पीएमपीएमएलचा कडक नियम: चालकांनी मोबाईल-हेडफोन वापरल्यास तत्काळ निलंबन
पीएमपीएमएलचा कडक नियम: चालकांनी मोबाईल-हेडफोन वापरल्यास तत्काळ निलंबन
पुणे पीएमपीएमएलने प्रवाशांच्या सुरक्षेसाठी महत्त्वाचा निर्णय घेतला आहे. बस चालकांनी ड्रायव्हिंगदरम्यान मोबाईल किंवा हेडफोन वापरल्यास तत्काळ निलंबनाची कारवाई होणार आहे.
सायली मेमाणे
पुणे ९ सप्टेंबर २०२५ : पुणे शहरात दररोज लाखो प्रवासी पीएमपीएमएल बससेवेचा वापर करून प्रवास करतात. प्रवाशांच्या सुरक्षिततेला प्राधान्य देत पुणे महानगर परिवहन महामंडळाने एक मोठा आणि कडक निर्णय घेतला आहे. नव्याने जारी केलेल्या आदेशानुसार, बस चालकांनी ड्रायव्हिंगदरम्यान मोबाईल फोन किंवा हेडफोनचा वापर केल्यास त्यांच्यावर तत्काळ निलंबनाची कारवाई केली जाणार आहे.
गेल्या काही दिवसांत वाहनचालक मोबाईलवर बोलताना किंवा हेडफोनचा वापर करताना दिसल्याच्या तक्रारी समोर येत होत्या. यामुळे अपघाताचा धोका वाढण्याची शक्यता असल्याने पीएमपीएमएल प्रशासनाने ही कठोर पावले उचलली आहेत. आदेशात स्पष्टपणे नमूद केले आहे की, प्रवाशांच्या जीवाशी खेळ करणारी कोणतीही कृती सहन केली जाणार नाही.
पुणे आणि पिंपरी-चिंचवड परिसरात पीएमपीएमएलच्या हजारो बस दररोज धावतात. या बससेवेत दररोज लाखो नागरिक प्रवास करतात. प्रवाशांच्या सुरक्षेच्या दृष्टीने चालकांनी नेहमी दक्ष राहणे आवश्यक आहे. वाहन चालवताना मोबाईलवर बोलणे, मेसेज करणे किंवा हेडफोन वापरणे ही गंभीर बेपर्वाई मानली जाईल. यामुळे वाहनावरचे नियंत्रण सुटून अपघात होऊ शकतो आणि प्रवाशांचे प्राण धोक्यात येऊ शकतात.
प्रशासनाने या निर्णयाबाबत चालकांना आधीच सूचना दिल्या आहेत. तरीही जर कोणताही चालक नियमांचे उल्लंघन करताना आढळला तर त्याला तात्काळ निलंबित केले जाईल. अशा प्रकारच्या घटनांना थांबवण्यासाठी प्रवाशांनाही जागरूक राहण्याचे आवाहन केले आहे. जर प्रवाशांनी चालक मोबाईल वापरत असल्याचे किंवा हेडफोन लावल्याचे पाहिले, तर त्यांनी त्वरित पीएमपीएमएल प्रशासनाकडे तक्रार नोंदवावी.
या निर्णयामुळे चालकांमध्ये शिस्त निर्माण होईल आणि प्रवाशांचा विश्वास अधिक दृढ होईल, अशी अपेक्षा व्यक्त केली जात आहे. शहरात वाहतुकीची कोंडी, अपघाताचे प्रमाण आणि वाढत्या लोकसंख्येमुळे सार्वजनिक वाहतूक व्यवस्थेत सुरक्षिततेचे मानदंड राखणे अत्यावश्यक आहे. पीएमपीएमएलने घेतलेल्या या कठोर निर्णयाचे नागरिकांनी स्वागत केले असून, प्रवाशांना सुरक्षित प्रवासाचा अनुभव मिळेल, अशी आशा व्यक्त केली जात आहे.
