवण. भालोद येथून विशेष आमंत्रित १५ जणांच्या टीमने केळीच्या पानावर वाढलेले वरण-बट्टी, घोटलेली वांग्याची भाजी, गुळाचा शिरा, तळलेल्या मिरच्या आणि मसाला छास यांची अस्सल मेजवानी दिली. या पारंपरिक चवीचा उपस्थितांनी मनसोक्त आनंद घेतला. लहान मुलांपासून ते ज्येष्ठ नागरिकांपर्यंत सर्वांनी कार्यक्रमाचा आनंद घेतला आणि परंपरा, चव आणि एकतेचा सुंदर संगम अनुभवला.

या भव्य कार्यक्रमाच्या यशस्वी आयोजनामागे आयोजकांसोबत अनेक स्वयंसेवकांचे महत्त्वपूर्ण योगदान होते. त्यांच्या उत्कृष्ट समन्वय, नियोजन आणि कठोर परिश्रमांमुळे हा स्नेहमेळावा सुरळीतपणे पार पडला.. उपस्थितांनी आयोजकांचे कौतुक करत भविष्यातही असे उपक्रम सातत्याने व्हावेत, अशी अपेक्षा व्यक्त केली.

खारघर येथील हा स्नेहमेळावा केवळ एक सामाजिक कार्यक्रम न राहता खानदेशी समाजाच्या उज्ज्वल भविष्याची नवी सुरुवात ठरल्याचे सर्वांनी मान्य केले. एकत्र येणे, जोडले जाणे आणि समाजासाठी काहीतरी मोठे करण्याचा संकल्प—हाच या स्नेहमेळाव्याचा खरा संदेश ठरला.