Pandharpur Accident: ऊसतोड करून परतीच्या वाटेवर काळाचा घाला; अहिल्या पुलावर भीषण अपघात
Pandharpur Accident: ऊसतोड करून परतीच्या वाटेवर काळाचा घाला; अहिल्या पुलावर भीषण अपघात
Pandharpur Accident मध्ये चंद्रभागा नदीच्या अहिल्या पुलावर ट्रॅक्टर व कंटेनर कोसळून दोन ऊसतोड कामगारांचा मृत्यू, आठ जण गंभीर जखमी; पुलाच्या सुरक्षेवर प्रश्नचिन्ह.
पुणे १२ जानेवारी २०२६ : पंढरपूर शहरातील चंद्रभागा नदीवरील अहिल्या पुलावर रविवारी रात्री घडलेल्या भीषण अपघाताने संपूर्ण परिसरात शोककळा पसरली आहे. दिवसभर कष्टाची ऊसतोड करून कुटुंबाकडे परतणाऱ्या मजुरांवर काळाने घाला घातला. या दुर्दैवी अपघातात दोन नागरिकांचा जागीच मृत्यू झाला असून आठ जण गंभीर जखमी झाले आहेत. कर्नाटकातून ऊसतोड करून पंढरपूर तालुक्यातील करकंबकडे परतणारी ऊसतोड टोळी या अपघाताची शिकार झाली.
रविवारी सायंकाळी साडेआठच्या सुमारास ट्रॅक्टर आणि समोरून येणारा कंटेनर पंढरपूरच्या चंद्रभागा नदीवरील अहिल्या पुलावरून खाली कोसळले. प्राथमिक माहितीनुसार, पुलावर चढताना ट्रॅक्टर चालकाचा अचानक ताबा सुटला आणि ट्रॅक्टर थेट पुलाखाली कोसळला. याच क्षणी समोरून येणाऱ्या कंटेनरच्या चालकाचाही ताबा सुटल्याने तोही पुलावरून खाली कोसळला. या दुहेरी अपघातामुळे घटनास्थळी एकच गोंधळ उडाला.
अपघातग्रस्त ट्रॅक्टरमध्ये ऊसतोड करून परतणारे नऊ जण प्रवास करत होते. यामध्ये दोन लहान मुलांचाही समावेश होता. कंटेनरमध्ये चालकासह एक व्यक्ती असल्याची माहिती समोर आली आहे. या अपघातात महादेव दिलीप काळे (वय 50) आणि राजू रमेश चव्हाण (वय 40) यांचा दुर्दैवी मृत्यू झाला. तर लक्ष्मण राजेंद्र चव्हाण, सुवर्णा ज्ञानेश्वर पवार, अनिता भारत काळे, विनोद सुखदेव गोमटे, नाना हनुमंत काळे तसेच देवांगी (वय 8) आणि गुड्डू (वय 4) ही भावंडे गंभीर जखमी झाली आहेत. कंटेनरमधील ब्रिजेशकुमार हाही जखमी झाला आहे.
जखमींपैकी चार जणांची प्रकृती गंभीर असून त्यांच्या हात-पायांना फ्रॅक्चर झाले आहेत. प्राथमिक उपचारानंतर या गंभीर जखमी रुग्णांना पुढील उपचारासाठी पंढरपूरहून सोलापूरच्या रुग्णालयात हलवण्याची तयारी डॉक्टरांनी केली होती. अपघाताची माहिती मिळताच सहाय्यक पोलीस अधीक्षक प्रशांत डगळे, तहसीलदार सचिन लंगुटे, तालुका पोलीस निरीक्षक वाय. टी. मुजावर यांच्यासह प्रशासकीय अधिकारी आणि पोलीस पथक तातडीने घटनास्थळी दाखल झाले.
अपघातानंतर काही वेळ वाहनांच्या खाली आणखी व्यक्ती अडकल्याची भीती व्यक्त करण्यात येत होती. पोलीस, स्थानिक तरुण आणि बचाव पथकाने क्रेनच्या मदतीने ट्रॅक्टर व कंटेनर बाजूला करून शोधकार्य राबवले. काही जखमी व्यक्ती पानांच्या ढिगाऱ्याखाली अडकलेल्या अवस्थेत आढळून आल्या. त्यांच्यावर तत्काळ उपचार सुरू करण्यात आले.
या अपघातामुळे पंढरपूरच्या अहिल्या पुलावरील वाहतूक सुरक्षेचा गंभीर प्रश्न पुन्हा ऐरणीवर आला आहे. पुलाचा काही भाग धोकादायक बनत चालल्याच्या चर्चा असून, या पुलाचे तातडीने स्ट्रक्चरल ऑडिट करण्यात यावे, अशी मागणी नागरिकांकडून होत आहे. ऊसतोड कामगारांचा हा दुर्दैवी मृत्यू प्रशासन आणि यंत्रणेसाठी इशाराच मानला जात असून भविष्यात असे अपघात टाळण्यासाठी ठोस उपाययोजना करण्याची गरज व्यक्त केली जात आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
