Lonavala News: लोणावळ्यात उंदरांनी खाल्लेल्या बटाट्यांनी तयार वडापावचा प्रकार उघड, पर्यटक संतप्त
लोणावळा वडापाव घोटाळा – पर्यटकांच्या आरोग्याशी खेळ!
लोणावळ्यातील प्रसिद्ध चौधरी वडापाव दुकानात उंदरांनी चावलेले बटाटे वापरल्याचा आरोप. आरोग्य नियमांचं उल्लंघन, पर्यटक आणि नागरिकांनी संताप व्यक्त केला.
सायली मेमाणे
पुणे १५ जुलै २०२५ : Lonavala Rat Eaten Vada Pav News: महाराष्ट्रातील प्रसिद्ध पर्यटनस्थळ लोणावळ्यामधील एका प्रसिद्ध उपहारगृहात पर्यटकांच्या आरोग्याशी खेळ केल्याचा धक्कादायक प्रकार समोर आला आहे. चौधरी वडापाव नावाच्या दुकानात सडलेले व उंदरांनी कुरतडलेले बटाटे वापरून वडापाव तयार केला जात असल्याचा आरोप नुकत्याच झालेल्या तपासणीत समोर आला आहे. या प्रकारामुळे पर्यटकांसह स्थानिक नागरिकांमध्ये संतापाची लाट उसळली आहे.
ही घटना रायगड जिल्ह्यातील लोणावळा शहरात घडली असून, चोख तपासणीत किचनमधील भयानक अस्वच्छता, उंदरांचा धुमाकूळ, खराब अन्नसामग्रीचा साठा, व स्वयंपाक करताना स्वच्छतेच्या नियमांकडे होणारे दुर्लक्ष स्पष्ट झाले आहे. कर्मचार्यांकडे ना हातमोजे, ना टोपी, ना हात धुण्याची व्यवस्था – अशा अवस्थेत तयार होणारे अन्न थेट ग्राहकांच्या पोटात जात होते.
या दुकानात मोठ्या प्रमाणावर पर्यटक, हॉस्पिटलमध्ये येणारे रुग्णांचे नातेवाईक, डॉक्टर, नर्स, विद्यार्थी यांचे येणे-जाणे असते. त्यामुळे या घटनेचा थेट आरोग्यावर परिणाम होण्याची शक्यता आहे. विषबाधा, जुलाब, उलटी, पोटदुखी तसेच जीवघेण्या संसर्गजन्य आजारांचा धोका निर्माण झाला आहे, असा इशारा डॉक्टरांनी दिला आहे.
अन्न व औषध प्रशासनाने या उपहारगृहावर त्वरित कारवाई करण्याची मागणी होत असून, परिसरातील नागरिकांनी अशा अस्वच्छ व अपारदर्शक खाद्यविक्रेत्यांविरोधात तक्रार करण्याचे आवाहन केले आहे. पर्यटन हंगामात हजारो पर्यटक लोणावळा गाठतात, आणि त्यांच्या आरोग्याशी होणारा हा खेळ नक्कीच गंभीर चिंतेचा विषय आहे.
प्रशासनाने अशा घटना रोखण्यासाठी नियमित तपासणीसह कठोर नियम अंमलात आणावेत आणि दोषींवर कायदेशीर कारवाई केली जावी, अशी जनतेची मागणी आहे.
