MHADA Pune Lottery: पुण्यातील 4186 सदनिकांसाठी अर्जाची अंतिम मुदत वाढवली; 30 नोव्हेंबरपर्यंत संधी
MHADA Pune Lottery: पुण्यातील 4186 सदनिकांसाठी अर्जाची अंतिम मुदत वाढवली; 30 नोव्हेंबरपर्यंत संधी
MHADA Pune Board ने 4186 घरांसाठी अर्ज सादर करण्याची अंतिम मुदत 30 नोव्हेंबरपर्यंत वाढवली. संगणकीय सोडत 11 डिसेंबर 2025 ला होणार असून आतापर्यंत 1.82 लाख अर्ज प्राप्त.
सायली मेमाणे
पुणे २१ नोव्हेंबर २०२५ : पुणे गृहनिर्माण व क्षेत्रविकास मंडळ म्हणजेच म्हाडा पुणे मंडळाने 4,186 सदनिकांच्या विक्रीसाठी आयोजित करण्यात आलेल्या संगणकीय सोडतीसाठी अर्ज सादर करण्याच्या अंतिम मुदतीत वाढ केली आहे. पुणे, पिंपरी-चिंचवड, पीएमआरडीए तसेच सोलापूर, कोल्हापूर आणि सांगली जिल्ह्यातील विविध गृहनिर्माण प्रकल्पांतील घरांसाठी नागरिकांकडून मोठ्या प्रमाणात प्रतिसाद मिळत असल्याने ही मुदत 30 नोव्हेंबर 2025 पर्यंत वाढवण्यात आली आहे. या कालावधीत अर्जदार ऑनलाइन अर्ज तसेच अनामत रकम भरू शकतील.
म्हाडाच्या माहितीनुसार, 4186 सदनिकांसाठी आतापर्यंत 1,82,781 ऑनलाईन अर्ज प्राप्त झाले आहेत. यापैकी 1,33,885 अर्ज अनामत रकमेसह प्राप्त झाले असल्याचे सांगण्यात आले. नागरिकांकडून मिळालेल्या उत्स्फूर्त प्रतिसादामुळे आणि कागदपत्र पडताळणीमध्ये अनेक अर्जदारांना तांत्रिक अडचणी आल्यामुळे मुदतवाढ देण्याची मागणी वाढली होती. याचा विचार करून पुणे मंडळाने अर्ज सादरीकरणाची ही शेवटची संधी दिली असल्याचे स्पष्ट केले.
अर्जदारांना 30 नोव्हेंबर 2025 रोजी रात्री 11.59 वाजेपर्यंत ऑनलाइन माध्यमातून अनामत रक्कम भरता येईल. तर 1 डिसेंबर 2025 रोजी संबंधित बँकेच्या कार्यालयीन वेळेत RTGS किंवा NEFT द्वारे रक्कम भरण्याची सुविधा उपलब्ध आहे. सर्व अर्जांची छाननी झाल्यानंतर संगणकीय सोडत 11 डिसेंबर 2025 रोजी दुपारी 12 वाजता घेण्यात येणार आहे. सोडतीसंदर्भातील अद्ययावत माहिती आणि वेळापत्रक म्हाडाच्या अधिकृत संकेतस्थळावर उपलब्ध असेल.
या सोडतीसाठी घोषित करण्यात आलेल्या 4186 सदनिकांचे चार प्रमुख घटकांमध्ये विभाजन करण्यात आले आहे. म्हाडा गृहनिर्माण योजनेअंतर्गत ‘प्रथम येणाऱ्यास प्रथम प्राधान्य’ या तत्वावर 1683 सदनिका उपलब्ध आहेत. प्रधानमंत्री आवास योजना (शहरी) अंतर्गत याच तत्वावर 299 सदनिका नागरिकांसाठी राखीव आहेत. पुणे महानगर प्रदेश विकास प्राधिकरणाच्या (PMRDA) हद्दीतील 15 टक्के सर्वसमावेशक गृहनिर्माण योजनेअंतर्गत 864 सदनिकांचा समावेश आहे. तर पुणे मनपा, पिंपरी-चिंचवड मनपा आणि PMRDA हद्दीतील 20 टक्के सर्वसमावेशक गृहनिर्माण योजनेअंतर्गत 3222 सदनिका उपलब्ध करुन देण्यात आल्या आहेत.
नागरिकांच्या वाढत्या मागणीमुळे या सोडतीला मोठा प्रतिसाद मिळत आहे. अनेक अर्जदारांनी कागदपत्रे वेळेत अपलोड करता न आल्यामुळे किंवा पडताळणी प्रक्रियेत तांत्रिक अडचणी आल्यामुळे मुदतवाढ मागितली होती. शिवाय, सणासुदीचा काळ आणि बँक व्यवहारातील विलंबामुळे पर्याप्त वेळ मिळावा, अशीही मागणी झाली. पुणे मंडळाने याचा सकारात्मक विचार करून अर्ज सादरीकरणासाठीची अंतिम मुदत 30 नोव्हेंबरपर्यंत वाढवण्याचा निर्णय घेतला आहे.
पुणे शहरातील प्रॉपर्टीचे वाढते दर, परवडणाऱ्या घरांची तीव्र गरज आणि म्हाडा प्रकल्पांचे विश्वासार्ह स्वरूप यामुळे या सोडतीकडे मोठ्या अपेक्षेने पाहिले जात आहे. अंतिम यादी जाहीर झाल्यानंतर अनेक कुटुंबांना स्वतःच्या घराचे स्वप्न पूर्ण होण्याची संधी मिळणार आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
