Kolhapur News: बाळूमामाचे भक्त बनून ACBचा सापळा, दीड लाखांची लाच मागणारा अभियंता रंगेहाथ पकडला
Kolhapur News: बाळूमामाचे भक्त बनून ACBचा सापळा, दीड लाखांची लाच मागणारा अभियंता रंगेहाथ पकडला
Kolhapur ACB Raid News: कोल्हापुरात लाचलुचपत प्रतिबंधक पथकाने बाळूमामाचे भक्त बनून सापळा रचत दीड लाखांची लाच मागणाऱ्या नगर अभियंत्याला एसटी स्टॅण्डवर रंगेहाथ पकडले.
पुणे २० जानेवारी २०२५: कोल्हापूर जिल्ह्यात लाचलुचपत प्रतिबंधक विभागाने केलेल्या एका धडाकेबाज कारवाईमुळे संपूर्ण जिल्ह्यात खळबळ उडाली आहे. हुपरी नगरपरिषदेतील नगर अभियंता प्रदीप देसाई याला दीड लाख रुपयांची लाच मागितल्याप्रकरणी रंगेहाथ पकडण्यात आले आहे. विशेष म्हणजे, या कारवाईसाठी एसीबीच्या अधिकाऱ्यांनी चक्क बाळूमामाचे भक्त बनून सापळा रचला होता. कपाळावर भंडारा लावून, साध्या वेशात अधिकारी एसटी स्टॅण्डवर उभे राहिल्याने आरोपीला कुठलाही संशय आला नाही आणि तो थेट जाळ्यात अडकला.
मिळालेल्या माहितीनुसार, हुपरी नगरपरिषद अंतर्गत केलेल्या विकासकामांचे एमबी रजिस्टर पूर्ण करून देण्यासाठी अभियंता प्रदीप देसाई याने एका ठेकेदाराकडे दीड लाख रुपयांची लाच मागितली होती. देसाई यांची बदली झाल्यानंतरही संबंधित एमबी रजिस्टर ते स्वतःसोबत घेऊन गेले होते. कामाचे बिल मंजूर होण्यासाठी हे रजिस्टर पूर्ण करणे आवश्यक असल्याने ठेकेदाराने वारंवार विनंती केली. मात्र, देसाई यांनी यासाठी थेट पैशांची मागणी केल्याने ठेकेदाराने लाचलुचपत प्रतिबंधक विभागाकडे तक्रार दाखल केली.
तक्रारीनंतर एसीबी पथकाने सविस्तर पडताळणी करून सापळा रचण्याचा निर्णय घेतला. तडजोडीनंतर एकूण दीड लाखांपैकी एक लाख तीस हजार रुपये देण्याचे ठरले, त्यातील पहिला हप्ता म्हणून ४० हजार रुपये स्वीकारताना आरोपीला पकडण्याची योजना आखण्यात आली. मुरगूड नगरपरिषदेची इमारत एसटी स्टॅण्डला लागून असल्याने, सार्वजनिक ठिकाणी कारवाई केल्यास संशय टळेल, असा अंदाज पथकाने बांधला.
घटनादिवशी मुरगूड एसटी स्टॅण्डवर मोठी गर्दी होती. याच गर्दीचा फायदा घेत एसीबीचे सर्व अधिकारी साध्या वेशात तैनात झाले. बाळूमामाचे दर्शन घेणारे भाविक वाटावेत, यासाठी सर्व अधिकाऱ्यांनी कपाळावर भंडारा लावला होता. त्यामुळे स्टॅण्ड परिसरात वावरताना आरोपीला कोणताही संशय आला नाही. तक्रारदाराने सायंकाळी सव्वापाचच्या सुमारास देसाई यांना फोन करून आपण ४० हजार रुपये घेऊन आलो असल्याचे सांगितले.
यानंतर प्रदीप देसाई आपल्या वाहनासह एसटी स्टॅण्डवर आला. त्याने गाडीचे दार उघडताच तक्रारदाराने ठरलेली रक्कम गाडीत ठेवली. रक्कम स्वीकारताच एसीबी पथकाने क्षणाचाही विलंब न करता छापा टाकला आणि आरोपीला रंगेहाथ ताब्यात घेतले. गाडीतून लाचेची रक्कम जप्त करण्यात आली असून, संपूर्ण कारवाई अत्यंत गोपनीय पद्धतीने पार पडली.
या प्रकरणी मुरगूड पोलिस ठाण्यात गुन्हा दाखल करण्याची प्रक्रिया सुरू असून, पुढील तपास पोलिस निरीक्षक उज्ज्वला भडकमकर करत आहेत. ही कारवाई पोलिस निरीक्षक राजेंद्र सानप, सुधीर पाटील, संदीप काशीद, कृष्णा पाटील आणि प्रशांत दावणे यांच्या पथकाने यशस्वीपणे पार पाडली. बाळूमामाचे भक्त बनून रचलेला हा सापळा कोल्हापुरातील एसीबीच्या कारवाईचा एक वेगळा आणि चर्चेचा विषय ठरला असून, लाचखोर अधिकाऱ्यांना प्रशासनाने दिलेला कडक संदेश मानला जात आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
