पुणे दामिनी पथक महिलांचे ‘लाइफगार्ड’, दोन आत्महत्यांपासून वाचवले प्राण
Pune Damini Pathak: महिलांचे ‘लाइफगार्ड’, दोन आत्महत्यांपासून वाचवले प्राण
पुणे पोलिसांचे दामिनी पथक महिलांच्या सुरक्षेसाठी उभे राहत असून, दोन महिला पोलिसांनी दोन आत्महत्येच्या प्रयत्नांपासून तरुणींना वाचवले आणि प्राण सुरक्षित केले.
सायली मेमाणे
पुणे १ सप्टेंबर २०२५ : पुणे शहर पोलिसांचे दामिनी पथक महिलांच्या सुरक्षेसाठी आणि संकटसमयी जीवनरक्षक कवच म्हणून काम करत आहे. अलीकडेच या पथकाने दोन आत्महत्येच्या गंभीर घटनांमध्ये धाव घेत, महिलांचे प्राण वाचवले असून, त्यांच्या या कामगिरीचे सर्व स्तरातून कौतुक होत आहे.
कोथरूड पोलिसांच्या दामिनी पथकातील पोलीस शिपाई श्रुती कढणे आणि आरती जाधव या दोघी महिला कर्मचाऱ्यांनी अत्यंत सावधगिरीने आणि तत्परतेने दोन तरुणींना आत्महत्येपासून वाचवले. श्रुती कढणे, ज्या राष्ट्रीय स्तरावरील सुवर्णपदक विजेत्या बॉक्सिंग खेळाडू आहेत, त्यांचा स्वतःचा अनुभव मुलींना सेल्फ डिफेन्स शिकवण्यासाठी आणि महिलांमध्ये आत्मविश्वास वाढवण्यासाठी उपयुक्त ठरतो. या पथकाचे काम फक्त संकटे टाळण्यापुरते मर्यादित नाही तर त्यांनी शाळा-कॉलेजच्या विद्यार्थिनींना मार्गदर्शन करत जनजागृती देखील केली आहे.
सद्याच्या घटनांमध्ये, कोथरूडमधील करिष्मा सोसायटीत २६ वर्षीय तरुणीने मानसिक तणावामुळे औषधांचे सेवन केले होते. ही माहिती दामिनी पथकाला मिळाली आणि लगेच श्रुती कढणे व आरती जाधव घटनास्थळी पोहोचल्या. तिला वेळेत रुग्णालयात नेऊन उपचार देण्यात आले आणि त्यानंतर मानसिक आधार देऊन आत्महत्येच्या मार्गावरून परावृत्त केले. ही तरुणी घटस्फोटाच्या मानसिक तणावातून या पावलावर आली होती.
दुसऱ्या दिवशी मयूर कॉलनीत आणखी एक तरुणी आई-वडिलांसोबत राहून कौटुंबिक कारणामुळे तिसऱ्या मजल्यावरून उडी मारण्याच्या तयारीत होती. दामिनी पथकाने तिथेही तत्परतेने धाव घेत, तिला धीर दिला आणि समजावून सांगितले की प्रत्येक अडचणीला मार्ग असतो आणि स्वतःचा जीव घेणे चुकीचे आहे. नंतर तिला सुरक्षितपणे आई-वडिलांकडे सुपूर्द केले.
या कामगिरीमुळे पुणे पोलिसांचे दामिनी पथक फक्त महिलांच्या सुरक्षेसाठी नाही, तर संकटसमयी जीवनरक्षक म्हणूनही ठरत असल्याचे पुन्हा एकदा सिद्ध झाले आहे. वरिष्ठ पोलीस निरीक्षक संदीप देशमाने यांच्या मार्गदर्शनाखाली या पथकाने धैर्य, तत्परता आणि संवेदनशीलता दाखवली आहे.
दामिनी पथकाच्या या कार्यामुळे महिलांना सुरक्षिततेची जाणीव वाढली असून, शहरातील महिलांचे मनोबल उंचावले आहे. अशा घटनांमुळे पोलिसांच्या कामगिरीचे महत्त्व अधोरेखित होते आणि महिलांच्या सुरक्षेसाठी पोलीस दल किती कटिबद्ध आहे हे स्पष्ट होते. भविष्यातही दामिनी पथक महिलांच्या संकटांमध्ये तत्पर राहून समाजात सकारात्मक उदाहरण निर्माण करत राहणार आहे.
