Pune Lohmarg Police | रेल्वे प्रवासी महिलेकडून दागिने चोरणारा चोरटा दिल्लीत जेरबंद, पुणे-मिरज रेल्वे स्थानकातील गुन्ह्यांचा तपास उघड
Pune Lohmarg Police | रेल्वे प्रवासी महिलेकडून दागिने चोरणारा चोरटा दिल्लीत जेरबंद, पुणे-मिरज रेल्वे स्थानकातील गुन्ह्यांचा तपास उघड
Pune Lohmarg Police | रेल्वे प्रवासी महिलांच्या बॅगांमधून दागिने लांबवणारा सराईत चोरटा दिल्लीहून जेरबंद. पुणे-मिरज रेल्वे स्थानकातील दोन गुन्ह्यांचा तपास उघड, पोलिसांकडून ११० ग्रॅम सोन्याचे दागिने जप्त.
सायली मेमाणे
पुणे १९ ऑगस्ट २०२५ : Pune Lohmarg Police | पुणे लोहमार्ग पोलिसांनी रेल्वे प्रवासी महिलांच्या बॅगेतून दागिने चोरणाऱ्या सराईत चोरट्याला दिल्लीहून अटक करून मोठी कामगिरी बजावली आहे. पुणे आणि मिरज रेल्वे स्थानक परिसरात या चोरट्याने महिलांना लक्ष्य केले होते. पोलिसांनी या आरोपीकडून तब्बल ११० ग्रॅम सोन्याचे दागिने जप्त केले आहेत.
अटक करण्यात आलेल्या आरोपीचे नाव रमेश उर्फ मोटा पिता फूलचंद (रा. न्यू अनाज मंडी, नजफगड, दिल्ली) असे आहे. तो रेल्वे प्रवाशांना मदत करण्याचा बहाणा करून त्यांच्या बॅगांमध्ये हात घालून दागिने लांबवत असे. २५ मे रोजी बडोदा-पुणे रेल्वे प्रवासादरम्यान एका महिला प्रवाशाकडून सोन्याच्या बांगड्या आणि अंगठी चोरीला गेल्याची तक्रार पोलिसांकडे दाखल झाली होती. या घटनेनंतर पोलिसांनी तपासाची चक्रे फिरवली.
लोहमार्ग पोलिसांनी तपास सुरू केल्यानंतर रमेश आणि त्याच्या साथीदारांचा या प्रकरणात सहभाग असल्याचे स्पष्ट झाले. त्यानंतर पोलिस पथक थेट दिल्लीला रवाना झाले आणि तेथील पोलिसांच्या मदतीने रमेशला अटक करण्यात आली. चौकशीत त्याने मिरज रेल्वे स्थानक परिसरातही अशाच पद्धतीने दागिने चोरल्याची कबुली दिली. या दोन्ही प्रकरणांमध्ये मिळून पोलिसांनी त्याच्याकडून ११० ग्रॅम सोन्याचे दागिने जप्त केले आहेत.
रेल्वे प्रवाशांनी अनोळखी व्यक्तींकडून मदत घेताना किंवा त्यांच्याशी संवाद साधताना सावधगिरी बाळगावी, असे पोलिसांनी आवाहन केले आहे. अनेकदा हे चोरटे मदतीच्या बहाण्याने महिलांच्या किंवा वृद्ध प्रवाशांच्या बॅगांमध्ये हात घालतात आणि मौल्यवान वस्तू लंपास करतात. त्यामुळे प्रवाशांनी अशा घटनांपासून सावध राहावे आणि संशयास्पद हालचाली दिसल्यास तात्काळ पोलिसांना कळवावे, असे आवाहन पोलिस अधीक्षक अश्विनी सानप यांनी केले आहे.
ही कारवाई पोलिस अधीक्षक अश्विनी सानप आणि अतिरिक्त अधीक्षक रोहिदास पवार यांच्या मार्गदर्शनाखाली करण्यात आली. या पथकात पोलीस निरीक्षक इरफान शेख, सहायक पोलीस निरीक्षक प्रभाकर कापुरे, पोलीस उपनिरीक्षक सुनील माने यांच्यासह अनेक अधिकाऱ्यांनी सक्रिय सहभाग घेतला. पुणे लोहमार्ग पोलिसांच्या या कारवाईचे सर्वत्र कौतुक होत आहे.
रेल्वे प्रवासी महिलांना लक्ष्य करणाऱ्या सराईत चोरट्याला जेरबंद करून पुणे लोहमार्ग पोलिसांनी केवळ गुन्हे उघडकीस आणले नाहीत, तर प्रवाशांचा विश्वासही परत मिळवला आहे. या घटनेतून प्रवाशांना सावध राहण्याचा इशारा मिळतो आणि पोलिसांच्या दक्षतेची जाणीव होते.
