Local Body Election Update: जिल्हा परिषद व पंचायत समिती निवडणुकीच्या मतदारयाद्या आता बुधवारी जाहीर

जिल्हा परिषद आणि पंचायत समिती निवडणुकीसाठी मतदान केंद्रनिहाय मतदारयाद्या जाहीर करण्यास पुन्हा मुदतवाढ. आता याद्या बुधवार, दि. २६ रोजी होणार प्रसिद्ध.

सायली मेमाणे

पुणे २५ नोव्हेंबर २०२५ : आगामी स्थानिक स्वराज्य संस्थांच्या निवडणुकांची तयारी सुरू असून जिल्हा परिषद आणि पंचायत समिती सदस्य पदाच्या निवडणुकांबाबत एक महत्त्वाची अपडेट समोर आली आहे. मतदान केंद्रनिहाय मतदार याद्या बुधवारी, दि. २६ रोजी प्रसिद्ध करण्यात येणार असल्याची माहिती निवडणूक प्रशासनाकडून देण्यात आली आहे. यापूर्वी या याद्या सोमवारी जाहीर करण्याचे नियोजन होते; मात्र प्रक्रियेसाठी आणखी वेळ आवश्यक असल्याने मुदतवाढ देण्यात आली. विशेष म्हणजे, ही दुसरी मुदतवाढ असून यापूर्वी १२ तारखेला याद्या जाहीर होणार असल्याचे सांगण्यात आले होते.

निवडणूक प्रक्रियेतील मतदार याद्या हा अत्यंत महत्त्वाचा घटक आहे. मतदान केंद्रनिहाय नावनोंदणी अचूक असणे निवडणूक व्यवस्थापनासाठी महत्त्वाचे ठरते. जिल्हा परिषदेत ७३ गट तर पंचायत समित्यांत १४६ गण यांसाठी अंतिम मतदार यादी ३ नोव्हेंबर रोजी प्रसिद्ध करण्यात आली होती. त्यानंतर केंद्रनिहाय मतदारांचे वर्गीकरण आणि अद्ययावत माहिती गोळा करण्याचे काम सुरू होते. या प्रक्रियेला अपेक्षेपेक्षा जास्त वेळ लागत असल्याने याद्या जाहीर करण्यात उशीर झाला आहे, असे प्रशासनाकडून स्पष्ट करण्यात आले आहे.

जिल्हा परिषदेतील सदस्य पदासाठी १३ ऑक्टोबरला आरक्षण सोडत काढण्यात आली होती. त्यानंतर अनेक राजकीय पक्षांनी आणि इच्छुक उमेदवारांनी आरक्षणाच्या आधारे आपले गणित मांडणे सुरू केले. मात्र मतदार याद्या वेळेवर न आल्यानं काही भागांमध्ये संभ्रम निर्माण झाला होता. केंद्रनिहाय मतदारांची अचूक संख्या, नव्याने समाविष्ट झालेले मतदार, स्थलांतरित मतदानाची नोंद यांसारखी माहिती उमेदवारांसाठी अत्यंत महत्त्वाची असते. आगामी निवडणुकांचा आराखडा आखताना मतदान केंद्रांची अंतिम माहिती देखील अनिवार्य असते.

निवडणूक विभागातील अधिकाऱ्यांनी सांगितले की, मतदार याद्यांमध्ये अचूकता आणि पारदर्शकता राखण्यासाठी सखोल तपासणी आवश्यक असते. नावांची पुनरावृत्ती, चुकीची नोंद, मृत अथवा स्थलांतरित मतदारांची नोंद वगळणे या प्रक्रियांना वेळ लागत असला तरी ही अचूक कामगिरी पुढील निवडणुकीत कोणत्याही वादाला आळा घालते. त्यामुळे याद्या जाहीर करण्यात विलंब झाला असला तरी त्याचा फायदा निवडणूक प्रक्रियेच्या पारदर्शकतेत वाढ होईल, असा विश्वास व्यक्त करण्यात आला आहे.

मतदानकेंद्रनिहाय याद्या जाहीर झाल्यानंतर इच्छुक उमेदवारांना निवडणूक रणनिती ठरवणे सोपे जाईल. कोणत्या केंद्रात कोणत्या समाजघटकांचा किती प्रभाव आहे, कोणत्या भागात स्पर्धा जास्त तीव्र होऊ शकते, तसेच कोणत्या केंद्रात प्रचार वाढवण्याची गरज आहे — या सर्व बाबींचा विचार उमेदवार केंद्रनिहाय मतदारयादीच्या आधारे करतात. त्यामुळे बुधवारी जाहीर होणाऱ्या याद्यांकडे राजकीय पक्ष आणि उमेदवार उत्सुकतेने पाहत आहेत.

दरम्यान, जिल्हा परिषद आणि पंचायत समिती निवडणुकीचे वेळापत्रक लवकरच जाहीर होण्याची शक्यता आहे. आरक्षण, मतदान केंद्रांची यादी आणि मतदारांची संख्या निश्चित झाल्यानंतरच पुढील प्रक्रिया गती घेईल. प्रशासनानेही सर्व घटक एकत्र करून निवडणूक प्रक्रिया सुरळीत करण्याचे प्रयत्न सुरू केले आहेत. स्थानिक स्वराज्य संस्थांतील निवडणुका या ग्रामीण भागाच्या विकासाचे भविष्य ठरवत असल्याने मतदारयाद्यांची ही सुधारित व अद्ययावत आवृत्ती अत्यंत महत्त्वाची ठरणार आहे.