Mumbai Illegal Schools: मुंबईत 164 अनधिकृत शाळा शेकडो विद्यार्थ्यांचे भविष्य धोक्यात, कोणत्या भागात सर्वाधिक?
मुंबईत 164 अनधिकृत शाळा शेकडो विद्यार्थ्यांचे भविष्य धोक्यात, कोणत्या भागात सर्वाधिक?
मुंबई शहर आणि उपनगरात 164 अनधिकृत शाळा सुरू असल्याचे समोर आले आहे. मानखुर्द, मालाड, कांदिवलीसह अनेक भागांतील शेकडो विद्यार्थ्यांचे भविष्य धोक्यात असून सरकारने समायोजनाची अडचण मान्य केली आहे.
पुणे २७ जून २०२६ : मुंबईतील अनधिकृत शाळांचा प्रश्न पुन्हा एकदा गंभीर बनला असून, शहर आणि उपनगरात तब्बल 164 शाळा कोणत्याही वैध मान्यतेशिवाय सुरू असल्याची माहिती समोर आली आहे. या शाळांमध्ये शिक्षण घेणाऱ्या शेकडो विद्यार्थ्यांच्या भवितव्यावर प्रश्नचिन्ह निर्माण झाले असून, हा मुद्दा राज्याच्या विधिमंडळातही गाजला आहे. सरकारनेही विद्यार्थ्यांचे मान्यताप्राप्त शाळांमध्ये समायोजन करणे हे मोठे आव्हान असल्याचे मान्य केले आहे.
शिक्षण संचालनालयाने जाहीर केलेल्या माहितीनुसार, मुंबईतील 164 शाळा अनधिकृत स्वरूपात कार्यरत आहेत. यापैकी 48 शाळांनी मान्यता मिळवण्यासाठी संबंधित पालिका प्रशासनाकडे प्रस्ताव सादर केले आहेत. मात्र, उर्वरित शाळांची स्थिती अद्यापही अनिश्चित आहे. विशेष म्हणजे या शाळांपैकी बहुतांश शाळा दाट लोकवस्ती आणि झोपडपट्टी भागांमध्ये सुरू असल्याने विद्यार्थ्यांचे इतर शासकीय किंवा मान्यताप्राप्त शाळांमध्ये स्थलांतर करणे अत्यंत कठीण असल्याचे सरकारने स्पष्ट केले आहे.
या विषयावर विधान परिषदेत आमदार अनिल परब आणि सचिन अहीर यांनी सरकारला धारेवर धरले. डिसेंबर 2023 मध्ये जारी करण्यात आलेल्या शासन निर्णयानुसार, संबंधित भागातील अनधिकृत शाळा सुरू राहिल्यास स्थानिक शिक्षणाधिकाऱ्यांना वैयक्तिकरित्या जबाबदार धरले जाईल आणि त्यांच्यावर शिस्तभंगाची कारवाई करण्यात येईल, असे स्पष्ट करण्यात आले होते. मात्र, या निर्णयानंतरही अनेक शाळा अद्याप सुरूच असल्याने कारवाईची प्रभावी अंमलबजावणी झाली का, असा प्रश्न उपस्थित करण्यात आला.
या प्रश्नावर शालेय शिक्षण मंत्री दादा भुसे यांनी उत्तर देताना विद्यार्थ्यांचे हित लक्षात घेऊन टप्प्याटप्प्याने कारवाई केली जात असल्याचे सांगितले. अनधिकृत शाळांवर तातडीने कारवाई केल्यास तेथील विद्यार्थ्यांचे शिक्षण विस्कळीत होऊ शकते. त्यामुळे प्रथम त्यांच्या प्रवेशाची पर्यायी व्यवस्था करणे आवश्यक असल्याचे सरकारने नमूद केले आहे.
आकडेवारीनुसार, सर्वाधिक अनधिकृत शाळा एम/पूर्व अर्थात मानखुर्द विभागात असून येथे 65 शाळा कार्यरत आहेत. त्यानंतर पी/उत्तर म्हणजे मालाड विभागात 25 शाळा, आर/दक्षिण म्हणजे कांदिवली विभागात 12 शाळा आणि एल विभागातही 12 शाळा अनधिकृत असल्याचे समोर आले आहे. विशेष म्हणजे या 164 शाळांपैकी तब्बल 145 शाळा इंग्रजी माध्यमाच्या आहेत. त्यामुळे इंग्रजी शिक्षणाच्या वाढत्या मागणीचा फायदा घेत अनेक ठिकाणी नियमबाह्य पद्धतीने शाळा सुरू असल्याची चर्चा आहे.
शिक्षण क्षेत्रातील तज्ज्ञांच्या मते, पालकांनी मुलांचा प्रवेश घेण्यापूर्वी संबंधित शाळेला शासनाची मान्यता आहे का, याची खात्री करणे अत्यंत आवश्यक आहे. अनधिकृत शाळांमध्ये शिक्षण घेतल्यास विद्यार्थ्यांच्या प्रमाणपत्रांपासून पुढील शिक्षणापर्यंत अनेक अडचणी निर्माण होऊ शकतात.
दरम्यान, सरकारकडून अनधिकृत शाळांविरोधात कारवाईची प्रक्रिया सुरू असल्याचे सांगितले जात असले, तरी विद्यार्थ्यांचे नुकसान होणार नाही याची काळजी घेऊनच पुढील निर्णय घेतले जाणार आहेत. त्यामुळे या प्रश्नावर सरकार कोणती ठोस पावले उचलते, याकडे पालक, विद्यार्थी आणि शिक्षण क्षेत्राचे लक्ष लागले आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
