पुण्यातील ज्युपिटर हॉस्पिटलमध्ये लिव्हर ट्रान्सप्लांटद्वारे दीड वर्षाच्या बालकाचे यशस्वी उपचार
पुण्यातील ज्युपिटर हॉस्पिटलमध्ये लिव्हर ट्रान्सप्लांटद्वारे दीड वर्षाच्या बालकाचे यशस्वी उपचार
पुण्यातील ज्युपिटर हॉस्पिटलमध्ये डॉक्टरांच्या प्रयत्नांमुळे दीड वर्षाच्या चिमुकल्याचे लिव्हर ट्रान्सप्लांट यशस्वी झाले. कराडमधील मुलाला PFIC या दुर्मिळ यकृत विकारातून जीवदान मिळाले.
सायली मेमाणे
पुणे १३ सप्टेंबर २०२५ : पुण्यातील ज्युपिटर हॉस्पिटलमध्ये डॉक्टरांच्या कौशल्यपूर्ण प्रयत्नांमुळे दीड वर्षाच्या चिमुकल्याचे प्राण वाचवण्यात मोठे यश मिळाले आहे. कराडमधील एका कुटुंबातील लहान मुलगा जन्मापासूनच अनेक गंभीर आरोग्य समस्यांनी त्रस्त होता. त्याला पिवळसरपणा, सतत खाज सुटणे, वजन कमी होणे, झोप न लागणे आणि शारीरिक वाढ थांबणे यांसारख्या समस्या सतावत होत्या. सहसा १८ महिन्यांच्या मुलाचे वजन ९.८ ते १२.२ किलो असते, मात्र या बालकाचे वजन फक्त ८.५ किलो इतके होते. या परिस्थितीने चिंताग्रस्त झालेल्या पालकांनी पुण्यातील ज्युपिटर हॉस्पिटलमध्ये वैद्यकीय सल्ला घेतला.
तपासणीदरम्यान मुलाचे यकृत बायोप्सी करण्यात आले. त्यात यकृताच्या गंभीर आजाराचे निदान झाले. सुरुवातीला औषधोपचार सुरू करण्यात आले, परंतु प्रकृती खालावत गेल्याने अधिक प्रगत उपचारांची गरज भासली. अखेर या बालकाला Progressive Familial Intrahepatic Cholestasis (PFIC) हा दुर्मिळ यकृत विकार असल्याचे स्पष्ट झाले. या आजारामुळे यकृताची कार्यक्षमता कमी होऊन जीव धोक्यात येतो. तातडीने लिव्हर ट्रान्सप्लांटची शिफारस करण्यात आली.
२९ जुलै रोजी बालकाला रुग्णालयात दाखल करण्यात आले. त्याच्या वडिलांनी धाडस दाखवत स्वतःच्या यकृताचा एक भाग देण्याचा निर्णय घेतला. ३० जुलै रोजी डॉक्टरांच्या कुशल टीमने ही महत्त्वपूर्ण शस्त्रक्रिया यशस्वीरीत्या पूर्ण केली. ही प्रक्रिया अत्यंत गुंतागुंतीची असून त्यासाठी तज्ज्ञ डॉक्टरांची साथ आणि उच्चस्तरीय वैद्यकीय सुविधा आवश्यक असतात.
शस्त्रक्रियेनंतर मुलाच्या आरोग्यामध्ये जलद सुधारणा झाली. १८ ऑगस्ट रोजी त्याला रुग्णालयातून डिस्चार्ज देण्यात आला. सध्या त्याची खाज पूर्णतः थांबली असून झोप व्यवस्थित येते आहे. तसेच यकृताच्या चाचण्यांचे निकालही सकारात्मक आहेत. डॉक्टरांच्या म्हणण्यानुसार, पुढील काळात योग्य काळजी घेतल्यास या मुलाचे आरोग्य हळूहळू सुधारेल आणि तो निरोगी जीवन जगू शकेल.
या घटनेमुळे वैद्यकीय क्षेत्रात पुन्हा एकदा लिव्हर ट्रान्सप्लांटचे महत्त्व अधोरेखित झाले आहे. विशेषतः बालकांमध्ये अशा शस्त्रक्रिया अत्यंत आव्हानात्मक असतात. परंतु डॉक्टरांच्या तज्ज्ञतेमुळे आणि पालकांच्या धैर्यामुळे एक लहान जीव वाचवण्यात यश आले. पुण्यातील ज्युपिटर हॉस्पिटलने या यशस्वी उपचारामुळे वैद्यकीय क्षेत्रात आणखी एक मोलाची कामगिरी बजावली आहे.
