Metro 4 News: मुंबई–ठाणेकरांचा प्रवास होणार सुसाट; मेट्रो 4 मार्गिकेचा मोठा टप्पा पूर्ण

मुंबई मेट्रो 4 मार्गिकेवर भांडुप येथे भव्य स्टील स्पॅन्स लाँच; ऑक्टोबर 2026 पर्यंत मेट्रो सेवेत येण्याची शक्यता, प्रवाशांना मोठा दिलासा.

पुणे ०३ जानेवारी २०२६ : मुंबई आणि ठाणेकरांसाठी दिलासादायक बातमी असून मेट्रो 4 मार्गिकेने आणखी एक महत्त्वाचा टप्पा यशस्वीपणे पूर्ण केला आहे. भांडुप पश्चिम परिसरात तब्बल 325 मेट्रिक टन वजनाचे तीन भव्य स्टील स्पॅन्स यशस्वीरीत्या उभारण्यात आले असून, यामुळे मेट्रो 4 च्या बांधकामाला वेग मिळाला आहे. एमएमआरडीएच्या नेतृत्वाखाली अत्यंत काटेकोर नियोजन आणि विविध यंत्रणांमधील समन्वयामुळे हे अवघड काम अपेक्षेपेक्षा कमी कालावधीत पूर्ण करण्यात आले.

या स्टील स्पॅन्सच्या उभारणीसाठी आठ हेवी ड्युटी क्रेन्स आणि 12 मल्टी-अ‍ॅक्सल वाहनांचा वापर करण्यात आला. साधारणपणे चार रात्री लागणारे हे काम अवघ्या दोन रात्रींमध्ये पूर्ण करण्यात आले, ही बाब विशेष उल्लेखनीय मानली जात आहे. या संपूर्ण मोहिमेत 35 अभियंते, 100 हून अधिक कुशल कामगार, 70 वाहतूक वॉर्डन आणि 25 पेक्षा जास्त पोलीस कर्मचारी तैनात होते. नागरिकांना कमीत कमी त्रास होईल याची खबरदारी घेत बीएमसी, बेस्ट, भांडुप वाहतूक पोलीस, स्थानिक पोलीस, रहिवासी आणि दुकानदार यांच्याशी समन्वय साधून हे काम पार पाडण्यात आले.

मेट्रो 4 आणि 4-अ या मार्गिका पूर्ण झाल्यानंतर त्या वडाळा ते छत्रपती शिवाजी महाराज टर्मिनसला जोडणाऱ्या मेट्रो 11 शी जोडल्या जाणार आहेत. यामुळे मुंबई आणि ठाणे परिसरात एकूण 58 किलोमीटर लांबीची देशातील सर्वात मोठी मेट्रो मार्गिका तयार होणार आहे. ही मार्गिका पूर्व उपनगरे, पश्चिम उपनगरे, मुंबई शहर आणि ठाणे शहर यांना थेट जोडणारी असल्याने प्रवाशांसाठी ती अत्यंत महत्त्वाची ठरणार आहे.

मुख्यमंत्री देवेंद्र फडणवीस यांनी यापूर्वी दिलेल्या माहितीनुसार, मेट्रो मार्ग 4 (वडाळा–कासारवडवली) आणि मेट्रो 4-अ (कासारवडवली–गायमुख) या प्रकल्पांची एकूण लांबी सुमारे 35 किलोमीटर आहे. यामध्ये मेट्रो 4 ची लांबी 32 किलोमीटर तर मेट्रो 4-अ ची लांबी 2.88 किलोमीटर आहे. या मार्गिकेवर एकूण 32 स्थानके प्रस्तावित असून या संपूर्ण प्रकल्पासाठी अंदाजे 16 हजार कोटी रुपयांचा खर्च अपेक्षित आहे.

या सर्व मेट्रो मार्गिकांसाठी भोगरपाडा येथे 45 हेक्टर जागेवर भव्य डेपो उभारण्यात येत आहे. मेट्रो 4, 4-अ, 10 आणि 11 या सर्व मार्गिकांसाठी हा डेपो उपयोगात येणार आहे. प्रकल्प पूर्ण झाल्यानंतर दररोज 13 लाखांहून अधिक प्रवासी या मेट्रोचा वापर करतील, असा अंदाज आहे. त्यामुळे रस्त्यांवरील वाहतूक मोठ्या प्रमाणात कमी होऊन प्रवासाचा वेळ आणि इंधन खर्च वाचण्यास मदत होणार आहे.

मुख्यमंत्री देवेंद्र फडणवीस यांनी यापूर्वी स्पष्ट केले होते की, ऑक्टोबर 2026 पर्यंत या मेट्रोचे सर्व टप्पे प्रवाशांसाठी खुले करण्याचा सरकारचा प्रयत्न आहे. टप्प्याटप्प्याने सेवा सुरू झाल्यानंतर मुंबई–ठाणे प्रवास अधिक वेगवान, सुरक्षित आणि आरामदायी होणार असून, महानगरातील वाहतूक समस्यांवर मेट्रो 4 महत्त्वाचा उपाय ठरेल, अशी अपेक्षा व्यक्त केली जात आहे.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare