Mumbai Metro Line 2B: मंडाळे ते चेंबूरचा पहिला टप्पा या महिन्यात सेवा सुरू
Mumbai Metro Line 2B: मंडाळे ते चेंबूरचा पहिला टप्पा या महिन्यात सेवा सुरू
मुंबई मेट्रो 2B चा पहिला टप्पा मंडाळे ते चेंबूर (डायमंड गार्डन) या महिन्याच्या अखेरीस सुरू होणार. मेट्रो 2B मार्गावर एकूण 20 स्टेशन्स असून मुंबईकरांचा प्रवास जलद होणार.
सायली मेमाणे
पुणे २३ ऑक्टोबर २०२५ : मुंबई: मुंबई मेट्रो 2B चा पहिला टप्पा मंडाळे ते चेंबूर (डायमंड गार्डन) या महिन्याच्या अखेरीस सेवेत दाखल होण्याची शक्यता आहे. हा टप्पा पूर्ण झाल्यानंतर पूर्व आणि पश्चिम उपनगरांना जोडणारी ही पहिली मेट्रो ठरेल. मेट्रो 2B संपूर्ण मार्ग सुरू झाल्यानंतर विविध मेट्रो मार्गांना जोडला जाणार आहे, ज्यामुळे मुंबईकरांचा प्रवास अधिक वेगवान आणि सोपा होणार आहे.
मेट्रो 2B मार्गाची सुरुवात पूर्व उपनगरातील मंडाळे पासून होते आणि पश्चिमेकडे अंधेरी पर्यंत पोहोचते. हा मार्ग पूर्व उपनगरात सुरू होणारी आणि पश्चिम उपनगरात पोहचणारी महत्त्वाची मेट्रो म्हणून ओळखला जात आहे. मेट्रो मार्गाचा पहिला टप्पा पूर्ण झाला असून गेल्या काही दिवसांपासून या मार्गावर चाचणी धाव सुरू आहे. सुरुवातीला हा मार्ग मुंबई मेट्रो 3 च्या दुसऱ्या टप्प्यासह चालवण्याचे प्रयत्न सुरू होते, परंतु सुरक्षा प्रमाणपत्रांच्या विलंबामुळे मार्ग सुरू करण्यात थोडा विलंब झाला.
पहिल्या टप्प्यातील स्थानके:
पहिला टप्पा 5 किलोमीटरचा असून, या मार्गावर एकूण 5 स्थानके असतील:
- मंडाळे
- मानखुर्द
- बीएसएनएल मेट्रो
- शिवाजी महाराज चौक
- डायमंड गार्डन (चेंबूर)
मेट्रो 2B मार्गावर एकूण 20 स्टेशन्स आहेत, ज्यामध्ये मंडाळे ते चेंबूर तसेच पुढील महत्त्वाची स्थानके समाविष्ट आहेत:
एसिक नगर, प्रेम नगर, इंदिरा नगर, नानावटी हॉस्पीटल, खिरा नगर, सारस्वत नगर, नॅशनल कॉलेज, वांद्रे मेट्रो, इन्कम टॅक्स ऑफिस, आयएलएफएस, MTNL मेट्रो, स.गो. बर्वे मार्ग, कुर्ला (पूर्व), ईस्टर्न एक्सप्रेस हायवे, चेंबूर, डायमंड गार्डन, शिवाजी महाराज चौक, बीएसएनएल मेट्रो, मानखुर्द, मंडाळे मेट्रो.
हा मार्ग वांद्रे येथे मेट्रो 3 शी जोडला जाणार असल्यामुळे अंधेरीहून दक्षिण मुंबईत जाणे सहज शक्य होईल. त्याचबरोबर कुर्ला पूर्वपर्यंत पोहोचणेही सोपे होईल. मेट्रो 4 आणि 4A मार्गांशी जोडले जाणारे असल्यामुळे ठाणे आणि नवी मुंबई पर्यंत प्रवास सोपा होईल. याशिवाय चेंबूर मोनो रेल्वे, सीएसएमटी-पनवेल कॉरीडॉर आणि मुंबई-नवी मुंबई विमानतळ फास्ट कॉरीडॉरपर्यंत पोहोचणेही अधिक सोपे होईल.
एकंदरीत, मेट्रो 2B चा पहिला टप्पा सुरू झाल्यानंतर मुंबईकरांसाठी प्रवास अधिक वेगवान, सुरक्षित आणि सुलभ होणार आहे. शहरातील सार्वजनिक वाहतूक अधिक प्रभावी होईल आणि मुंबईकरांचा रोजचा प्रवास अधिक आरामदायक बनेल.
