डॉ. प्रीती अदाणी यांचे आवाहन: दातृत्वासोबत एकत्रित उभारणीसही हातभार लावा
डॉ. प्रीती अदाणी यांचे आवाहन: दातृत्वासोबत एकत्रित उभारणीसही हातभार लावा
AVPN ग्लोबल कॉन्फरन्समध्ये डॉ. प्रीती अदाणी यांनी सामाजिक कार्यात फक्त दातृत्व नव्हे, तर एकत्रित प्रयत्न करण्याचे महत्त्व अधोरेखित केले.
सायली मेमाणे
पुणे ९ सप्टेंबर २०२५ : हाँगकाँगमध्ये झालेल्या AVPN ग्लोबल कॉन्फरन्समध्ये डॉ. प्रीती अदाणी यांनी समाजकार्याच्या नव्या दृष्टिकोनावर मार्गदर्शन केले. त्यांनी आपल्या भाषणात परोपकाराच्या पारंपारिक संकल्पनेत बदल घडवण्याचे आवाहन करत म्हटले की, फक्त दातृत्व देणे पुरेसे नाही, तर सर्वांनी एकत्र येऊन सामाजिक उभारणी करण्यावर भर द्यावा. “केवळ पैसे देऊ नका, तर एकत्र येऊन उभारणी करा,” असे सांगत त्यांनी समाजात बदल घडवण्यासाठी सह-निर्मितीची गरज अधोरेखित केली.
डॉ. प्रीती अदाणी यांनी सांगितले की, सामाजिक कार्याचा प्रभाव मोजण्यास आकडेवारी अपुरी ठरते. प्रत्यक्ष बदल त्या कार्यामागील मानवी कथांमध्ये दडलेले असतात. ही मानवी कथा आशा, परिवर्तन आणि सक्षमीकरणाच्या प्रकारातील असतात. या कथा लक्षात घेतल्यासच सामाजिक कार्याचा परिणाम स्पष्टपणे दिसतो. त्यांनी म्हटले की, जेव्हा सर्वजण एकाच व्यासपीठावर एकत्र येतात, तेव्हाच कामाचा परिणाम अनेक पटींनी वाढतो.
त्यांनी आपल्या भाषणात तीन महत्त्वाच्या बाबींवर भर दिला. सर्वप्रथम, प्रत्येक भागीदाराने फक्त देणगी देऊन थांबू नये, तर शाश्वत बदल घडवण्यासाठी एकत्र काम करणे आवश्यक आहे. दुसरे, मदत मिळालेली व्यक्ती इतरांना मदत करण्यास प्रेरित करावी, जेव्हा ही प्रेरणा समाजात पसरते, तेव्हा खऱ्या अर्थाने बदलाची प्रक्रिया सुरू होते. तिसरे, कौशल्ये आणि मूल्यांची सांगड आवश्यक आहे; मूल्यांशिवाय दिलेली कौशल्ये फक्त पायाभरणीशिवाय उभ्या केलेल्या इमारतीसारखी असतात.
डॉ. अदाणी यांनी स्पष्ट केले की, परोपकाराची खरी ताकद वेगवेगळ्या योगदानात नाही तर एकत्रित प्रयत्नांमध्ये आहे. “आपण केवळ देणगीदार नव्हे, तर सह-निर्माते बनले पाहिजे,” असे सांगत त्यांनी संसाधने एकत्र करून काम करण्याचे महत्त्व अधोरेखित केले. त्यांच्या मते, जेव्हा आपण एकत्र काम करतो, तेव्हा प्रत्येक रुपयाचा अधिक प्रभावी वापर होतो आणि उपाय जलद अंमलात येतात.
त्यांनी आपले भाषण समारोप करताना सांगितले की, समाजात बदल घडवण्यासाठी सर्वांनी मिळून प्रयत्न करणे गरजेचे आहे. यासाठी केवळ चर्चा न करता कृतीशील होणे आवश्यक आहे. विचारांचे आदानप्रदान, संसाधनांची देवाण-घेवाण आणि एकत्रित काम हेच समाजकार्याला यशस्वी बनवते. प्रीती अदाणी यांचे हे मार्गदर्शन सामाजिक कार्यकर्त्यांसाठी प्रेरणादायी ठरले असून, समाजात सकारात्मक बदल घडवण्यासाठी एकत्रित प्रयत्न करण्याची गरज अधोरेखित केली आहे.
