MSRTC Recruitment 2026: एसटी महामंडळात 17,742 पदांची मेगा भरती; कंत्राटी कर्मचाऱ्यांना प्राधान्य
MSRTC Recruitment 2026: एसटी महामंडळात 17,742 पदांची मेगा भरती; कंत्राटी कर्मचाऱ्यांना प्राधान्य
MSRTC Recruitment 2026: एसटी महामंडळात 17,742 पदांची मोठी भरती होणार. चालक, वाहक व तांत्रिक पदांसाठी संधी; 2022 संपात काम केलेल्या कंत्राटी कर्मचाऱ्यांना प्राधान्य.
पुणे १२ मार्च २०२६ : महाराष्ट्र राज्य मार्ग परिवहन महामंडळामध्ये (एसटी) लवकरच मोठी मेगा भरती होणार आहे. राज्यातील बेरोजगार तरुणांसाठी ही मोठी संधी ठरणार असून तब्बल 17 हजार 742 पदे भरली जाणार आहेत. राज्याचे परिवहन मंत्री प्रताप सरनाईक यांनी विधान परिषदेत ही घोषणा केली. एसटी महामंडळ अधिक सक्षम आणि आधुनिक करण्याच्या उद्देशाने हा महत्त्वपूर्ण निर्णय घेण्यात आला आहे.
एसटी महामंडळ सध्या आर्थिक संकटातून बाहेर पडण्याचा प्रयत्न करत आहे. प्रवाशांना अधिक चांगल्या सुविधा देण्यासाठी तसेच बससेवा अधिक मजबूत करण्यासाठी सरकारने मोठ्या प्रमाणात नवीन बसेस खरेदी करण्याचा निर्णय घेतला आहे. त्यासाठी दरवर्षी सुमारे पाच हजार नवीन बसेस ताफ्यात दाखल करण्याचे धोरण राज्य सरकारने स्वीकारले आहे. या वाढत्या बससेवेसाठी आवश्यक मनुष्यबळ उपलब्ध व्हावे यासाठी मोठ्या प्रमाणावर भरती प्रक्रिया राबवली जाणार आहे.
परिवहन विभागाने या भरतीचा प्रस्ताव वित्त विभागाकडे मंजुरीसाठी पाठवला आहे. तांत्रिक प्रक्रिया पूर्ण झाल्यानंतर या भरतीची अधिकृत जाहिरात प्रसिद्ध केली जाईल, अशी माहिती परिवहन मंत्री प्रताप सरनाईक यांनी दिली. ही भरती कंत्राटी पद्धतीने केली जाणार असल्याची शक्यता व्यक्त करण्यात येत आहे.
या भरती प्रक्रियेत विशेष म्हणजे 2022 मध्ये झालेल्या ऐतिहासिक एसटी संपादरम्यान काम केलेल्या कंत्राटी कर्मचाऱ्यांना प्राधान्य दिले जाणार आहे. त्या काळात एसटी सेवा सुरळीत ठेवण्यासाठी अनेक कंत्राटी कर्मचाऱ्यांनी काम केले होते. त्यांच्या अनुभवाचा आणि योगदानाचा विचार करून त्यांना भरती प्रक्रियेत संधी देण्याचा सरकारचा विचार आहे.
एसटी महामंडळाच्या ताफ्यात गेल्या काही वर्षांत लक्षणीय वाढ झाली आहे. संपाच्या काळात एसटीकडे सुमारे 12,500 बसेस होत्या. मात्र सध्या ही संख्या वाढून 14,000 पेक्षा जास्त झाली आहे. याशिवाय आणखी हजारो बसेस ताफ्यात दाखल होणार आहेत. सरकारने 8,000 बसेस खरेदीसाठी निविदा प्रक्रिया पूर्ण केली असून त्यापैकी सुमारे 3,000 बसेस टप्प्याटप्प्याने ताफ्यात दाखल होत आहेत.
या वाढत्या बससंख्येमुळे चालक, वाहक, तांत्रिक कर्मचारी तसेच इतर सहाय्यक कर्मचाऱ्यांची मोठ्या प्रमाणावर गरज निर्माण झाली आहे. त्यामुळे एसटी महामंडळाला सक्षम करण्यासाठी ही मोठी भरती केली जाणार आहे. या भरतीमुळे राज्यातील सुशिक्षित बेरोजगार तरुणांना रोजगाराची मोठी संधी मिळणार आहे.
दरम्यान, एसटी सेवा अधिक आधुनिक करण्यासाठी सरकारकडून विविध सुधारणा केल्या जात आहेत. नवीन बसेस, डिजिटल तिकीट प्रणाली आणि प्रवाशांसाठी अधिक चांगल्या सुविधा उपलब्ध करून देण्याचा प्रयत्न केला जात आहे. या पार्श्वभूमीवर होणारी ही मेगा भरती एसटी महामंडळासाठी आणि राज्यातील तरुणांसाठी महत्त्वाची ठरणार आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
