Mumbai News: ‘तुम घाटी लोग सुधरोगे नाही’ — मुंबईत प्रसिद्ध बिल्डरकडून मराठी तरुणाला शिवीगाळ पोलिसात गुन्हा दाखल
Mumbai News: ‘तुम घाटी लोग सुधरोगे नाही’ — मुंबईत प्रसिद्ध बिल्डरकडून मराठी तरुणाला शिवीगाळ व मारहाण, गोवंडी पोलिसात गुन्हा दाखल
मुंबईतील प्रसिद्ध बिल्डर सुशील रहेजा याने मराठी तरुणाला ‘तुम घाटी लोग नही सुधरोगे’ म्हणत मारहाण केल्याचा आरोप आहे. या प्रकरणी गोवंडी पोलीस ठाण्यात गंभीर कलमान्वये गुन्हा दाखल करण्यात आला आहे.
पुणे ०३ जानेवारी २०२६ : मुंबईत पुन्हा एकदा मराठी विरुद्ध अमराठी असा वाद चिघळण्याची चिन्हे दिसत असून, एका धक्कादायक घटनेने शहराचे वातावरण तापले आहे. मुंबईतील प्रसिद्ध बांधकाम व्यावसायिक सुशील रहेजा याने आपल्या कार्यालयात काम करणाऱ्या मराठी तरुणाला शिवीगाळ करत मारहाण केल्याचा गंभीर आरोप समोर आला आहे. “तुम घाटी लोग नही सुधरोगे” असे अपमानास्पद शब्द वापरत या तरुणाला मारहाण करण्यात आल्याचा दावा तक्रारीत करण्यात आला असून, या प्रकरणी गोवंडी पोलीस ठाण्यात गुन्हा दाखल करण्यात आला आहे. या घटनेमुळे मराठी समाजात तीव्र संताप व्यक्त केला जात आहे.
मिळालेल्या माहितीनुसार, तक्रारदार तरुण हा सुशील रहेजाच्या चेंबुर येथील कार्यालयात शिपाई म्हणून काम करत होता. घटनेच्या दिवशी कार्यालयात एक महत्त्वाची मिटींग सुरू होती. त्या वेळी काही कागदपत्रांवर स्टॅपल नीट लावले गेले नाहीत, या अत्यंत क्षुल्लक कारणावरून सुशील रहेजा संतप्त झाला. रागाच्या भरात त्याने संबंधित तरुणाला शिवीगाळ करण्यास सुरुवात केली. केवळ शिवीगाळ न करता, जातीय आणि प्रादेशिक द्वेष व्यक्त करणारे शब्द वापरून त्याला अपमानित करण्यात आल्याचा आरोप आहे.
तक्रारीनुसार, “तुम घाटी लोग कभी नही सुधरोगे” असे म्हणत सुशील रहेजाने तरुणाला मारहाण केली. या मारहाणीत तरुणाला मानसिक आणि शारीरिक त्रास सहन करावा लागला. यानंतर त्याला पुन्हा कामावर येऊ नये, अशी धमकीवजा वागणूकही देण्यात आली. या प्रकारामुळे भयभीत झालेल्या तरुणाने थेट गोवंडी पोलीस ठाणे गाठत सुशील रहेजाविरोधात तक्रार दाखल केली.
पोलिसांनी तक्रारीची दखल घेत आरोपीविरोधात बीएनएस २०२३ अंतर्गत कलम ११५ तसेच अनुसूचित जाती आणि जमाती (अत्याचार प्रतिबंधक अधिनियम) १९८९ अंतर्गत गुन्हा दाखल केला आहे. प्रकरण गंभीर स्वरूपाचे असल्याने पोलिसांकडून पुढील तपास सुरू आहे. या घटनेतील साक्षीदार, कार्यालयातील सीसीटीव्ही फुटेज आणि इतर पुरावे तपासले जात असून, आरोपीविरोधात कठोर कारवाई होणार का, याकडे सर्वांचे लक्ष लागले आहे.
या घटनेची पार्श्वभूमी अधिक संवेदनशील ठरते कारण सध्या राज्यात मराठी अस्मितेचा मुद्दा ऐरणीवर आहे. मीरा-भाईंदरमध्ये अमराठी महापौर निवडल्याच्या मुद्द्यावरून मराठी एकीकरण समिती तसेच विविध मराठीप्रेमी संघटना आक्रमक झाल्या आहेत. अशा वातावरणात एका नामांकित परप्रांतीय बांधकाम व्यावसायिकाकडून मराठी तरुणाला अपमानास्पद वागणूक आणि मारहाण झाल्याचा आरोप समोर आल्याने वाद आणखी चिघळण्याची शक्यता आहे.
मुंबईसारख्या बहुभाषिक आणि बहुसांस्कृतिक शहरात अशा प्रकारच्या घटना सामाजिक सलोख्यासाठी घातक ठरतात. कायद्याच्या चौकटीत राहून दोषींवर कठोर कारवाई व्हावी, अशी मागणी आता विविध स्तरांतून होत आहे. पोलीस तपासातून नेमकी सत्यस्थिती काय समोर येते आणि प्रशासन या प्रकरणात कोणती भूमिका घेतं, हे येत्या काळात स्पष्ट होणार आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
