PMRDA Officers Transfer : पीएमआरडीएमधील अतिक्रमण व अभियांत्रिकी विभागात मोठ्या बदलांची लाट
पीएमआरडीएमधील अधिकार्यांच्या बदल्या
PMRDA मधील अतिक्रमण व अभियांत्रिकी विभागात मोठ्या बदलांची लाट; शीतल देशपांडे यांची बदली, प्रमोद कुदळे, सचिन म्हस्के यांची नवीन नियुक्ती
सायली मेमाणे
पुणे ३ जुलै २०२५ : पुणे: पुणे महानगर प्रदेश विकास प्राधिकरण (PMRDA) मध्ये अधिकारी स्तरावर मोठ्या प्रमाणावर बदल्या करण्यात आल्या असून, अतिक्रमण आणि अभियांत्रिकी विभागात हे बदल विशेष लक्षवेधी ठरले आहेत. राज्य शासनाकडून प्रतिनियुक्तीवर आलेल्या काही वरिष्ठ अधिकाऱ्यांची नवीन ठिकाणी बदली करण्यात आली आहे, तर दोन अधिकारी सेवानिवृत्त झाले आहेत.
अतिक्रमण निर्मूलन विभागात उपायुक्त (उपजिल्हाधिकारी) पदावर कार्यरत असलेले प्रमोद कुदळे यांची बदली सातारा जिल्ह्यातील कोरेगाव येथे उपविभागीय अधिकारी म्हणून झाली आहे. तसेच, तहसीलदार सचिन म्हस्के यांची पीएमआरडीएतील प्रतिनियुक्ती समाप्त करून त्यांची नियुक्ती महाबळेश्वर (सातारा) येथे करण्यात आली आहे. अतिक्रमण विभागात अशा प्रकारचे वरिष्ठ बदल शहरातील नियोजन व अंमलबजावणीच्या दृष्टीने महत्त्वपूर्ण मानले जात आहेत.
अभियांत्रिकी विभागात देखील महत्वाचा बदल झालेला असून, उपअभियंता शीतल देशपांडे यांची बदली ग्रामविकास विभाग, पुणे येथे झाली आहे. त्यांच्या जागी स्नेहल अंबू यांनी पदभार स्वीकारला आहे. पीएमआरडीएच्या अभियंता विभागात कामकाज करणाऱ्या महिला अधिकाऱ्यांमध्ये शीतल देशपांडे यांचा उल्लेख अत्यंत कार्यक्षम अधिकार्यांमध्ये होत होता.
दरम्यान, दोन वरिष्ठ अधिकाऱ्यांनी नुकतीच सेवानिवृत्ती स्वीकारली आहे. त्यामध्ये जिल्हा पुरवठा अधिकारी पदावरून काही महिन्यांपूर्वी सहआयुक्त म्हणून कार्यभार स्वीकारलेले संजय गायकवाड यांचा समावेश आहे. याशिवाय, अभियांत्रिकी विभागातील एका वरिष्ठ अभियंत्यांनीही सेवानिवृत्ती घेतली आहे.
PMRDA हे पुण्यातील एक अत्यंत महत्त्वाचे नियोजन व विकास संस्थान आहे, जे शहराच्या वाढीव गरजा लक्षात घेऊन पायाभूत सुविधा, बांधकाम परवाने, अतिक्रमण नियंत्रण अशा अनेक विभागांमध्ये काम करते. या अधिकार्यांच्या बदल्यांमुळे विभागीय कार्यप्रणालीत नव्या जबाबदाऱ्या आणि योजना राबविण्याच्या दृष्टीने बदल घडण्याची शक्यता वर्तवली जात आहे.
सार्वजनिक विकास प्रक्रियेत अतिक्रमण निर्मूलन व अभियांत्रिकी विभागांचे काम अत्यंत संवेदनशील असते. त्यामुळे नव्याने नेमणूक झालेल्या अधिकाऱ्यांपुढे नियोजन, अंमलबजावणी आणि जनतेच्या विश्वासास पात्र ठरण्याचे आव्हान असणार आहे.
