Missing Link: महाराष्ट्र दिनी मुंबई–पुणे ‘मिसिंग लिंक’चे लोकार्पण; प्रवास होणार वेगवान, सुरक्षित आणि विनाअडथळा

मुंबई–पुणे द्रुतगती मार्गावरील ‘मिसिंग लिंक’ प्रकल्पाचे 1 मे रोजी लोकार्पण. जगातील सर्वात रुंद बोगदा, 650 मीटर केबल-स्टेड ब्रिज आणि वेळेची मोठी बचत.

पुणे ३० एप्रिल २०२६ : मुंबई आणि पुणे या दोन शहरांदरम्यानचा प्रवास अधिक वेगवान, सुरक्षित आणि इंधन-बचत करणारा करण्यासाठी उभारण्यात आलेल्या ‘मिसिंग लिंक’ प्रकल्पाचे लोकार्पण महाराष्ट्र दिनी, 1 मे रोजी होणार आहे. महाराष्ट्र राज्य रस्ते विकास महामंडळ (MSRDC) यांनी पूर्ण केलेला हा महत्त्वाकांक्षी प्रकल्प घाट क्षेत्रातील वाहतूक कोंडी कमी करून प्रवाशांना मोठा दिलासा देणार आहे.

दुपारी 12.30 वाजता खोपोली एक्झिटजवळ, यशवंतराव चव्हाण द्रुतगती मार्ग येथे मुख्यमंत्री देवेंद्र फडणवीस यांच्या हस्ते या मार्गाचे लोकार्पण होणार आहे. कार्यक्रमाला केंद्रीय राज्यमंत्री मुरलीधर मोहोळ, उपमुख्यमंत्री सुनेत्रा अजित पवार आणि उपमुख्यमंत्री एकनाथ शिंदे उपस्थित राहणार आहेत.

हा प्रकल्प आधुनिक अभियांत्रिकीचा उत्कृष्ट नमुना मानला जातो. यातील 23.5 मीटर रुंदीचा बोगदा जगातील सर्वात रुंद बोगदा म्हणून Guinness World Records मध्ये नोंदवला गेला आहे. विशेष म्हणजे हा बोगदा लोणावळा तलावाच्या सुमारे 180 मीटर खाली खोदण्यात आला आहे, जे अभियांत्रिकी दृष्ट्या अत्यंत आव्हानात्मक काम होते.

प्रकल्पातील आणखी एक आकर्षण म्हणजे 650 मीटर लांबीचा केबल-स्टेड ब्रिज. या पुलाचे पायलॉन 182 मीटर उंच असून, तो भारतातील सर्वात उंच रस्त्यावरील पूल म्हणून ओळखला जात आहे. घाटातील वळणावळणाचे रस्ते आणि वारंवार होणारी वाहतूक कोंडी टाळून प्रवासाचा कालावधी लक्षणीयरीत्या कमी करण्यास हा प्रकल्प मदत करेल.

या मार्गामुळे वाहनचालकांना इंधनाची बचत, कमी ब्रेकिंग-ऍक्सेलरेशन आणि अधिक स्थिर वेगाने प्रवास करता येणार आहे. परिणामी, अपघातांची शक्यता कमी होऊन सुरक्षिततेतही वाढ होईल. औद्योगिक आणि आर्थिक हालचालींना गती देण्यातही या प्रकल्पाची मोठी भूमिका राहणार असल्याचे तज्ज्ञांचे मत आहे.

अलीकडेच उपमुख्यमंत्री एकनाथ शिंदे यांनी या प्रकल्पाची पाहणी करून कामाचा आढावा घेतला होता. महाराष्ट्राच्या पायाभूत सुविधांच्या विकासातील हा एक महत्त्वाचा टप्पा मानला जात असून, मुंबई–पुणे प्रवासाच्या अनुभवात आमूलाग्र बदल घडवण्याची क्षमता या ‘मिसिंग लिंक’मध्ये आहे.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/

Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare

About The Author

Sayali Memane

Sayali Memane is a Pune-based journalist at NewsDotz, covering Maharashtra news, current affairs, and trending updates. She focuses on clear, factual, and fast digital reporting, delivering reliable news content tailored for modern audiences across platforms.

See author's posts